Senator S. AQYLBAI: Jer týraly pikirsaıysta Konstıtýsııanyń 26-babyna silteme jasaý qate

Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Serik Aqylbaı Qazaqstan Respýblıkasynyń Konstıtýsııasynyń 26-babyna túzetýler jobasy boıynsha túsindirme berdi. Jobada baptyń 1-tarmaǵy «Árkim zańdy túrde alǵan qandaı da bolsyn múlkin jeke menshiginde ustaı alady» degen mátinde usynylyp otyr. S.Aqylbaıdyń túsindirýi boıynsha, «azamattar» degen sóz «árkim» sózimen almastyrylady. Bul jerde «árqaısysy» dep Qazaqstannyń azamattary, sheteldik azamattar jáne azamattyǵy joq adamdar dep túsinýge tıispiz. Nege biz elimizdiń rezıdenti emes adamnyń nemese azamattyǵy joq adamnyń múlkiniń saqtalýyn qamtamasyz etpeýimiz kerek? Máselen, onyń kóligi, kıimi, kompıýteri bar. Munyń bári sol adamnyń múlki bolyp tabylady. Odan basqa, sheteldik azamattar munda ınvestısııa ákeledi, ol da múlik. Kelgen ınvestısııa qorǵalýy kerek, ol Konstıtýsııamen saqtandyrylýy arqyly qamtamasyz etilýi kerek», dep atap ótti depýtat. «Jer týraly másele – ol basqa mártebege ıe, múlde basqa erejemen retteledi, – dedi S.Aqylbaı. – Biz bul jerde Konstıtýsııanyń 6-babyna júginýimiz kerek, onda jer zańda kórsetilgen jaǵdaılarda ǵana jekemenshikke beriletini jazylǵan. Iаǵnı, munda Jer týraly jáne Azamattyq kodeksterge silteme jasalǵan, al ol zańdarda sheteldikterdiń aýyl sharýashylyǵyna arnalǵan jerlerdi satyp alýy týraly birde-bir sóz joq». S.Aqylbaıdyń aıtýynsha, 26-bap­tyń 1-tarmaǵyna baılanysty jer tý­ra­ly pikirtalasqa negiz joq, óıt­keni, jer máselesi bul erejemen qaras­tyrylmaıdy. «Sheteldikterdiń Qazaq­standa aýyl sharýashylyǵyna arnal­ǵan jerlerge ıe bolýy múmkin emes. Durys túsindirilgende, eshqan­daı olqylyq bolmaý kerek. Bári de bizdiń zańdarymyzǵa sáıkes jasalyp otyr. Memleket basshysy aýyl sharýashylyǵy jerleriniń shetel­dik­terge satylmaıtyny týraly buryn da aıtqan bolatyn. Jer, sý, tabıǵı resýrs­tar – múlik emes. Olar erekshe már­tebege ıe», dedi Joǵarǵy pala­tanyń salalyq komıtetiniń basshysy. Bıznesti qorǵaý taqyrybyna baılanysty ol: «Biz shetel azamatynyń da, azamattyǵy joq adamnyń da jeke múlkiniń qorǵalýyn qamtamasyz etýge tıispiz. Memleket olar ákelgen ınvestısııa men zańdy túrde alynǵan múlkiniń qorǵalýyna osylaı kepildik bere alady», dep atap ótti.