Quramadan quıylǵan qurysh

Keshe Astana qalasyndaǵy Jýrnalıster úıinde Qostanaı jerinde qurastyrylyp shyǵarylǵan ońtústikkoreıalyq “Ssang Yong” kóliginiń alǵashqy tobyn buqaralyq aqparat quraldarynyń ókilderine tanys­tyrýǵa arnalǵan baspasóz máslıhaty bolyp ótti. Bir jaǵy atalmysh kóliktiń tusaýkeseri retinde túńdik kótergen bul jıynǵa eki eldiń osy ónimdi shyǵarýǵa qatysy bar mekemeleriniń jetekshileri qatysty. Baspasóz máslıhatynyń kiris­pe­sin­de Indýstrııa jáne jańa teh­nologııalar mınıstrligi О́nerkásip komıteti tóraǵasynyń orynbasary Dáýlet Baqbergen birinshi bolyp sóz alyp, Qazaqstan men Ońtústik Koreıa memleketteri arasyndaǵy av­tomobıl ónerkásibi baǵytyndaǵy baılanys­tyń bastaýyna toqtaldy. Munyń ózi Prezıdent N.Nazar­baev­tyń atalmysh elge resmı sa­par­men barǵan kezinen arnaly ar­qaý tarta­dy. Sol jolǵy memle­ket­aralyq ýaǵdalastyq nátı­jesinde Qostanaı­daǵy “Qazaqstan Agro­mash­holdıngi” AQ kásiporny­nyń bazasynda “Ssang Yong” kóligin qu­rastyryp shyǵarýǵa negiz qalaýdyń múmkindigi týdy. Ony kóp jyl­dar­dan beri ózara yntymaqty jumys jasasyp kele jatqan koreıalyq kólik shyǵarýshy “Ssang Yong Motors Cor­po­ration” kompanııasy men qazaq­stan­dyq “Allur Auto” avtomobılder kompa­nııasy toby birge uıymdas­tyr­dy. Joba elimiz­diń otandyq eko­no­mıkanyń qýatyn arttyrýdy kózdeı­tin óndiristi jetildirýge arnalǵan memlekettik baǵdarlamasynyń bir bóligine jatady. Sonymen birge ol Elba­synyń “Qazaqstanda jasalǵan” atty patrıottyq bastamasyn jú­zege asyrýdyń birden-bir naqtyly joly bolyp tabylady. – Biz Qazaqstan aýmaǵynda qazirgi zamanaýı avtomobıl quras­tyrý óndirisiniń qurylýyn úlken ta­rıhı oqıǵa dep baǵalaımyz, – dedi tóraǵanyń orynbasary. – Eli­mizde jańa kólik qurastyrý kon­veıe­riniń qatarǵa qosylýynyń ózi álemdik máshıne jasaýshylardyń keleshek bizdiń respýblıkamyzda tıimdi jumys jasasý múmkindiginiń bary­na senip otyrǵanyn kórsetedi. Bul – bir. Ekinshi jaǵynan, joǵary teh­­­­nologııaly kólikterdi quras­ty­ryp shyǵarý otandyq avtomobıl ónerkásibiniń Reseı jáne Belarýs elderimen kedendik birtutas keńis­tik jaǵdaıyndaǵy básekelestikti arttyrýǵa tyń serpin beredi. Aıtatyny joq, bul shynynda da elimizdiń avtomobıl qurastyrý sa­la­syndaǵy úlken jańalyq bolyp otyr. “Súıegi koreılik, eti bizdiki” bo­lyp otyrǵan sol kólikterdiń bir­nesheýin Jýrnalıster úıine jetken boıda ózimiz de tamashalap kórgenbiz. Ǵı­marattyń aldyna qańtarylyp qoı­ylǵan olar kózge ásem kórindi. Qu­ramadan quıylǵan quryshtaı be­rik, súlikteı kórikti kólik toty­daıyn taranyp-aq tur. Orys tilinde “vne­dorojnık” degen sıpattamaǵa ıe bul jolsyzben júre alatyn kóli­k­ter­diń qazaq dalasy­nyń kez kelgen pushpaǵy úshin bóten bola qoımasy anyq. – Biz Qazaqstanda jınasty­ryl­­ǵan “Ssang Yong” avtomobı­l­­deriniń sapasyna rızamyz, – dedi “Ssang Yong Motors Corporation” kompa­nııa­sy­nyń TMD elderi boıynsha me­nedjeri Rý Ion Hon bizdiń osy oıy­myzdy qýattaǵandaı baspasóz más­lı­hatynda. – Qazirdiń ózinde mamandar men tutynýshylar olar­dyń Ońtústik Koreıada quras­tyryl­ǵan nusqasynan kem túse