Keshe elordada Baılanys jáne aqparat qyzmetkerleriniń merekesi qarsańynda Qazaqstan halqy Assambleıasy jýrnalıster men sarapshylar klýbynyń keńeıtilgen otyrysy ótti. Atalǵan jıynǵa Prezıdent Ákimshiliginiń basshylyǵy, Qazaqstan halqy Assambleıasynyń músheleri, elimizdiń memlekettik organdarynyń ókilderi men respýblıkalyq jáne óńirlik BAQ jýrnalısteri, etnostyq gazetterdiń bas redaktorlary, sondaı-aq, sarapshylar, ǵylymı jáne birqatar shyǵarmashyl zııalylar qatysty.
Kezdesý barysynda «Barshaǵa arnalǵan qazirgi zamanǵy memleket» – 100 naqty qadam sheńberindegi «Ult josparyn» aqparattyq súıemeldeýdegi jýrnalıster aldynda turǵan jańa mindetter talqylanyp, QHA jyly aıasyndaǵy is-sharalardy aqparattyq qoldaýdyń qorytyndylary qaraldy.
Alǵysózdi Qazaqstan halqy Assambleıasy Tóraǵasynyń orynbasary Eraly Toǵjanov BAQ ókilderin olardyń kásibı merekesimen quttyqtaı kelip, sózin osy saladaǵy mamandarǵa qoıylatyn mindetterdi atap ótýden bastady. El birligi jolynda qolyna qalam ustaǵan qaýym qaı elde bolmasyn, memlekettik saıasatty jetkizýde, qoǵamdyq pikirdi qalyptastyrýda asa yqpaldy kúshke ıe ekenin barsha biledi. Sondyqtan da qoǵamnyń, halyqtyń sanasyna el saıasatyn, ult múddesin sińirý barysynda abzal mindetterdi atqaryp, osy oraıda ózekti dúnıelerdi jazyp júrgen jýrnalısterge rahmet, dedi.
E.Toǵjanovtyń aıtýynsha, aǵymdaǵy jarty jylda shyqqan materıaldardyń kólemi ótken bir jyldyq eseppen salystyrǵanda artyq ekendigi baıqalady. Ol osyndaı qysqa merzim ishinde toǵyz myńǵa jýyq materıaldyń jaryq kórýi kóz qýantatyndyǵyn kóldeneń tartty.
Árıne, Elbasy Nursultan Nazarbaev bıylǵy jyldy Qazaqstan halqy Assambleıasy jyly dep tikeleı jarııalaýyna baılanysty aqparat ókilderi tarapynan yntymaq pen birlikke uıysqan, dostyqtyń shynaıy kelbetin aıqyndap beretin jaǵymdy maqalalardy aıanbaı jazǵandyǵy kórinis beretindigi aıtyldy. Biri túsinse, biri túsine bermeıtin mundaı materıaldardy kóptep jarııalaýdyń qajeti qansha degen suraqqa E.Toǵjanov birlik pen yntymaqqa baǵyttalǵan taqyryptar eshqashan kóptik etpeıtinin jáne olardyń mańyzdylyǵy joıylmaıtyndyǵyn aıtý qajettigin atap ótti. Elbasynyń modelin tek qana shetelderde emes, óz elimizde de tyńǵylyqty, júıeli túrde halyqqa jetkize bilýdiń róli úlken ekendigin aıta otyryp, osy rette «Egemen Qazaqstan» respýblıkalyq gazetiniń atqaryp jatqan belsendi de tııanaqty jumysyna alǵysyn bildirdi.
«Egemen Qazaqstan» respýblıkalyq gazetinde QHA jylynyń kórinis tabýy joǵary deńgeıde bolǵandyǵyn, ondaǵy materıaldardyń mańyzdylyǵy men mazmundyq qundylyǵy bar ekendigin aıta otyryp, E.Toǵjanov atalǵan gazettiń prezıdenti Saýytbek Abdrahmanovqa sóz berdi.
Elbasy Nursultan Nazarbaev adamzat tarıhynda kemshilik sanalyp kelgen dúnıelerdi artyqshylyqqa aınaldyrdy. Báz bireýlerdiń sanasyndaǵy «kóp ulttar turatyn memleket álsiz bolady» degen uǵymyn joqqa shyǵardy. Bir emes, birneshe ult ókilderiniń bir shańyraq astynda, ortaq maqsatqa jumylyp, yntymaqta kún keshe alatynyn dáleldedi. Sebebi, ol alǵashqy kúnderden bastap-aq dostyqty tý etip ustady, dedi sózinde S.Abdrahmanov. Osyǵan baılanysty osy gazette ústimizdegi jyldyń birinshi qańtarynan beri berilip kele jatqan oqylymdy dúnıelerdiń barlyǵy da oqyrman úshin ekendigin jetkizdi.
Otyrys barysynda kóptegen laýazymdy tulǵalar men aqparat qyzmetkerleri taqyrypqa oraı jartyjyldyq qorytyndylaryn baıandap, bizdiń memleket úshin Qazaqstan halqy Assambleıasynyń orny orasan ekendigin qoǵamǵa jarııalaýdan talmaıtyndyqtaryn aıtty. Bul rette, QHA jýrnalıster men sarapshylar klýbynyń tóraǵasy Ǵadilbek Shalahmetov otyrys taqyryby boıynsha osy klýbtyń atqaratyn róli jaıynda, al Prezıdent janyndaǵy «Qoǵamdyq kelisim» RMM dırektorynyń orynbasary Ǵazız Telebaev «QHA jylyn aqparattyq súıemeldeý» boıynsha ózderiniń taraptarynan oryndalyp jatqan qyzmetteri týraly baıandady.
Is-shara aıasynda etnostyq buqaralyq aqparat quraldarynyń kórmesi uıymdastyrylyp, jıyn sońynda klýb músheleri, respýblıkalyq jáne óńirlik BAQ jýrnalısterine «Qazaqstan halqy Assambleıasyna – 20 jyl» atty mereıtoılyq medal tabys etildi.
Elmıra MÁTIBAEVA,
«Egemen Qazaqstan».
Sýretti túsirgen
Erlan OMAROV.