Elimizdiń Ulttyq banki men Úkimet aǵymdaǵy jyldyń 20 tamyzynan bastap, ınflıasııalyq targetteý rejimine, valıýtalyq dálizdi alyp tastaýǵa jáne aıyrbas baǵamyn erkindikke jiberýge kóshýge negizdelgen jańa aqsha-nesıe saıasatyn júzege asyrýǵa kirisý jóninde sheshim qabyldaǵan bolatyn. Bul rette osy másele elimizdegi bıznes ókilderi tarapynan qoldaý tapty.
Bul jóninde Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda «Qazavtobıznes» qaýymdastyǵynyń prezıdenti Andreı Lavrentev málimdedi. Onyń aıtýyna qaraǵanda, teńgeniń erkin baǵamy bıznes salasynda aıtarlyqtaı aýqymdy másele bola qoımaıdy. Tipti, osynyń arqasynda eksport kólemin ulǵaıtýǵa mol múmkindik týady. Ulttyq bank pen Úkimettiń osy málimdemesinen keıin 60-qa jýyq kompanııa basshylary men aksıonerlerdiń qatysýymen Elbasy ekonomıkalyq saıasattyń aldaǵy sharalary týraly keńes ótkizgen bolatyn. Atalǵan jıynda Memleket basshysy teńgeniń erkin aınalymy jóninde shaǵyn jáne orta bıznes eksportshylarynyń pikirin tyńdady, deı otyryp qaýymdastyq prezıdenti atalǵan sheshimniń oń nátıje beretindigine senim bildirdi.
Sonymen qatar, aldaǵy ýaqytta elimizde avtokólik baǵasynyń qymbattaý qaýpi joq ekendigin jetkizdi. Biz barlyq dıstrıbıýtorlar men dılerlerdi, sondaı-aq, barsha óndirýshilerden boljalynǵan baǵanyń artý múmkindigine qatysty suraqtar qoıyp, monıtorıng jasap otyramyz. Sol sebepti, oqystan qymbattaý máselesi týyndamaıtyny aıdan anyq, dedi ol. Sondaı-aq, Qazaqstan aýmaǵynda satylymǵa shyqqan avtokólikterdiń baǵasy belgilenip qoıǵandyǵyn tilge tıek ete otyryp, kóptegen kompanııalar valıýtalyq dálizdi 200 teńge shamasynda ustap, osy rette satý jumystary júrip jatqandyǵyn atap ótti. Al Sımas, Agromashholdıng, SaryarkaAvtoProm sekildi kompanııalardyń naqty baǵalardy ornatýyna oraı aldaǵy ýaqytta osyǵan qatysty túıtkilder týyndamaıtynyn kóldeneń tartty. Degenmen, birqatar kompanııalar maýsymdyq jeńildikterdi alyp tastaǵandyǵyn jasyrmady.
Sonymen qatar, teńgeniń erkin baǵamyna baılanysty avtokólik kompanııalary satý barysyn toqtatyp qoıǵany jónindegi aqparattyń shyndyqqa saı emestigin aıta otyryp, olardyń ádettegideı óz jumystaryn jalǵastyrýda ekendigin jetkizdi. Bizge EDB arqyly kredıtti damytý máselesine oraı 15 mlrd. teńge kóleminde qarjy bólindi, bul elimizdegi memlekettik baǵdarlama aıasynda júzege asyp otyr, degen A.Lavrentev monıtorıngtiń arqasynda kúrt qymbattaýdyń bolmaıtyndyǵyn taǵy da atap ótti. Jıyn barysynda BAQ ókilderiniń saýalyna jaýap bergen qaýymdastyq prezıdenti jyl sońyna deıin avtokólikterdiń baǵasynyń artý kólemi 5-6 paıyzdan aspaıtyndyǵyn atap ótti. Jáne de bizdiń memlekettiń birtutas ekonomıkalyq keńistikte bolǵandyqtan baǵalardy arttyrýdyń elimizge tıimsiz ekendigin naqtylady.
Elmıra MÁTIBAEVA,
«Egemen Qazaqstan».