Qazaq ulttyq qyzdar pedagogıkalyq ýnıversıtetinde «Mektep – ýnıversıtet – naryq: bilim berýdiń jańa arhıtektýrasy» atty pedagogıkalyq ıdeıalar festıvali aıasynda respýblıkalyq BAQ ókilderine arnalǵan baspasóz týry ótti, dep habarlaıdy Egemen.kz
Is-shara barysynda jýrnalıster ýnıversıtettiń basqarma tóraǵasy-rektor Beıbitkúl Kárimovamen kezdesip, oqý ornynyń mıssııasy, strategııalyq damý baǵyttary men qazirgi tynys-tirshiligi týraly aqparat aldy.
Negizi 1944 jyly qalanǵan oqý ornynda fızıka-matematıka, til-ádebıet jáne tarıh fakýltetteri ashylyp, 100 stýdent oqýǵa qabyldanǵan bolsa, búginde respýblıkadaǵy bilim oshaqtaryn sapaly muǵalim mamandarymen qamtamasyz etip otyrǵan oqý ordasynda 12 myńnan astam stýdent bilim alyp jatyr. Ýnıversıtette bakalavrıat, magıstratýra jáne PhD doktorantýra bilim baǵdarlamalary boıynsha pedagog kadrlary daıarlanady. Oqý ornynda elimiz óńirlerimen qatar О́zbekstan, Mońǵolııa, Qytaı, Reseı, Túrikmenstan, Qyrǵyzstan jáne Tájikstan elderinen kelgen talapkerler de bilim alýda.
Rektor atap ótkendeı, qazirgi kezde Almaty qalasy ákimdigimen, sondaı-aq aldaǵy ýaqytta oblystarmen birlesken jobalar aıasynda qaı óńirde pedagog mamandarǵa suranys barysy anyqtalatyn bolady. Qazirgi kezde bul baǵytta arnaıy jobalar qolǵa alynyp jatyr.
Búginde álemniń 23 elindegi 83-ten astam ýnıversıtet jáne ǵylymı ortalyqtarymen seriktestik baılanys ornatqan oqý orny naryq suranysyna oraı zamanaýı kadrlar daıarlaý isine basty mán berip otyr. Ásirese shalǵaı aýyldar, shaǵyn keshendi mektepter, «Keleshek mektepterine» qajetti mamandardy daıarlaý isi ýnıversıtet basshylyǵynan oqý-ádistemelik keshendi zamana aǵymyna, oqýshylar talabyna, kásibı muǵalim daıarlaý baǵytyna qaraı ıkemdep, ár kez naryqqa saraptama jasap otyrýyn talap etedi. Munymen qosa erekshe qajettilikteri bar balalardy oqytýǵa, olardyń sapaly bilim alýyna oraı ınklıýzıvti bilim berý baǵdarlamasy iske asyp, osy baǵytta arnaıy mamandar daıarlanyp keledi.
Ýnıversıtettiń ǵylymı-ınnovasııalyq jáne shyǵarmashylyq áleýeti zaman talabyna saı jabdyqtalǵan. Munda molekýlalyq fızıka jáne termodınamıka zerthanasy, bıotehnologııalyq zertteýler zerthanasynyń jumysyna erekshe toqtalyp ótýge bolady. Ǵalymdardyń jetistikteri elimizben qatar halyqaralyq keńistikke keńinen tanylǵan. Fızıka, matematıka jáne sıfrlyq tehnologııalar ınstıtýtynda ashylǵan fızıka zerthanalary zamanaýı PHYWE jáne PASCO quraldarymen jabdyqtalǵan. Bul zerthanalar bolashaqtyń mamandaryn daıarlaýǵa mol múmkindik beredi.
Oqý ornynda jalpy bilim beretin mektepterge shahmat páni muǵalimderin daıarlaıtyn «KazChessLab» bilim berý alańy, sonymen qatar «QyzPU» medıastýdııasy, baspasóz qyzmeti, jańartylǵan horeografııa zaly jáne Seráli Qanıev atyndaǵy kitaphana jumys isteıdi.