Shyǵys óńiri marjandarynyń biri – Alakól. Shıpaly sý sharapatynyń dańqy jyl sanap artyp keledi. Sáıkesinshe, kól jaǵalaýyndaǵy ınfraqurylym da jaqsarǵanyna kýá bolyp júrmiz. Jaqynda Úrjar aýdanynyń 75 ardageri Alakól jaǵalaýyndaǵy «Úrjaraıym» demalys lagerinde tegin demaldy. Byltyr atalǵan demalys úıinde 50 qarııa demalǵan bolatyn. Keler jyly demalýshy qarttar qataryn bıylǵydan da kóbeıtý kózdelip otyr. «Úlkenge – qurmet, kishige – izet» atty ardagerlerdiń basqosýy men demalysyna Úrjar aýdanynyń ákimi Serik Zaınýldın uıytqy boldy. Aýdan basshysy atalǵan sharanyń ashylýynda ardagerlerge memleket tarapynan zor kóńil bólinetinin, Alakól jaǵalaýyndaǵy demalys sonyń bir aıǵaǵy ekenin atap ótti. Aýdannyń 27 aýyldyq okrýginen kelgen ardagerler qatarynda uzaq jyldar boıy týǵan eli men jeriniń damýyna úles qosqan qarttar, soǵys jáne eńbek ardagerleri, «Altyn alqa» men «Kúmis alqa» ıegerleri bar.
Bir aptaǵa sozylǵan demalys maýsymynda jyljymaly medısınalyq keshen qyzmet kórsetip, ardagerler dárigerlik tegin tekserýden ótti. Sondaı-aq, aýyl kitaphanalarynyń qyzmetkerleri qarııalardy ádebı kitaptarmen qamtamasyz etse, aýdandyq sport bólimi ardagerler arasynda shahmat, doıby jáne basqa da sport túrlerinen jarystar uıymdastyrdy. Al aýdan ónerpazdary kúndelikti merekelik konsert usyndy.
Atalǵan sharada oblystyq ardagerler keńesiniń tóraǵasy Vasılıı Ahaev Uly Otan soǵysynan keıingi el ekonomıkasyn ońaltýǵa aıtarlyqtaı úles qosqan tyl jáne eńbek ardagerleriniń qoǵamdaǵy orny zor ekenin, búginde ardagerlerge memleket tarapynan áleýmettik jeńildikter, túrli shıpajaılarǵa densaýlyqtaryn túzetýge joldamalar berilip jatqanyn jetkizdi.
– Bul – óskeleń urpaq úshin taǵylymy mol shara. О́ńirimizdiń ardagerleri bas qosyp, jigerli jastyq shaqtaryn eske alysyp, arqa-jarqa bolyp jatyr. Taıaýda Astanada ótken semınar-keńeske qatystym. Jıynda jergilikti atqarýshy organdar men ardagerler uıymdarynyń ózara is-qımylyn óristetý jóninde naqty tapsyrmalar júkteldi. Búgin osy sharanyń is júzine asyrylǵanyna kýá bolyp otyrmyz, – dedi Vasılıı Ivanovıch.
«Úrjaraıym» demalys kesheninde bir-birimen qaýqyldasyp, ázildesip, arqa-jarqa otyrǵan qarııalardy sózge tarttyq. Aýdandyq ardagerler keńesiniń tóraǵasy Nurlanbek Sandybaev, Aqshoqy aýyldyq aqsaqaldar keńesiniń tóraǵasy Nııazhan Jumadilov búginde Úrjardyń úr mekenge aınalyp, gúldenip, kórkeıip kele jatqanyn atap ótse, Qarabulaq aýylynyń aqsaqaldary Mahadı Rahımov, Ábilhamıt Ysqaqov uzaq jylǵy eńbekti eskerip, aqysyz-pulsyz demalys uıymdastyrǵan aýdan basshylyǵyna alǵystary sheksiz ekenin jetkizdi. Naýaly aýylynyń turǵyny Tileýhan Orazımanova 10 bala ósirip, tárbıelegen «Ardaqty ana», «Altyn alqa» ıegeri eken. Elý jyl boıy mal sharýashylyǵynda eńbek etken áje 25 nemere-shóbere súıip otyrǵanyn, el aman, jurt tynysh bolsa, janǵa baraqat ta bolatynyn aıtty.
Dýman ANASh,
«Egemen Qazaqstan».
Shyǵys Qazaqstan oblysy,
Úrjar aýdany.