Jaqynda otandyq ekrandy Moınaq GES-i jaıynda túsirilgen otbasylyq jańa kınolenta tolyqtyrady dep kútilýde.
«Qazaqstan» respýblıkalyq teleradıokorporasııasynyń tapsyrysy boıynsha «Astanatelefılm» kınostýdııasy «Jaryq» hıkaıasyn túsirýdi aıaqtady. Fılm kóńildi otbasylyq saga bolyp tabylady. Qyzyq sıýjetti hıkaıa keıipkerleri bir-birine ǵashyq bolyp, aıaq asty ajyrasady, jaqyndaryn taýyp, máre-sáre kúı keshedi. Al endi birde bir-birine izdeý salyp jatady, olardyń túrli tosqaýyldarmen betpe-bet kelýlerine týra keledi. Oqıǵa jelisi negizinen «joǵary kerneý aımaǵynda» – biregeı Moınaq GES-i aınalasynda órbıdi.
«Siz gıdroelektrostansııada bolyp kórdińiz be? Mine, kúsh qaıda jatyr! Mine, minez qaıda!», – túsirilim barysy týraly oılaryn rejısser Baqtııar Seıitqazıev osylaı sıpattaıdy. – Hıkaıa sıýjetine arnalǵan taǵy bir keremet syılyq – Moınaq GES-i ornalasqan jer: Sharyn ózeni jáne Sharyn shatqaldary Qazaqstannyń injý-marjandary bolyp tabylady. Bul óńirdiń tarıhyna 12 mıllıonǵa jýyq jyl boldy emes pe! Osy jerlerdiń tamasha tabıǵaty men shynaıy túsirilimder meni sýretshi retinde qatty tamsandyrǵany ras».
Drama jáne melodrama janrynda kıno túsiretin Qyrǵyzstannyń rejısseri Baqtııar Seıitqazıev munda qaıdan júr degen suraqtyń qoıylýy zańdy. Kásibı salada ájeptáýir tabysqa qol jetkizgen rejısser ónerdegi jolyn endi bastap kele jatqan jas maman emes. Onyń qorynda Qazaqstan kórermenderiniń sheksiz qyzyǵýshylyǵyn týdyryp úlgergen hıkaıalar, qysqametrajdy lentalar bar. Sol sebepti biz úshin hıkaıat avtory sonshalyq kezdeısoq jan dep aıta almaımyz. «Jaryq» kórkem telehıkaıasynyń ázirleýshileri bul serıal kórermenderdiń kóńilinen shyǵatynyna senimdi. Telehıkaıa «Qazaqstan» telearnasynyń efıri arqyly 31 tamyzdan bastap kórermenmen qaýyshpaq. Aıta ketý kerek, túrli áreketterden turatyn 24 epızodtyń kórermenderdi tushymdy oqıǵalarymen qyzyqtyryp áketerine kúmánimiz joq. Sonymen birge, «Qazaqstan» RTRK aldaǵy maýsymda aýdıtorııany tańdandyratyn munan da basqa kóptegen hıkaıalar men ǵajap jobalardy ázirleý ústinde.
Raýan ESQALI.