AQSh munaı óndirisiniń artýy teńgeni álsiretip jatyr

KASE qor bırjasynyń tańǵy saýdasy boıynsha qorytyndysynda ulttyq valıýta dollaryna 324,39 teńgege teń boldy. Eske salaıyq, 7 aqpandaǵy sessııada ulttyq valıýtanyń dollarǵa qatysty baǵamy 323,26 teńgege teń edi. 8 aqpandaǵy tańǵy saýdanyń birinshi kelisimi 324 teńgemen bastaldy. Bul mınımaldyq quny bolyp bekitildi. Al maksımaldyq quny - 324,64 teńge. Saýdanyń jalpy kólemi 39,85 mıllıon dollarǵa jetti. Kurs.kz málimetinshe, aıyrbas oryndarynda dollar 324,5-325,2 teńgege baǵalanyp otyr. Ulttyq valıýtanyń sońǵy eki táýlikte álsireýine birinshi kezekte munaı baǵasynyń tómendeýi sep bolyp otyr. Búgin Astana ýaqytymen tańǵy saǵat 09:00-de Brent markaly munaı quny 1,89 paıyz arzandap, 54,56 dollarǵa bir-aq quldyraǵan edi. Qara altynnyń arzandaýyna sebep bolǵan AQSh óndirisiniń kúrt artýy men naryqta munaıǵa degen suranystyń azaıýy, dep jazady investing basylymy. Sońǵy eki aı boıy OPEK+ kelisiminiń arqasynda munaı baǵasy barreline 56-57 dollar aralyǵynda saqtalǵan edi.