Qara jol qatelikti keshirmeıtini barshaǵa málim. Tún aýsa, qala kóshelerinde kólikpen qustaı zaýlaıtyn «shýmaharlerdiń» jelpinip jarysqa túskenin talaı kórdik. Jyldamdyqty shekten tys asyrýdyń saldarynan qansha adam baqılyq boldy? Oblystyq polısııa departamentiniń basshylary jol-kólik oqıǵalarynyń aldyn alý maqsatynda biraz sharany qolǵa alyp, jumys istep jatyr. Áıtse de, jol ústidegi júgensizdik azaıar emes.
Jol-kólik oqıǵalaryn azaıtý maqsatynda quzyrly organ ókilderi jaqynda taǵy bir jobany júzege asyrdy. Olar Taraz qalasynyń kóshelerine jol apaty kezinde jaramsyz kúıge túsken kólikter men mopedterdiń qańqasyn tizip qoıdy. Oblystyq polısııa departamentiniń basshylyǵy osyndaı aýyr kórinis arqyly apat sanyn azaıtýǵa bel býyp otyr. Polıseıler bul joba aldaǵy ýaqytta óz nátıjesin beretinine senimdi.
«О́ńirde kólik apatynyń sanyn azaıtý maqsatynda josparǵa saı jumys istep jatyrmyz. Bıyl úsh aıda óńirde 377 jol-kólik oqıǵasy tirkelgeni anyqtalyp otyr. Saldarynan 32 adam ómirimen qosh aıtyssa, 564 adam túrli dárejedegi dene jaraqatyn alǵan. Árıne, asyǵystyq saldarynan adamdardyń jan tapsyrǵany, dene jaraqatyn alǵany bárimizdi oılantady. Qoǵamnyń basty qundylyǵy adam ekenin eshkim qaperden shyǵarmaǵany jón. Qolǵa alynǵan naqty jumystyń nátıjesinde úsh aıda jol-kólik apatynyń sanyn – 0,3, qaza bolǵandar sanyn – 3, zardap shekken azamattar sanyn 5 paıyzǵa tómendettik. Árıne, aldyn alý sharalary aldaǵy ýaqytta da jalǵasady. Bul baǵyttaǵy jumys jyl boıy tolastamaıdy», deıdi oblystyq polısııa departamenti ákimshilik polısııa basqarmasy basshysynyń orynbasary Erjan Mananbaev.
Qala turǵyndarynyń aıtýyn-sha, polısııa departamenti iske asyryp jatqan jańa bastama kólik tizgindegen azamattarǵa oı salady. Jalpy, osy baǵytta qolǵa alynǵan is-sharalar arqyly jol apatyn azaıtýǵa múmkindik mol. О́ıtkeni quzyrly organ qyzmetkerleri shahar halqymen tyǵyz baılanysta jumys istep otyr.
«Kúre jolda tirkelgen kez kelgen jol apaty jan túrshiktiredi. Kólikterdiń qıraǵan qańqasyn bylaı da kórip júrmiz. Ár azamattyń otbasy, úıinde kútip otyrǵan balalary men baýyrlary bar ekenin júrgizýshiler umytpasa degen tilek kókeıde atoılap turady. Qalanyń ár turǵyny osyny túsinse ıgi. Kóshege qoıylǵan kólik qańqalary «jaman aıtpaı, jaqsy joq» degen sózdi eriksiz eske túsiredi. Qalaı alyp qarasaq ta, kóshedegi kórinis júrgizýshilerdiń jaýapkershiligin arttyratynyna senim mol. Eń bastysy, árbir azamat qoǵam aldyndaǵy jaýapkershilik júgin sezinse, jol apaty da azaıady. Sondyqtan da kólik júrgizýshileri barynsha jol erejelerin saqtaǵany durys», deıdi qala turǵyny Qaısar Qaıratuly.
Tas-talqany shyqqan kólikter sherýi kimdi de bolsyn oılantpaı qoımaıtyny anyq. Al polısııa qyzmetkerleri osyndaı qadamǵa barý arqyly jolda júrgen júrgizýshilerdiń jaýapkershiligin kúsheıtemiz degendi alǵa tartyp otyr.
Aksııaǵa jas jol ınspektorlary da belsendi qatysty. Mektep oqýshylary qala kóshelerine qatelikke jol bermeý, qaýipsizdikti saqtaý týraly jazylǵan arnaıy aqparattyq bannerlerdi ustap shyqqan. Osylaısha, jetkinshekter joldaǵy balalar qaýipsizdigine basa mán berý kerektigin barynsha túsindirgisi keldi.
Taraz