Búginginiń stýdenti sabaqtan tys nemen aınalysady? Bos ýaqytyn qalaı ótkizedi? Jalpy, olardy ne qyzyqtyrady? Tehnologııańyz kóz ilespes jyldamdyqpen damyp, áleýmettiń ómirine áleýmettik jeliler aralasqan myna zamanda mundaı suraqtardy qoıýdyń ózi ábestikteı kóriner. «VKontaktede» án tyńdap, «Feısbýkte» pikirtalas uıymdastyryp, «Tvıtterde» ár nárseni túrtkilep, «Instagramda» sýretterimen bólisip otyratyn stýdentter jetkilikti. Olardyń bos ýaqyty osylaı ótip jatqany da jasyryn emes. Al osydan paıda bar ma? Bar shyǵar. Biraq az. Endi jastardyń boıyna jóni túzý, ulttyq bolmystaǵy tálim-tárbıe berip, adamgershilik qasıetterge qalaı baýlýǵa bolady? Ol úshin ne isteý kerek?
Jastar tárbıesine qatysty san-qıly suraqtyń jaýabyn Qyzylordadaǵy «Bolashaq» ýnıversıteti taýyp otyr. Asyra aıtqandyq emes, bul. Ýnıversıtettiń ǵylymı jetekshisi Baqbergen Dosmambetov osydan bir jyl buryn oqý ornynan stýdenttik teatr ashty. Maqsat – jastardy ónerge tárbıeleý. О́ner degenińiz tárbıeniń tóresi emes pe?! Solaısha, stýdentter trýppasy jasaqtaldy. Eń birinshi qoıylymyna Israıyl Saparbaıdyń «Aýyldan kelgen arý» pesasyn tańdap alypty. Tusaýkeserdiń aldynda aqynmen «Mártebeli meıman» atty jobanyń sheńberinde kezdesý ótkizdi. Oǵan eń alǵash aqyn rólin somdaǵan Baıǵalı Esenálıev te qatysty. Qysqasy, ádemi bir rýhanı kesh boldy. Stýdentter teatrynyń tuńǵysh premerasy da keremet ótti. Jastar zaldan zor ásermen shyqty.
Odan keıin Lıdııa Egemberdıevanyń «Qaltaly kúıeý, qaıdasyń?» atty pesasyn sahnalady. Bul da búgingi ómirdi somdaıtyn, jastarǵa oı salatyn, keri ádetterden aýlaq júrýge shaqyratyn, tálim-tárbıesi zor qoıylym edi. Jastar sol údeden shyqty. Al teatrdyń úshinshi qoıylymy retinde Jumagúl Soltıevanyń «Adamdy shaıtan azǵyrsa...» atty mıstıkalyq spektakli tańdaldy. Bir jylda úsh birdeı spektakl qoıý degenińiz – úlken jetistik. Onyń ústine Jumagúl Soltıevanyń mıstıkalyq baǵytta jazylǵan pesasyn sahnalaýdyń ózi erlik. О́ıtkeni, bul janrǵa kásibı teatrlardyń ózi aıaǵyn ańdap basyp barady.
«Bolashaqtyń» jastary «Adamdy shaıtan azǵyrsa...» atty qoıylymymen Pavlodarda ótken stýdenttik teatr ujymdarynyń halyqaralyq festıvaline bardy. Qazaqstan halqy Assambleıasynyń 20 jyldyǵy aıasynda ótken festıvalǵa Qazaqstan, Reseı, Ýkraına sekildi elderden 11 joǵary oqý oryndarynyń ujymdary qatysty. Osyndaı alaman jarysta qurylǵanyna bir jyl endi bolǵan, eshqandaı akterlik bilimi joq «Bolashaq» ýnıversıtetiniń stýdentteri ekinshi oryndy jeńip aldy. Azǵantaı ǵana ýaqyttyń ishinde osyndaı jetistikke jetken stýdentterdiń talaby zor. Teatrdyń rejısserleri, Nartaı Bekejanov atyndaǵy oblystyq drama teatrynyń ártisteri Qanat Arhabaev pen Ásel Baımuhanova festıvaldan zor áser alyp qaıtqandaryn aıtady. Al stýdentter teatrynyń ártisteri úlken tájirıbe jınap, qanattanyp, keler joly bas júldemen oralýǵa ýáde etip otyr. Bul tarapta ýnıversıtet basshylyǵy da jan-jaqty qoldaý kórsetetinderin málim etti. «Aldaǵy ýaqytta stýdentterimizdi tek Qazaqstannyń sheńberindegi ǵana emes, shetelderde ótetin halyqaralyq festıvaldarǵa de jiberemiz», – deıdi ýnıversıtet rektory Ǵalymjan Kalenov.
Qazir Qazaqstanda jekemenshik joǵary oqý oryndary kóp. Onda qanshama jas bilim alyp jatyr. «Bolashaq» ýnıversıtetiniń myna bastamasy solarǵa úlgi bolsa eken deımiz. Stýdentterin belgili bir mamandyq boıynsha oqytyp qoımaı, ónerge tárbıelep, boılaryna adamgershilik, ıba, ıman, ınabattylyq qasıetterdi sińirse degen tilek bar.
Erjan BAITILES, «Egemen Qazaqstan».
Qyzylorda oblysy.