Qasymyzda jasaǵan jaqsylyqtarymen maqtanbaıtyn meıirimdi, qarapaıym ári izgi jandardyń júrgenin kúndelikti tirshilik aǵymymen baıqamaı da jatamyz. Degenmen, ondaı adamdar bar. Turmysy tómen otbasylaryn qamqorlyǵyna alyp, jaǵdaılarynan shyǵarýǵa tyrysatyn, kómek surap keletinderdiń qolyn qaqpaıtyn bul kásipkerdiń iskerligi men uıymdastyrýshylyq qabileti óte joǵary. Onyń kásibı maıtalman maman ekendigin azǵana ýaqyt ishinde zaýyt ashyp, ony órlete órge júzgizgendiginen-aq baıqaısyz. Kásipkerlikke beıim minezi tez arada sheshim qabyldap, jumysty qysqa ýaqytta ári sapaly oryndaýǵa sebepker bolyp júr.
Ýaqyt kóshinen qalmaý “Ibraev jáne K” óndiristik kooperatıviniń tóraǵasy Ǵabbas Ibraevtyń kásipker retindegi jetistikteriniń biri. Ol basshylyq jasaıtyn “Ibraev jáne K” óndiristik kooperatıvi 2000 jyly qurylǵan. Alǵash ret jumysyn bastaǵanda jóndeý sehtaryn jalǵa alǵan bolatyn. Sehtardyń aty bar da zaty joq. Ishindegi qúrylys jumysta-ryn júrgizip, joǵarǵy tehnologııalarmen jaraqtandyrý, kásiporynǵa isker mamandar tańdaý alǵashqy batyl qadam boldy. Jańadan ashylǵan zaýytqa jan-jaqtan bilgir mamandar shaqyryldy. Bul baǵyttaǵy eń basty jumys ınjenerlik-tehnıkalyq quramdy jınaqtaý edi. Ásirese, júk vagondaryn tolyq jáne depolyq jóndeýden ótkizý mańyzdy bolatyn. Reseı men Ýkraınadan iri tapsyrys berýshilermen baılanys ornatyldy. Olar Qazaqstanda osyndaı óndiris orny ashylyp, shyǵarǵan ónimderi halyqaralyq deńgeıdegi suranysqa ıe bolady dep oılamaǵan eken. Sheteldik áriptesteri búginde Ǵabbas Tókeshulynyń iskerlik qabileti men eńbegine joǵary baǵa berýde. Bárin aıt ta birin aıt, “Ibraev jáne K” óndiristik kooperatıvi bul kúnderi órlep tur.
Búkil Qazaqstandaǵy júk vagondaryn jańartý árıne jaǵdaı kelip, múmkindik bolyp jatsa úlken bir ǵanıbet is. Sapaly vagon jasaý ekiniń biriniń qolynan kele bermesi anyq. Ásirese qarakóz qazaqtardyń osyndaı kúrdeli óndiristi baǵyndyra bilýi erekshe qubylys. Qazaqstandaǵy vagon jóndeıtin eń ozyq kásiporynǵa jatatyn Semeıdegi osynaý zaýytta 300 adam jumys isteıdi. Kásiporyndaǵy eń basty talap – jumystyń sapaly bolýy. Jaqynda ǵana kásiporyn júk vagondaryna akýstıkalyq dıagnostıka jasaıtyn qymbat baǵaly quraldy satyp alyp, iske qosypty. Nátıjesinde vagonnyń qural-saımandary burynǵydaı úsh jyl emes, jeti jylǵa deıin shydas beretin bolǵan.
– Kásiporyndy damytý úshin eki úlken jobany qolǵa almaqshymyz, – deıdi Ǵabbas Tókeshuly, – birinshisi, vagon jasaıtyn zaýyt salý, ol aıyna 250-270 vagon shyǵaratyn bolady. Búginderi zaýyttyń jobasy aıaqtalý ústinde, “Qazaqstan temir joly” AQ-pen memorandýmǵa qol qoıylǵan sátten bastap qurylysy bastalady. Ekinshi jobamyz qazirgi zaman talabyna saı basseın salý.
“Ibraev jáne K” óndiristik kooperatıvindegi jumysshylar úshin kóp páterli turǵyn úıler salynyp, jaqynda paıdalanylýǵa berilgen eken. Jyl saıyn jumysshylaryna páterler, jeńil kólikter syılaý kásiporynda qalyptasqan dástúr. Tegin medısınalyq qyzmet te qaraýyndaǵy qarapaıym jumysshy qaýymǵa degen iltıpattyń bir túri. Ǵabbas Tókeshuly oblystyq máslıhattyń depýtaty. Depýttatyq jolǵa kelýine bir sebep, áleýmettik jaǵynan az qorǵalǵan jandardyń, balalar úıi men sport uıymdarynyń kómek surap kelýi. Al bıznesiniń sátti júrýi oǵan bilim mekemeleri men aýrýhanalarǵa, qoǵamdyq uıymdar men sport, mádenı oshaqtarǵa kómek qolyn sozýǵa múmkindik beredi. Osylaısha ol halyq qalaýlysy atanyp, qaladaǵy qordalanǵan problemalardy sheshýge atsalysty. Búginde qaladaǵy №5, 35,42, 20 mektepter men balet mektebi, №3 jáne №5 balalar úıi onyń tikeleı qamqorlyǵynda. Ol “Polıgon balalary” qoǵamdyq birlestigine, ınternasıonalıst-jaýyngerlerge de demeýshilik kómegin jasaıdy.
Ǵabbas Ibraev “Nur Otan” halyqtyq-demokratııalyq partııasynyń Semeı bóliminde sybaılas jemqorlyqpen kúres jónindegi qoǵamdyq keńestiń tóraǵasy. Partııalyq áriptesteri bul jaýapty jumysty oǵan zor senimmen tapsyrǵan. Eńbekqor, isker ári adamgershiligi men qaıyrymdylyǵy joǵary turatyn Ǵabbas aǵa byltyrǵy jyldyń qorytyndysy boıynsha metall óńdeý óndirisiniń eń úzdik kásipkeri dep tanylǵan.
Raýshan NUǴYMANBEKOVA.