Astanadaǵy Kreatıvti ındýstrııalardy damytý qorynyń alańynda Aqmola oblysy kreatorlarynyń jármeńkesi ótti. Is-sharanyń ashylýyna Premer-mınıstrdiń orynbasary – Mádenıet jáne aqparat mınıstri Aıda Balaeva men Aqmola oblysynyń ákimi Marat Ahmetjanov qatysty.
Jármeńke aıasynda eki kún boıy elorda turǵyndary men qonaqtary Aqmola óńiri sheberleriniń qolynan shyqqan buıymdarmen, avtorlyq toptamalarmen jáne jergilikti brend ónimdermen jaqyn tanysty. Ásirese is-sharada kreatıvti ekonomıkanyń zamanaýı baǵyttaryna erekshe nazar aýdaryldy. Arnaıy aımaqta IT, digital jáne medıa jobalar, sondaı-aq robottehnıka, oıyn ázirleý, jasandy ıntellekt, týrızm jáne kıbersport salalaryndaǵy jańa startaptar tanystyryldy.
Aqmola oblysy ákiminiń orynbasary Dosulan Aıtbaevtyń aıtýynsha, óńirde kreatıvti ındýstrııa salasy jaqsy damyp keledi. Aımaqta zergerlik óner, ulttyq mýzykalyq aspaptar jasaý, aǵash óńdeý, dızaın, sán ındýstrııasy, qolóner, sondaı-aq IT jáne digital jobalary qarqyn alǵan.
«Búginde oblysta 47 baǵytta 2 myńnan asa kreator jumys isteıdi. Biz búgingi is-sharaǵa solardyń ónimderin jınaqtap alyp keldik. Barlyq aımaq úsh bólikke bólingen. birinshisi – ulttyq muralardy dáripteý, ekinshisi – shabyt álemi, úshinshisi – bolashaq ekonomıkasy», dedi ol.
Jármeńkede oblys kreatorlarynyń ekspozısııasy birneshe taqyryptyq zalǵa bólingen. Olardyń árqaısysy óńirdiń mádenı-kreatıvtik bolmysynyń jeke álemin kórsetedi. Máselen, birinshi zal – zergerlik ónerge arnaldy. Munda aımaqtaǵy zergerlerdiń kúmis jáne tabıǵı tastardan jasalǵan buıymdary qoıyldy. Bul buıymdar qonaqtardy aıshyqty órnegimen birden baýrap aldy. Al ekinshi zalda – aǵash, bylǵary jáne súıek ónerine arnalǵan birtutas ekspozısııa jasalǵan. Onda ulttyq qolóner men zamanaýı kórkemdik baǵyt ádemi úılesim tapqan. Bul zalda elimizdegi ulttyq aǵash buıymdary fabrıkasy — «BLEK» JShS ónimderimen birge aımaq sheberleriniń týyndylary usynyldy.
Ásirese elordalyqtardy ulttyq mýzykalyq aspaptar álemi erekshe tánti etti. Osy kórmege kórkem Kókshe baýraıyn syrly sazǵa bólegen Aqan seri, Birjan sal, Úkili Ybyraı sekildi aıtýly tulǵalardyń ustaǵan dombyralarynyń kóshirmesi ákelingen. Sondaı-aq kórnekti jazýshy Sáken Júnisovtiń dombyrasy da tórden oryn alǵan. Kórmeniń erekshe eksponaty – «dombyra-qobyz» mýzykalyq aspaby. Onyń avtory – Kókeı Mellatuly.
Tórtinshi zaldyń jóni tipti bólek. Bul zamanaýı oı men shyǵarmashylyq energııa toǵysqan «Event» aımaǵy dep atalǵan. Aımaqtyń ókilderi qonaqtardy daýylpaz aqyn Sáken Seıfýllınniń «Arqanyń kerbez sulý Kókshetaýy» ánimen qarsy aldy. Ony «Tumar» neo-etno ansambliniń súıemeldeýimen ánshi Jalǵas Sultanov oryndady. Munda Aqmola oblysynda júzege asqan «Jeti qazyna» ıntellektýaldy oıyny da tanystyryldy. Sondaı-aq jastar jasaǵan jańa startaptar da kórsetildi. «Aqmola Hub» ókili Ásel Abdrahmanova «IT, digital, media» jobasyn usyndy. Bul joba jurtshylyqty sony jańalyǵymen qyzyqtyrdy. Sonymen birge bul bólimde jastardyń shyǵarmashylyq áleýetin kórsetetin jobalar jeterlik eken. «Jańa beles» horeografııalyq ansambli «Qaraqshy» treginiń súıemeldeýimen zamanaýı trend bıdi oryndady. Al Dımash Aqaıdar álemdik deńgeıdegi hıtterdiń avtory Erjan Erdenovti tanystyryp, óńirden shyqqan jas talanttardyń jetistikterin baıandady.
Máselen, jas rejısser Juldyzaı Amangeldıevanyń aıtýynsha, oblys kóleminde kınoındýstrııa salasy júıeli jolǵa qoıylǵan.
«Biz oblys ákimdiginiń qoldaýymen 18 fılm túsirdik. Bul týyndylardyń janry ártúrli. Onyń ishinde tarıhı, dramalyq fılmderde bar. Mysaly, Býrabaıdyń ásem tabıǵaty týraly «Jańa jyl» degen serıal túsirdik. Týyndyny kórermen jyly qabyldady. Qazir trıller janrynda kıno túsirip jatyrmyz. Árbir jobanyń maqsaty – ulttyq qundylyqtardy dáripteý», deıdi ol.
Shynynda, jármeńkedegi árbir aımaq ulttyq qundylyqtarmen aıshyqtalǵan. Aıtalyq, «Syrmaq» sheberler aımaǵy qonaqtarǵa «On alty qyz» halyq ansambliniń syrmaqpen bı perfomansyn usyndy. Munda «Bir aýyl – bir ónim» baıqaýynyń jeńimpazy, Qosshy qalasynyń sheberi Álııa Qalıasqarova sheberlik sabaǵyn ótkizip, kıiz óńdeý men syrmaq jasaý óneriniń qyr-syrymen bólisti. Al sheberlik jáne demonstrasııa aımaǵynda kelýshiler qysh ónerimen jaqyn tanysyp qana qoımaı, olardyń jumysyn kózimen kórdi. Munda qysh óneriniń ókilderi – Anar Satybaeva (Kókshetaý qalasy) men Aqjol Dáýletkerimuly (Qosshy qalasy) sheberlik sabaǵyn ótkizdi. Jetinshi zal – dızaın zalyna arnalǵan. Munda ulttyq jáne zamanaýı dızaın baǵytynda tabysty eńbek etip júrgen sheberler men shyǵarmashylyq ujymdardyń, al segizinshi zalda – Aqmola óńirinen shyqqan qylqalam sheberleriniń týyndylary qoıylǵan. Búginde aımaqta 80-ge jýyq sýretshi bar. Onyń 30-dan astamy Sýretshiler odaǵynyń múshesi.
Sondaı-aq joba aıasynda jármeńkege qoıylǵan ónimderdi satyp alýǵa da múmkindik boldy. Jármeńkeniń alǵashqy kúninde kreatorlar jalpy somasy 5 mıllıon teńgeniń ónimin satqan.
Aqmola oblysynyń kreatıvti jármeńkesi dástúr men jańashyldyqty ushtastyrǵan erekshe mádenı alańǵa aınaldy. Kórme óńirdiń talantty tulǵalary men jas kásipkerleriniń shyǵarmashylyq jetistikterin tanystyryp, kreatıvti ındýstrııanyń áleýetin tolyq kórsetti.