Astana qalasy ákimdiginiń qoldaýymen Sáken Seıfýllın murajaıy jáne Qazaqstan Jazýshylar odaǵynyń Astana fılıaly Qazaq handyǵynyń 550 jyldyq merekesine oraı «Ulytaý ulaǵaty – ult tarıhy» atty respýblıkalyq músháıra jarııalaıdy.
Músháıranyń basty maqsaty – halqymyzdyń búgingi baıtaq baqytyn jan-jaqty jarqyrata jyrlaý arqyly jas urpaqtyń júregine otanshyldyq rýhty uıalatý. Jyr báıgesiniń taqyryp aıasy meılinshe keń. Kereı men Jánibekten – han Kenege, Jırenshe sheshennen – Ilııas Esenberlınge deıingi qazaq halqynyń basynan ótken san qıly kezeńder tolǵaı bilgen talantqa, jyrlaı bilgen aqynǵa ushan-teńiz álem.
«Abylaıdyń asynda shappaǵanda, atańnyń basynda shabasyń ba?!» degen eken babalarymyz. О́z Táýelsizdigimizdi, óz tarıhymyzdy, óz Otanymyz ben óz Astanamyzdy, óz tulǵalarymyzdy ózimiz jyrlamaǵanda kim jyrlaıdy?! Qazaq handyǵynyń bes jarym ǵasyrlyq toıynda shappaǵan júırik júırik pe, tolǵanbaǵan aqyn aqyn ba?! Mine, arǵymaq-jyrdyń alamany bastaldy. Endeshe, ánsheıinde dúbir shyqsa delebesi qozatyn arqaly aqyndar, salıqaly jyr sizderden, salmaqty júlde bizderden!
Bas júlde – 1 mıllıon teńge.
Birinshi oryn – bireý.
Ekinshi oryn – ekeý.
Úshinshi oryn – úsheý.
Yntalandyrý syılyǵy – beseý.
Músháıraǵa esh jerde jaryq kórmegen poemalar, tolǵaýlar, toptama óleńder maýsym aıynyń 15-ine deıin qabyldanady.
Músháıra qorytyndysy Astana kúni qarsańynda jarııalanyp, marapattaý saltanaty ótedi.
Úmitkerler shyǵarmasyn kompıýterde terip, 5 danasyn tómendegi mekenjaıǵa jiberýi kerek nemese astanakalamger@mail.ru elektrondyq poshtaǵa joldaýǵa bolady. Avtordyń aty-jóni, meken-jaıy, baılanys telefony, elektrondyq poshtasy (bar bolsa) mindetti túrde kórsetiledi.
Indeks: 010000, Astana qalasy, Áýezov kóshesi, 20 «A» Sáken Seıfýllın murajaıy. Tel: 32-15-90, 32-84-67
Júldegerlerdiń Astanaǵa kelip-ketý shyǵynyn uıymdastyrýshy tarap moınyna almaıdy.