Vıse-premer aldymen «Shaǵaly-Agro» JShS-niń egis alqabyna kelip, kóktemgi naýqan barysymen tanysty. Seriktestik bıyl 22 myń gektar jerge aýylsharýashylyq daqyldaryn ornalastyrmaq. Onyń biraz bóligin raps, zyǵyr sekildi maıly daqyldar quraıdy. Tanap basynda agrarshylarmen ótken jıynda dala jumystaryn joǵary uıymshyldyqpen júrgizý jaıttary sóz boldy.
Budan ári A. Myrzahmetov «Molprodýkt» kásipornyna aıaldady. Zaýyt sút ónimderiniń 35 túrin shyǵarady. Sehtar qaıta jańǵyrtylyp, zamanaýı qondyrǵylarmen jabdyqtalǵan. Petropavl aýyr mashına jasaý zaýytyn gaz-munaı salasyna mamandandyrylǵan. Osynda otandyq aýyl sharýashylyq mashına quraý óndirisin damytýǵa arnalǵan keńes ótip, keleli máseleler talqylandy. Sońǵy úsh jylda óńir agroqurylymdary 63,9 mlrd teńgeniń 3689 tehnıka birligin satyp alǵan, olardyń qatarynda qazaqstandyq ónimder mol. Vıse-premer AО́K-ti damytýdyń memlekettik baǵdarlamasynyń bir mindeti aýylsharýashylyq salasyn ozyq tehnıkalarmen jáne qural-jabdyqtarmen tolyqtyrý ekenin atap kórsetti. Ony damytýdyń jol kartasy ázirlengen. Otandyq óndirýshige qaraı beıimdelý óz kezeginde alynatyn tehnıka kólemin 50-70 paıyzǵa ulǵaıtyp, jańