Keshe Qazaqstan Respýblıkasy Ulttyq ulany 5573-áskerı bóliminiń mádenı ortalyǵynda Uly Otan soǵysyndaǵy umytylmas erlikti ulyqtaýǵa arnalǵan ulaǵatty is-shara ótti.
El basyna ekitalaı kún týǵanda qolyna qarý alyp, Otanyn qorǵaǵan maıdangerler, tylda tynym tappaǵan eńbek ardagerleri, búginde azamattyq boryshyn ótep júrgen órimdeı sarbazdar, sondaı-aq, mektep oqýshylary Táýelsizdigimizdiń 25 jyldyǵyna oraı uıymdastyrylǵan «Bizge dańq pen taǵzym muraǵa qalǵan!» aksııasy aıasynda Prezıdent teleardıo kesheni túsirgen «Otan úshin otqa túskender» jáne «Jeńisti jaqyndatqandar» atty derekti fılmderdi tamashalady.
Aspan asty, jer ústinde adamzat jaralǵaly buryn-sońdy bolyp kórmegen bul qan-qasap qyrǵynda ejelden er týǵan qazaqtar qaharmandyqtyń nebir qaıtalanbas úlgisin kórsetkeni belgili. Sonyń nátıjesinde 500-den astam jerlesimiz Keńes Odaǵynyń Batyry atandy.
Attary ańyzǵa aınalǵan Baýyrjan Momyshuly, Talǵat Bıgeldınov, Qasym Qaısenov, Raqymjan Qoshqarbaev, Saǵadat Nurmaǵambetov, Mánshúk Mámetova, Álııa Moldaǵulova, Hıýaz Dospanova sekildi ultymyzdyń mańdaıǵa basyp, maqtan tutar ul-qyzdary týraly taǵylymdy syr sherter tarıhı taspalardy kórgende kózimizge eriksiz jas kelgenin jasyrmaımyz. Ásirese, Stalıngrad soıqanynda, Harkov túbinde, Rjev – Vıazmadaǵy «ajal aımaǵynda» qyrshyndarynan qıylǵan qandastarymyzdyń aıanyshty taǵdyry aıtylǵan tustarda qabyrǵań qaıysa qamyqpaý múmkin emes. Eń soraqysy sol, Rjev túbindegi surapyl urystardan tiri qalǵan soldattardyń aýzyna qaqpaq qoıylyp, aqıqatty aıtýǵa tyıym salynǵan kórinedi. Aqmolada jasaqtalyp, atar myltyqtyń azdyǵynan jaýǵa jalań qylyshpen shapqan atty ásker dıvızııasynyń baqaıshaǵyna deıin qarýlanǵan fashıst basqynshylaryna shydas bere almaı, shybyndaı qyrylǵany azdaı, olar jaıynda shyndyqtyń beti kúni keshege deıin búrkemelenip kelgenin qaıtersiń. Erlikpen qaza tapqan bozdaqtardyń otbasyna jiberilgen «qara qaǵazda» burmalanǵan málimet berildi. Ańyraǵan analar men jylaǵan jesirler arystaryn amalsyz iz-túzsiz ketkenderdiń qataryna qosyp, «kebenek kıgen keledi» degen aqtalmas úmitke aldanýmen ana dúnıege attandy.
Kórermen kózaıymyna aınalǵan kınotýyndylarda halqymyzdyń Baýyrjan, Qasym, Raqymjan syndy tulpar minip, tý ustaǵan tulǵalarynyń kezinde baǵalanbaǵan batyrlyǵy, elenbegen erligi baıybyna bara baıandalady. Bir aıta keterligi, Berlındegi sátimen aıaqtalǵan bir áskerı operasııa úshin bárimiz biletin Saǵadat Nurmaǵambetov ekinshi márte Keńes Odaǵynyń Batyry ataǵyna usynylǵan eken. Biraq, keńestik armııanyń keýdemsoq komandırleri mundaı joǵary mártebeni qarakóz jigitke qımaǵan syńaıly.
Qazaqtyń kórgen qııanaty jalǵyz bular ǵana emes. Aıtyp taýysa almaısyń, bárin sanamalaı berseń. Egemen elmiz ǵoı, ótken ókinishterdiń esesi endi tolar.
Alqaly jıynnyń aıaǵynda buǵan deıin Reseıde, Ýkraınada Qazaqstannyń elshisi bolyp turǵanynda ıgi ıdeıalarymen osynaý fılmderdiń týýyna tikeleı sebepker bolǵan qazirgi «Nur Otan» partııasynyń hatshysy Zaýytbek Turysbekov salmaqty sóz sabaqtap, Elbasynyń tól tarıhymyzdyń tórt qubylasyn túgendeý baǵytyndaǵy ıgi bastamalaryn júzege asyrý maqsatynda bilek sybana jumysqa kiriskenin alǵa tarta otyryp, Reseıdiń Podolsk qalasyndaǵy ataqty áskerı arhıvti aqtarý barysynda ózderiniń óte qundy derekter men dáıekterge qol jetkizgenderin, onyń birsypyrasy myna kınolarda kórinis tapqanyn atap ótti. Bul rette elshilik qyzmetkerleriniń Ekinshi dúnıejúzilik soǵystaǵy qazaqstandyqtar erligin este qaldyrýǵa qomaqty úles qosqandaryna qysqasha toqtalyp, jalyndy jyldar oqıǵalaryn qaıta jańǵyrtý arqasynda qazirgi jastarymyzdy aǵa urpaq dańqyna saı tárbıeleýge múmkindik týatynyn jetkizdi.
Al Ulttyq ulannyń bas qolbasshysy, general-leıtenant Rýslan Jaqsylyqov mundaı mańyzdy aksııanyń keıingi tolqyn ókilderin, onyń ishinde Otan aldyndaǵy paryzyn atqarýshy bozbalalardyń boıyndaǵy patrıottyq sezimdi barynsha ushtaýǵa qyzmet etetinine ekpin túsirip, shapaǵaty mol sharaǵa qatysýshylarǵa rııasyz rızashylyǵyn bildirdi.
Talǵat BATYRHAN,
«Egemen Qazaqstan».