Qaraǵandy medısınalyq ýnıversıtetiniń bazasynda Táýelsizdiktiń 35 jyldyǵyna arnalǵan Qazaqstan neırohırýrgteriniń VI kongresi bolyp ótti. Kongress – neırohırýrgııa salasyndaǵy jetekshi otandyq mamandardy, Ulttyq neırohırýrgııa ortalyǵynyń ókilderin, óńirler dárigerlerin, sondaı-aq jas mamandardy biriktiretin eń iri kásibı alańdardyń biri.
Ashylý saltanatyna memleket jáne qoǵam qaıratkeri Oralbaı Ábdikárimov, qoǵam qaıratkeri Jaqsylyq Túnǵatarov, Qaraǵandy oblysy ákiminiń orynbasary Oraz Táýirbekov, medısınalyq qoǵamdastyq pen ǵylymı uıymdardyń ókilderi qatysty. Qatysýshylar aldynda qazaq neırohırýrgter qaýymdastyǵynyń prezıdenti, «Ulttyq neırohırýrgııa ortalyǵy» AQ Basqarma Tóraǵasy, akademık Serik Aqsholaqov quttyqtaý sóz sóıledi. Ol óz sózinde el Táýelsizdiginiń 35 jyldyǵy qarsańynda Kongress ótkizý erekshe sımvoldyq mánge ıe ekenin, egemen eldiń damý jyldaryndaǵy otandyq neırohırýrgııanyń jetistikterin atap ótti.
«Táýelsizdiktiń 35 jyly – bul tek memlekettiń ǵana emes, sonymen birge otandyq neırohırýrgııanyń qalyptasýy men qarqyndy damý tarıhy. Osy ýaqyt ishinde sala mamandandyrylǵan qyzmet qurý kezeńinen joǵary tehnologııalyq medısınalyq kómekti engizip, halyqaralyq deńgeıge shyǵýǵa deıingi úlken joldan ótti. Osy jetistikterdiń jarqyn kórinisi – osydan 18 jyl buryn Astanada ashylǵan Ulttyq neırohırýrgııa ortalyǵy. Bul ortalyq táýelsiz Qazaqstannyń joǵary tehnologııalyq neırohırýrgııalyq kómekti damytýǵa baǵyttalǵan mańyzdy jobalarynyń biri retinde quryldy. Búginde ol joǵary tehnologııalar, ǵylym jáne klınıkalyq tájirıbe toǵysqan, bilikti mamandar daıarlaıtyn jáne álemdik neırohırýrgııalyq qaýymdastyqqa keńinen tanylǵan jetekshi medısınalyq mekemege aınaldy.
Memleket tarapynan úlken qoldaý kórsetildi. Densaýlyq saqtaý men ǵylym salasyna salynǵan júıeli ınvestısııalardyń arqasynda munda Ortalyq Azııadaǵy jalǵyz «Gamma-pyshaq» radıohırýrgııalyq kesheni iske qosyldy. Bul – álemdik neırohırýrgııadaǵy eń ozyq tehnologııalardyń biri. Memlekettik qoldaýdyń nátıjesinde otandyq pasıentter úshin «Gamma-pyshaqpen» em alý tegin júzege asyrylady. Qondyrǵy jumys isteı bastaǵannan beri onyń kómegimen 2500-den astam naýqasqa operasııa sátti jasaldy.
Ulttyq neırohırýrgııa ortalyǵy medısınalyq týrızmniń mańyzdy ortalyqtarynyń birine aınaldyrdy. Búginde ortalyqqa Qazaqstannyń túkpir-túkpirinen ǵana emes, shetelderden de pasıentter kelip, joǵary mamandandyrylǵan kómek alýda.
Otandyq neırohırýrgııa mektebiniń qalyptasyp, halyqaralyq deńgeıde moıyndalǵanynyń taǵy bir dáleli – elimizde ár jyldary neırohırýrgııa salasyndaǵy eń iri halyqaralyq forýmdardyn ótkizý. Neırohırýrgtardyń H Azııalyq kongresi, Neırohırýrgııalyq qoǵamdardyń Búkilálemdik Federasııasynyń (WFNS) bilim berý kýrstary, Eýropalyq neırohırýrgııalyq qoǵamdar Federasııasynyń (EANS) bilim berý kýrstary, sondaı-aq Ýolter E. Dendı atyndaǵy Amerıkalyq neırohırýrgııa qaýymdastyǵynyń X Dúnıejúzilik kongresi joǵary deńgeıde uıymdastyryldy.
