Keshe Memleket basshysy Nursultan Nazarbaev TMD jáne ShYU elderi prokýratýralary basshylarymen kezdesti, dep habarlady Prezıdenttiń baspasóz qyzmeti.
Prokýratýra basshylary Astanaǵa Shanhaı yntymaqtastyq uıymyna múshe memleketter bas prokýrorlarynyń 13-otyrysyna jáne Táýelsiz Memleketter Dostastyǵyna múshe memleketter bas prokýrorlary úılestirý keńesiniń 25-otyrysyna qatysý úshin keldi.
Kezdesýde ShYU jáne TMD aıasynda zańdylyqty, qaýipsizdikti jáne óńirdegi turaqtylyqty saqtaýdyń mańyzdy máseleleri talqylandy. Memleket basshysy TMD elderi prokýratýralarynyń ózara is-qımylyn kúsheıtýdiń qajettigin atap aıtty.
Sizder osy formatta 20 jylǵa jýyq ýaqyt boıy kezdesýler ótkizip kelesizder, al 15 jyl buryn TMD-nyń halyqaralyq organy mártebesine ıe boldyńyzdar. Árbir otyrys arqyly qarym-qatynasty nyǵaıta tústińizder. Sonymen qatar, 2001 jyldan beri Shanhaı yntymaqtastyq uıymy jumys isteıdi, ol halyqaralyq arenada eleýli kúshke aınaldy. Sońǵy otyrysta uıymǵa jańa músheler qabyldaý jóninde sheshim qabyldandy, – dedi Nursultan Nazarbaev.
Bul oraıda Qazaqstan Prezıdenti terrorızmmen jáne ekstremızmmen, sondaı-aq, transulttyq qylmystyń ózge de túrlerimen kúres máseleleri boıynsha birlesken tıimdi qadamdar jasaýdyń mańyzdylyǵyna toqtalyp, bul suhbat prokýrorlardyń ózara is-qımylyn jańa deńgeıge kóterýge múmkindik beretinin aıtty. Memleket basshysy osyndaı kezdesýler zań ústemdigin jáne ShYU, TMD elderi aýmaǵynda qylmysqa qarsy birlesken kúresti kúsheıtýge septigin tıgizedi dep úmittenetinin jetkizdi.
Kezdesý barysynda Qazaqstan Respýblıkasynyń Bas prokýrory A.Daýylbaev Memleket basshysyna uıymǵa baqylaýshy elder – Úndistan, Aýǵanstan jáne Belarýs vedomstvolary basshylarynyń qatysýymen ótken Shanhaı yntymaqtastyǵy uıymyna múshe memleketter bas prokýrorlary otyrysynyń nátıjeleri týraly baıandady.
Sýretterdi túsirgender
S.BONDARENKO, B.OTARBAEV