«Vena - Eýropa júregi» baıqaýy

Gazetimizde buǵan deıin elimizde mıllıondaǵan halyqtyń súıikti sport túri sanalatyn fýt­boldy nasıhattaý jáne dáripteý maqsatynda Qazaqstan Respýblıkasy Syrtqy ister mınıstrliginiń Halyqaralyq aqparat komıteti, Avstrııanyń Qazaqstandaǵy elshiligi, “Avstrııa áýe joldary” men Qazaqstan Fýtbol federa­sııasynyń uıymdastyrýymen “Vena – Eýropa júregi” atty jalpyulttyq saýalnama-baı­qaýy­nyń ótetini habarlanǵany belgili. Baıqaýdyń maqsaty men erekshelikterine ke­ler bolsaq, ol salamat­ty ómir salty jáne ómir­ge de­­gen salamatty kózqa­ras, jarysty ere­jege sáı­kes júrgizý, oǵan qa­tysýshylardyń bá­rine shyq­qan tegine, tiline, násiline jáne di­nı senim-nanymyna qaramastan teń qaraý bolyp sanalady. Osyndaı kózqarasqa negizdele otyryp baı­qaýdy uıymdastyrylýshylar “Vena – Eýropa júregi” atty is-sharany ótkizý arqyly Qazaq­stan, Avstrııa jáne EQYU, dıplomatııa men sport arasyndaǵy jaǵymdy yqpaldastyqtyń úl­gisine jurtshylyq nazaryn aýdarǵysy keledi. Bul jerde nelikten Vena tańdalyp alyndy degen saýalǵa kelsek, SIM taratqan málimet­terge qaraǵanda, dál osy ásem shaharda EQYU-nyń Hatshylyǵy ornalasqan, sondyqtan ol bıylǵy jyly eýropalyq astanalar arasynda qazaq­standyqtardyń júregine belgili bir dárejede eń jyly bolyp kórinedi. Onyń taǵy bir sebebi, dál sol jerde 7 qyrkúıek kúni fýt­boldan 2012 jyl­ǵy Eýropa chempıona­ty­nyń irikteý týrnırindegi óz jolyn Qazaqstan ult­tyq quramasy avs­trııa­lyq qarsylastarymen bolatyn oıynymen bastamaq. Baıqaýǵa qaty­sýshy­larǵa qoıylatyn talap­tar tómendegideı. Mun­da olar eń aldymen Vena qalasy, “Avstrııa áýe joldary”, otandyq jáne eýropalyq fýt­bol, EQYU-nyń qyz­me­ti men oǵan Qazaq­stan­nyń tóraǵalyq etýine qatysty suraq­tarǵa durys jaý­ap berý qajet. Suraqtar men olarǵa jaýaptar­dyń nusqalary qazaq­stan­dyq jetekshi sporttyq jáne qoǵamdyq-saıası BAQ-tarda jáne ınter­net-portaldarda, sondaı-aq Qazaqstan Fýtbol fe­de­rasııasynyń saıtynda (www.kff.kz) orna­las­tyrylatyn bolady. Osy suraqtardyń ishinde “Eýropadaǵy halyqaralyq uıymdardyń qaı­sysynyń shtab páteri Venada ornalas­qan?”, “Qazaqstan 2010 jyly qandaı ha­lyqaralyq uıymǵa tóraǵalyq etýde?”, “EQYU-ǵa neshe memleket múshelik etedi?”, “Eýropadaǵy fýt­bol chempıonattarynyń sońǵysy (2008 jyly) qaı elde ótti?” degen asa qıyn emes saýaldar bar ekenin atap ótkenimiz jón. Joǵaryda qoı­yl­ǵan osy suraqtarǵa jaýaptardy ózińizdiń keri baılanys málimetterińizben (aty-jónińiz, baı­lanys telefon nómiri) qosa toltyrylǵan anke­talar 16 tamyzdan keshiktirmeı konkurs@kff.kz elektrondy adreske nemese dástúrli poshta ar­qy­ly “Almaty q-sy, Sátbaev k-si 29/3, A.Kep­lın úshin, “Vena – Eýropa júregi” meken-jaıyna jetkizý qajet. Durys jaýap qaıtarǵandar 23 tamyz kúni Astanada ótetin júlde utysyna qatysady. Júldeler arasynda – uıymdastyrýshylardyń sımvolıkasy bar sývenırler jáne Qazaqstan quramasynyń oıynshylary qol qoıǵan úsh teńbil dop bolady. Bas júlde – “Avstrııa áýe joldary” kompa­nııasy usynǵan “Astana-Vena-Astana” baǵyty boıynsha eki adamǵa ushý bıletteri jáne 6-10 qyrkúıek aralyǵynda venalyq qonaq úıde bes kún turý múmkindigi. Sondaǵy baǵdarlamanyń mindettisi – Qazaqstan Fýtbol federasııasymen usynylǵan eki bıletpen 7 qyrkúıekte ótetin Qazaqstan jáne Avstrııa qu­­ramalarynyń oıynyn stadıon­nan tamasha­laý bolady. Osy jerde eskerte ketetin bir nárse, turatyn je­rińiz­­den Astanaǵa barý jáne qaıtý, vızany rásimdeý, tamaqtanýǵa qatysty shyǵyndardy uıymdastyrýshylar ótemeıdi. Uıymdastyrýshylar atalmysh baıqaý Qazaq­stan men Avstrııanyń jaqyndasýyna, EQYU-daǵy Qazaqstandyq tóraǵalyqtyń dáriptelýine, salamatty ómir saltyn nası­hattaýǵa óz yqpalyn tıgizedi degen senimmen BAQ ókilderin bul bas­ta­many júzege asyrýǵa járdem kórsetýin suraıdy. Dastan KENJALIN.