Máslıhattar depýtattarynyń tańdaýy qurmetke laıyqty

TMD elderi atynan kelgen halyqaralyq baıqaýshy Akbaralı Sattorov Almatydaǵy Senat depýtattarynyń saılaýyn osylaı baǵalady – Qurmetti Akbaralı Kýr­bona­lı­uly, siz Tájikstannan kelgen birden-bir halyqaralyq baıqaýshy ekensiz. Áýeli jal­py saılaý týraly oı-paıym­da­ryńyzdy aıtyńyzshy. – Bir qaraǵanda, ár jerde óte­tin saılaýlardyń bir-birinen aıyr­mashylyǵy joq. Eń bas­ty­sy, osy saılaýdy qur­met­teýimiz kerek. Halyqtyń qalaýy. Senat saılaýy. Solardy saılaıtyn adam­dardyń tańdaýy qashanda qur­metke laı­yqty. Ár­bir saılaýdyń jeńim­paz­dary men je­ńilýshi jaǵy bo­lady. Osyǵan qaramas­tan, men halyqaralyq baıqaýshy retinde Qazaqstan Respýblıkasynyń Senat múshe­sin, Parlament depý­ta­tyn saılaı­tyn Almatydaǵy jı­yn­da kimdi saılaı­tynyn bilmesem de, qalaı bolǵanda da, depý­tattardyń tańdaýyn qurmet­teı­ti­nimdi málimdedim. Men ózim mamandyǵym boı­ynsha jýrnalıspin. Qazirde Tá­jik­stan Respýb­lı­kasy Ortalyq saılaý komıssııasynyń múshesi, eldegi Jýrnalıster odaǵynyń tór­aǵasy bolyp tabylamyn. Jýr­nalıst degenińizdiń ózi ómir­degi eń ańǵarympaz baıqaýshy ǵoı. – Áriptes bolyp shyqty­ńyz. Kelgen kúni saılaý al­dyn­daǵy ahýalmen tanysqan bo­lar­syz? – Iá, men Almaty qalasy saılaý ko­mıssııasynyń ókilimen kezdestim. Odan soń Reseı Federa­sııasynyń baıqaýshy ókilimen pikir alystym. Almaty qala­sy­nyń ákimimen bolǵan kezdesýimizden mán-jaıǵa qanyǵyp, úlken áser aldyq. Saı­laýǵa jan-jaqty sa­qa­daı-saı ázirlik ja­sal­ǵanyn baı­qa­dyq. Biz óz tarapy­myzdan qan­daı kandıdat jeńse de, ashyq, adal saılaýdy jaqtaı­tyny­myz­dy bildirdik. Úlken aýqymda alar bolsaq, meniń uǵymymsha, Alma­ty­daǵy jalpy qoǵamdyq-saıası jaǵdaı baqylaýdan shyqpaǵan sııaqty. Álbette, Astanamen sa­lys­tyrǵanda Almatyda oppo­zı­sııa­lyq gazetter de, oppozı­sııa­lyq yńǵaıdaǵy partııalar men qozǵalystar da kóbirek. Soǵan qa­ramastan, sondaılyq bura tart­qan, qııas basqan áreketter baıqalmady. Son­dyq­tan, saılaýdyń sátti ótip, shyn máninde laıyqtylardyń jeńetinine senimdi boldyq. – Al endi naqty búgingi ót­ken saılaý týraly oıyńyzdy ortaǵa saly­ńyz­shy. Oǵan berer baǵańyz qandaı? – Búgingi saılaý almatylyq tańdaý­shy­lar tarapynan óte tamasha uıym­dastyryldy deı ala­myn. Biz, TMD elderinen kelgen halyqaralyq baıqaýshylar, saılaý barysyn muqııat baıqastap, ba­qylap, balamaly túrde óz sanaǵymyzdy qatar júrgizdik. Biz­­diń esepteýlerimiz saılaý ko­mıssııasy júrgizgen esep-qı­sap­pen tolyqtaı derlik sáıkes shyq­ty. Sondyqtan, búgingi saılaý bar­lyǵy da ádil, ashyq bolǵan­dy­ǵyn, barlyǵy da Qazaqstan Res­pýblıkasynyń zańna­ma­syna, de­mokratııalyq qaǵıdattarǵa saı bolǵandyǵyn aıǵaqtap berdi. Biz qandaı da bir bura tartý­shy­lyq­ty, zań nemese quqyq buzýshy­lyqty baıqaǵan joqpyz. Búgin úmitkerler ishinen eń laıyqtysy, eń kúshtisi jeńip shyǵyp, Qazaq­stan Respýblıkasy Parlamenti­niń Senatyna joldama aldy. – Osy saılaýǵa qarap Qa­zaq­stan­nyń bolashaǵy týraly qandaı oı-tolǵamdar aıtar edińiz? – 1993 jyly Qazaqstanda al­ǵash bolǵan kezimnen bastap eldiń órkendep damýy týraly naqty bilemin. Qazaqstan Ortalyq Azııa óńirinde barlyq parametr­ler boıynsha kóshbasshylardyń biri dep esepteımin. Osy turǵydan aıtsam, Qazaq eliniń bolashaǵy jarqyn. Saı­laýǵa keler bolsaq, barlyǵy da tamasha uıymdas­ty­ryldy. Ásirese, ashyqty­ǵy­­na tánti boldym. Barlyq tańdaý­shylarǵa óte sabyrly túrde, eshqandaı qysym­syz, jymysqy áreketsiz ózi tańdaǵan úmitker úshin daýys berýlerine múm­kindik týdyryldy. Sondyqtan, men osy mereıli oqıǵamen búkil qa­zaq­stan­dyqtardy quttyqtaımyn. – Bizdiń Almatydan qandaı áser aldyńyz? – Almatyny, jańa aıtqa­nym­daı, 1993 jyldan beri jaqsy kó­re­min. Ol kezde Tájikstanda azamat soǵysy júrip jatqan bola­tyn. Men sonda Almatyǵa kelip, ózimniń bıznestegi alǵashqy qa­damymdy, alǵashqy tájirıbemdi osynda bastap edim. Sodan da bolar, osy sulý qalany, mundaǵy qo­naqjaı halyqty óte-móte qur­metteımin. Qudaıdan Al­maty qalasynyń Qazaqstan halqynyń ıgiligine oraı gúldene berýin árqashan tileımin. Qazaqstannyń aldaǵy sátti óter saılaýlaryna kele berýge, mundaǵy dostarmen júzdese berýge ázirmin. Áńgimelesken Qorǵanbek AMANJOL.