Kongress – qaýymdastyqtyń mańyzdy alańy. Munda biz jetistikterimizben qatar, áli de sheshimin tabýy tıis máselelerdi ashyq talqylaımyz. Kúrdeli klınıkalyq jaǵdaılarmen tájirıbe almasyp, elimizdiń ár óńirindegi neırohırýrgııalyq qyzmettiń damýyn saralap, pikir bólisemiz», dedi S.Aqsholaqov.
Forým jumysyna elimizdiń barlyq óńirlerinen 200-ge jýyq delegat qatysty. Eki kún ishinde Kongreske qatysýshylar zamanaýı neırohırýrgııanyń eń ózekti máselelerine arnalǵan 53-ten astam ǵylymı baıandama jasady. Innovasııalyq neırohırýrgııalyq tásilder, júıke júıesiniń aýrýlaryn dıagnostıkalaý men emdeýde joǵary tehnologııalardy qoldaný, kúrdeli tamyrly, onkologııalyq patologııalardy emdeý, eresekter men balalardaǵy epılepsııa, sondaı-aq fýnksıonaldy jáne balalar neırohırýrgııasynyń jańa baǵyttary týraly jan-jaqty sóz boldy.
Ǵylymı baǵdarlamaǵa plenarlyq, seksııalyq otyrystar, kásibı pikirtalastar, sheberlik sabaqtary, sımýlıasııalyq trenıngter, praktıkalyq dárister kirdi. Mamandar kúrdeli klınıkalyq jaǵdaılardy júrgizý jóninde tájirıbe almasyp, elimizdiń neırohırýrgııalyq qyzmetin odan ári damytý keleshegin talqylady. Kongress aıasynda mamandardy qoldaý maqsatynda jas ǵalymdar baıqaýy ótti, onyń barysynda rezıdentter men jas neırohırýrg dárigerlerdiń aýyzsha baıandamalary usynyldy. Baıqaý qorytyndysynda akademık Serik Aqsholaqov syılyǵynyń eki jeńimpazy anyqtaldy. Bul marapat jyl saıyn S.J. Asfendııarov atyndaǵy Qazaq ulttyq medısına ýnıversıteti men Ulttyq neırohırýrgııa ortalyǵynyń oqý, tájirıbelik jáne ǵylymı qyzmette erekshe jetistik kórsetken eki rezıdentine beriledi.
Forým barysynda kásibı qoǵamdastyqtyń jetekshi ókilderiniń eńbegi atap ótildi. Neırohırýrgııalyq qyzmetti damytýǵa qosqan eleýli úlesi úshin elimizdiń túrli óńirlerinen 18 neırohırýrg marapattaldy.
Táýelsizdik jyldarynda elimizde zamanaýı neırohırýrgııalyq qyzmet, mamandandyrylǵan ortalyqtar quryldy, dıagnostıka men emdeýdiń ondaǵan joǵary tehnologııalyq ádisteri engizildi, jergilikti mamandar halyqaralyq deńgeıde tanyldy. Búginde otandyq neırohırýrgter álemdik deńgeıdegi kúrdeli operasııalardy sátti oryndap, halyqaralyq ǵylymı jobalarǵa qatysyp, elimizdiń atynan álemniń jetekshi kásibı alańdarynda qabilet tanytyp júr.
Jıyndy qorytyndylaǵan qatysýshylar ǵylymı yntymaqtastyqty odan ári damytý, ınnovasııalyq tehnologııalardy engizýdi keńeıtý, mamandardyń jańa býynyn daıarlaý qajettigin atap ótti. Sarapshylardyń pikirinshe, mundaı is-sharalar medısınalyq kómektiń sapasyn arttyrýǵa, kásibı baılanystardy nyǵaıtýǵa, neırohırýrgııany odan ári damytýǵa yqpal etedi.