qoı­maı­tynyna kóz jetkize alady. Qazaq­standaǵy kásiporynda barlyq tehnologııalyq talaptar saqtalyp, ónerkásip jáne sapa menedjmenti júıesi iske qosyldy. Buǵan kásip­orynǵa jumysqa tartyl­ǵan kópte­gen mamandardyń Ońtústik Koreıa zaýyttarynda arnaıy oqý kýrsta­rynan ótip qaıtqany da oń áser etken sııaqty. Al sóziniń basynda Rý Ion Hon myrza eki memlekettiń arasyndaǵy yntymaqtastyqty odan ári damyta túsýdegi óte mańyzdy qadam bolyp tabylatyn jobanyń jaqsy bas­tal­ǵanyna qýanyshty ekendikterin bildire kelip, osyǵan járdem ja­saǵan Qazaqstan Úkimetine, sondaı-aq Indýstrııa jáne jańa tehnolo­gııalar mınıstrligine al­ǵys sezimin jetkizdi. Osy jerde kó­ńilge túı­genimiz, Qostanaıda “Ssang Yong” avtomobılin quras­ty­rýdyń birinshi kezeńi iri torap­tyq ádis boıynsha júrgiziledi. Sodan keıin kásip­o­ryn­­­nyń kólik shyǵarýdaǵy jeke úlesi 50 paıyzǵa deıin jetkizetin shaǵyn toraptyq tásil qolǵa aly­nady. Alǵashqy jy­ly munda 1000 avtomobıl shy­ǵarý josparlanyp otyr. Birlesken jumystyń besinshi jylynda bul mólsher 7500-ǵa deıin jetkizil­mek­shi. Endi bul avtomo­bıl­d­er “Ssang Yong” markasynyń resmı dıs­trı­bıýtorynyń jelisi bolyp sana­latyn “Allur Auto” avtomobılder kompanııasy arqy­ly satylatyn bolady. Olar sondaı-aq elimizdegi eń iri kólik satý oryndary boıynsha da saýdaǵa shyǵarylady. Máslıhatta atalmysh jobaǵa 16 mln. dollardan astam ınvestı­sııa quıylǵany baıan etildi. Sonyń ishinde “Allur Auto” kompanııalar toby men “Qazaqstan Agromash­hol­dıngi” aksıonerlik qoǵamy ból­gen qarjy 10 mln. dollardy qu­raıdy. Al óndiristi qurastyrý je­lisin satyp alýǵa arnalǵan 6,5 mln. dollar mólsherindegi qara­jat­­t­y “Qazaqstan transport lı­zıng­tik kompanııasy” AQ shy­ǵarǵan. Bul ak­sıonerlik qoǵamnyń 100 paıyz­dyq aksııalar paketi Kólik jáne kom­mýnıkasııa mı­nıstr­ligine qaraıdy. – Qazaqstanda “Ssang Yong” kóligin qurastyryp shyǵarý otan­dyq tutynýshylar úshin olardyń baǵalaryn tómendetip usynýǵa múm­kindik beredi, – dedi “Allur Auto” avtomobılder kompanııasy toby­nyń bas dırektory Andreı Lav­rentev óz kezeginde. – Buǵan qosa biz elimizdiń barlyq iri qala­larynda sapaly da tıimdi baǵamen avtomo­bıl qyzmetin kórsetetin bolamyz. Biz sizdermen budan bu­ryn da osy quramda jolyqqan edik. Onda osy jobanyń iske qo­syl­ǵanyn málim etken bolatyn­byz. Endi sol jo­ba­dan shyqqan kólikterdi ákelip tur­myz. Al alda Qazaqstannyń jolda­rymen avto­jú­ris ótkizý oıymyzda bar. Ol atalmysh kólikterdiń bizdiń joldarymyzǵa qanshalyqty shydas beretinine synaq bolmaq. Jıynda “Qazaqstan Agromash­hol­dıngi” aksıonerlik qoǵamynyń prezıdenti Dın Kım kásiporyn­nyń aldaǵy ýaqyttarda da sapaly ónim shyǵarý úshin kúrese beretinin aıtty. Taıaýdaǵy 5 jyl ishinde kásiporyn taǵy 300 jańa oryn ashady. Jaqyn keleshekte munda jylyna shyǵatyn kólikter sanyn 25 myńǵa deıin jetkizý de mejede bar. Ol kezde, álbette, jaqyn shet­elderge eksportqa shyǵarý jú­zege asatyn bolady. Máslıhatty júrgizýshiler so­ńynda jýrnalısterdiń birqatar suraqtaryna jaýap berdi. Serik PIRNAZAR, Sýretterdi túsirgen Orynbaı BALMURAT.