Naýryz meıramy qarsańyńda qala ákimdiginiń ǵımaratynda «Qoljetimdi baspana-2020» memlekettik baǵdarlamasynyń «Qazaqstan ıpotekalyq kompanııasy» ıpotekalyq uıymy» aksıonerlik qoǵamy turǵyn úıi baǵyty boıynsha páterler kiltterin tabystaý saltanaty boldy. Qala ákimi Bekbol Saǵyn merekelik sharaǵa qatysýshylardy Ulystyń uly kúnimen quttyqtap, jergilikti atqarýshy organda kezekte turǵan 17 azamatqa №12 shaǵyn aýdandaǵy «Keńdala» jáne №41 razezdegi «Altyn dala» turǵyn úı keshenderinen sý jańa páterlerdiń kiltterin tabystady.
Jaldamaly páterler kezekte turǵan bıýdjettik jáne memlekettik qyzmetkerlerge, tolyq emes, kóp balaly jáne múgedek balalary bar otbasylarǵa, jetim, ata-anasynyń qamqorlyǵynsyz qalǵan balalarǵa, áskerı qyzmetshilerge berildi.
– Atalǵan baǵdarlama boıynsha úmitkerlerdiń tizimi kezektegi azamattardan qujattar qabyldanǵannan keıin qala ákimdigi janyndaǵy komıssııasy qurylyp, «Báıterek» Ulttyq basqarýshy holdıngi» AQ Qazaqstan ıpotekalyq kompanııasyna tólem qabiletterin anyqtaý úshin joldanady. Tólem qabiletterin rastaǵan azamattar búgin turǵyn úı alýda. Taǵy 20 azamat osy turǵyn úılerden páter alý úshin tólem qabiletterin rastaýda. «Keńdala» jáne «Altyn dala» turǵyn úı keshenindegi turǵyn úıdiń ortasha quny 1 sharshy metri úshin aıyna 901 teńge jáne 913 teńge shamasynda bolady. Jaldamaly turǵyn úı aldyn ala tólemsiz, satyp alý quqyǵymen 20 jyldyq merzimge beriledi. Bul merzim ótkennen keıin turǵyn úı jalǵa alýshynyń jeke menshigine ótedi. Turǵyn úıdi 5 jyl jaldaǵannan keıin qaldyq quny boıynsha aı saıynǵy qalǵan jaldaý aqysymen satyp alýǵa bolady. Qazirgi tańda ústimizdegi jylǵy 18 naýryzǵa deıin kezektegi azamattardan «Batys-1» shaǵyn aýdanyndaǵy 192 páterge jáne Lenıngradskaıa kóshesindegi 9 páterge elektrondy nusqada qujattar qabyldanýda. Sonymen qatar, «Jas otbasylarǵa arnalǵan turǵyn úı» baǵdarlamasy boıynsha «Nur Aqtóbe» aýdanyndaǵy 234 páterge azamattardyń tólem qabiletterin tekserý boıynsha jumystar jalǵasýda, – dedi Bekbol Saǵyn.
Sý jańa baspanaly bolǵandar halqymyzdyń ulyq merekesimen qatar qonys toıyn toılaıtyndaryna dán rıza. Daǵdarys jaǵdaıynda da osyndaı qoljetimdi baspana alý qýanyshtarynyń Naýryz merekesimen tuspa-tus kelýin jaqsylyqqa balap, shat-shadyman bolýda, osynyń barlyǵy Elbasynyń sarabdal saıasatynyń nátıjesi dep baǵalaýda.
Shahar basshysy atap ótkendeı, Aqtóbe qalasynda Memleket basshysynyń bastamalaryn júzege asyrý barysynda turǵyn úı qurylysy baǵdarlamalary júzege asyrylyp, 2013 jyldan bastap búgingi kúnge deıin 4 215 otbasy baspanaly bolǵan. Jáne de bul jumystar alda da óz jalǵasyn taba bermek. Qalada turǵyn úı kezeginde 17 myńnan astam azamat tur. Múmkindiginshe, solardyń barlyǵyn taıaý jyldarda baspanaly etý mindeti qoıylýda. Bıyl «Nur Aqtóbe» shaǵyn aýdanynda «Turǵynúıqurylysjınaq» banki AQ júıesi boıynsha qurylysy ótken jyly bastalǵan 540 páterli 10 blok-seksııaly 3 úı tapsyrylady dep kútilýde. Daǵdarysqa qarsy baǵdarlama aıasynda oblysymyzǵa qosymsha qarajat bólinetin boldy. «Nur Aqtóbe» turǵyn úı alabynyń №3 jáne №4 shaǵyn aýdandarynda jaldamaly turǵyn úılerdi salý qarastyrylǵan. Bıyl munda 1728 páterlik 9 turǵyn úıdi salý josparlanyp otyr.
Satybaldy SÁÝIRBAI,
«Egemen Qazaqstan».
Aqtóbe oblysy.