ASTANA. 27 naýryz. Astanada jýrnalıstıka salasyna qyzyǵýshylyq tanytqan mektep oqýshylary arasynda HI Halyqaralyq medıa festıval ótýde. Sonyń aıasynda búgin festıvalǵa qatysýshylar «Egemen Qazaqstan» respýblıkalyq gazeti AQ-nyń prezıdenti Saýytbek Abdrahmanovpen kezdesti. Bul týraly egemen.kz habarlady.
Kezdesý «Egemen Qazaqstan» gazeti redaksııasynyń májilis zalynda ótti. Shara barysynda Saýytbek Abdrahmanuly oqýshylarǵa jýrnalıstıkanyń qyr-syry men elimizdegi bas gazettiń tarıhy jaıynda áńgimelep berdi.
Sóz basynda gazet basshysy: «Jýrnalıstıka – eldiń aldyna shyǵyp sóz sóıleýge, kez kelgen qubylysty ózinshe baǵalaýǵa quqyq beretin mamandyq. Bul salanyń ózgelerden basty artyqshylyǵy osy», – dedi.
Sonymen qatar oqýshylar jýrnalıstıkanyń qadir-qasıeti, negizgi fýnksııasy jáne bolashaqtaǵy róli týraly kóp jaıǵa qanyq boldy. Bul jóninde basylym basshysy: «Jýrnalıstıkanyń negizgi qadir-qasıeti – ol ómirge túrli-tústi reń beredi. Bir jazylǵan maqala ekinshi ret qaıta jazylmaıdy. Al kóptegen mamandyqta bir istiń birneshe ret qaıtalanatynyn bilemiz. Osyǵan qarap jýrnalıstıkanyń quny ózge saladan qanshalyqty joǵary ekenin kórýge bolady», – dedi.
Aqparat quraldarynyń atqaryp otyrǵan basty qyzmeti jaıynda: «Jýrnalıstıkanyń negizgi fýnksııasy – qoǵamdyq pikirge yqpal etý arqyly adamdardyń kózqarasyn qalyptastyrý. Al bolashaqta jýrnalısterge júkteletin jaýapkershilik búgingiden de aýyr bolatyny aqıqat. Bul – zaman talaby», – degen Saýytbek Abdrahmanov jas jetkinshekterge shet tilderin erkin meńgerý kerek ekenin aıtty.
Sondaı-aq, kitap jáne gazet-jýrnal oqý máselesine toqtalǵan ol «Egemen Qazaqstan» gazetiniń tarıhyn da nazardan tys qaldyrmady. «О́tken jyldyń sońynda gazetimizge 95 jyl toldy. Bul jerde Sáken Seıfýllın, Beıimbet Maılın, Júsipbek Aımaýytov syndy ulttyń ulaǵatty tuǵalary qyzmet istegen. Qazir otyrǵan redaksııamyzdy 2009 jyly Elbasymyz ózi kelip ashyp berdi. Búginde Prezıdentimizdiń tikeleı qamqorlyǵymen jaryq kórip otyrǵan gazettiń tırajy 200 myńnan asady», – dep, bas basylymnyń búgingi tynys-tirshiliginen habar berdi.
Kezdesý sońy erkin áńgimege ulasyp, oqýshylar ózderin qyzyqtyrǵan saýaldarǵa jaýap aldy. О́z kezeginde, oqýshylardy bastap kelgen «Juldyz balalar odaǵy» qoǵamdyq uıymynyń atqarýshy dırektory Janna Abylhaeva maǵynaly kezdesý úshin gazet basshysyna alǵysyn jetkizdi.
Elaman Qońyr.
Derek: egemen.kz.
Sýret: Erlan Omarov.