Jýyrda Premer-Mınıstrdiń orynbasary Berdibek Saparbaev ótkizgen selektorlyq keńeste kámeletke tolmaǵan balalardy zorlyq-zombylyqtan qorǵaý jáne olardyń quqyn saqtaý máselesi jan-jaqty sóz bolǵan edi. Sol jıynda kámelettik jasqa tolmaǵan balalardyń óz ózine qol jumsaıtyny da ashyq aıtylǵan bolatyn. Jáne sonda Premer-Mınıstrdiń orynbasary tıisti mınıstrlik ókilderine aldynda Bas prokýratýrada ótken zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysynda kámeletke tolmaǵandarǵa qatysty qylmystardyń jıilep ketýi týraly aıtylǵan jaıdan esh qorytyndy shyqpaǵanyn da jasyrmaı eskertken edi.
Endi baıqap qarasaq, Úkimet basshysy orynbasarynyń alańdaıtyndaı jóni bar eken. Sebebi, bıik minberden aıtylǵan memlekettik deńgeıdegi máseleler joǵarydan ǵana eren baqylaý bolmasa sol jartas kúıinde turyp qalatyn sekildi. О́ıtkeni, sońǵy derekterge qarasaq kámeletke tolmaǵandardyń tártip buzbaýyna, qylmys jasamaýyna jaýap beretin tıisti mekemelerdiń oń isi áli baıqalmaıdy. Máselen, Kóliktegi ishki ister departamenti aǵymdaǵy jyldyń 22-24 maýsymy aralyǵynda, ıaǵnı bar-joǵy úsh kún ǵana «Jaz» atty jedel-aldyn alý sharasyn ótkizgen edi.
Sóıtse, atalǵan shara barysynda departamenttiń qyzmet kórsetý aýmaǵy boıynsha 101 jasóspirim ustalǵan, onyń 22-si ákimshilik quqyq buzýshylyq jasaǵan, 78-si qaraýsyz qańǵyp júrgender eken. Bul neni bildiredi? Aıtylǵan syndardan esh nátıje shyqpaǵany ma? Sonan amal joq, «olardyń 12-si Kámeletke tolmaǵandardy beıimdeý ortalyǵyna jetkizildi», deıdi Ákimshilik polısııa basqarmasynyń aǵa ınspektory Gúlnar Qarsultanova. Árıne, elimizde kámelettik jasqa tolmaǵandardan da basqalar qylmystyq quqyq buzýshylyq jasap jatqany belgili. Biraq osy kámelettik jasqa tolmaǵandardy tárbıeleý isine qatysty adamdardyń jaýapkershiligi, rasynda, alańdatpaı qoımaıdy. Máselen, osy shara barysynda ata-ananyń nemese basqa da zańdy ókilderdiń balalardy tárbıeleý jónindegi mindetterin oryndamaǵan 10 azamat ákimshilik jaýapkershilikke tartylǵan. Oǵan qosa zańdy ókilderinsiz úılerinen tys jerde júrgen 21 jasóspirim ustalǵan.
Endi osyndaı kámelettik jasqa tolmaǵandar tártibin qatań qadaǵalaý boıynsha jáne «Astana kúni» merekesine oraı elimizdiń temirjol kóligi men áýejaılarynda qoǵamdyq tártip pen qaýipsizdikti qamtamasyz etý maqsatynda Kóliktegi ishki ister departamenti qyzmet ótkerýdiń kúsheıtilgen tártibine kóshpek. Áıtpese jasóspirimder jaıyn oılaıtyn jandar az sekildi. Olardyń oılanbaı qylmys jasap, taǵdyrlary tálkekke qalmas úshin aldyn alǵan abzal is qoı.
Aleksandr TASBOLATOV,
«Egemen Qazaqstan».