Petropavl qalasynyń turǵyny Vıktor Nıkonovtyń úıi kirse shyqqysyz, eriksiz tańdaı qaqtyrady. Beınebir ertegiler elinde júrgendeı ǵajaıyp áserge bólenesiń.
Ol óte sırek kezdesetin, búginde tabylmaıtyn qundy zattardy bala kezinen tirnektep jınaýmen aınalysqan. Sodan beri arada jarty ǵasyr zýlap ótse de, súıikti isinen qol úzgen emes. Búginde onyń kolleksııasynda XVII-XIX ǵasyrlardyń tarıhı jádigerleri molynan kezdesedi. Eki bólmeli baspananyń ishi kóne saǵat, tósek, samaýryn, taǵy basqa turmystyq zattarǵa ıin tiresip tur. Aspaly sham, úı jıhazdaryna deıin eskiliktiń kózindeı jyly ushyraıdy. Máselen, tutas qabyrǵany alyp turǵan emen shkaf ataqty orys jazýshysy A.Chehovpen qurdas kórinedi. Birinshi Petr patshanyń tusynda shyǵarylǵan kúmis baqyrdy Petropavl qalasynyń mańaıynan taýyp alǵan. Qundy aqshanyń biri – Sibirdiń 10 tıynyna qazba jumystary kezinde kezikken. Ony 150 myń teńgege saýdalaýshylar tabylǵanymen, satýǵa qımaǵan.
Vıktor Fedorovıchtyń qoly altyn: kez kelgen zatty qaıta qalpyna keltire alatyn ismerligi bar. Kereýet, aına, shkaf, aspasham, oryndyqtardyń tozyǵy jetkenderin ózi jamap-jasqap alady. О́mir boıy tirnektep jınaǵan eńbeginiń shashaý shyqpaýyn, jınaqy turǵanyn qalaıdy.
Vıktor arheologııalyq qazba jumysy ekspedısııalaryna, túrli saıahattarǵa da jıi shyǵyp, murajaı qoryn tolyqtyryp otyrýdy ádet etken. Petropavl qalasyna qatysty eski sýretter – óz aldyna bir tóbe.
О́mir ESQALI,
«Egemen Qazaqstan».
Soltústik Qazaqstan oblysy.