Qazaqstannyń bes keremeti

atanǵan kórikti jerler National Geographic jýrnalyna endi Qazaqstannyń eń kórikti sanalǵan 5 túrli mekeni álemge áıgili National Geographis jýrnalynyń reseılik nus­qasynan oryn aldy. Olardyń keń-baıtaq respýblıkamyzdyń tórt taraby ispettes tórt múıisine qonys tepken. Kórkemdigine kóz toımaıtyn ásem oryndar Almaty, Ońtústik Qazaqstan, Mańǵystaý oblystary men Astana qalasyn qamtıdy. Jýrnal alqasynyń uıǵarymy boıynsha, qazaq jeriniń eń kórkem múıisteriniń kóshin budan bir ǵasyrdan astam ýaqyt buryn, 1911 jyly oryn alǵan jer sil­kinisinen keıin paıda bolǵan Qaıyńdy kóli bastaıdy. Almatydan shyǵysqa qaraı 280 shaqyrym jerdegi Kúngeı Alataý baýraıynyń jan-jaǵyn qaraǵaı men japyraqty aǵashtar ormany qorshaǵan atyrabynda ornalasqan bul sý qoımasy shynynda ǵajap! Ekinshi oryn – Ońtústik Qazaqstan ob­lysynyń Túrkistan qalasynda HIV ǵasyrda salynǵan Qoja Ahmet Iаsaýı kesenesine berilgen. Kezinde ataqty Ámir Temir Kóregenniń kúsh salýymen tur­ǵy­zylǵan mavzoleıdiń kelbeti kúni búgin de erekshe asqaq kórinedi. Úshinshi oryndy Balqash qalasynyń soltústiginen 70 shaqyrym jerde ornalasqan Bektaý ata taýy alyp tur. Aınalasyn shól dalanyń kórpesi qymtap jatqan alaptaǵy andaǵaı taý alystan keremet sulý bolyp kóz tartady. Onyń janynda bulańdap jatqan shaǵyn kóldiń bul sulýlyqqa qosar ózindik úlesi de bar. Zertteýshiler tórtinshi orynǵa Mań­ǵystaý oblysyndaǵy Oǵlandy eldi me­keninde ornalasqan Beket ata meshitin laıyqty dep taýypty. HVII ǵasyrda boı kótergen bul eskertkish keseneniń ádemiligide shek joq. Jáne onyń orna­lasqan aýmaǵynyń erekshe ekenin qosa aıtqymyz keledi. National Geographic jýrnalynyń qyzmetkerleri túzgen qazaqstandyq bes keremettiń kóshine Astana qalasyndaǵy «Báıterek» monýmenti tııanaqtap tur. Elimizdiń sońǵy ǵasyrdaǵy eń ǵa­jaıyp ǵımarattarynyń birinen sana­latyn, elordanyń alqasy ispettes bul mekenniń atalmysh tizimge enýiniń ózinde sımvoldyq mán jatyr. Qazaq eliniń asqaqtyǵy men erteńge qol sozǵan úmitiniń úzirindeı bolyp turǵan kelisti keshen árbir otandastyń kókiregine qýanysh sáýlesin uıalatady. Osynyń bári – bizdiń maqtanyshymyz! Murat AITQOJA.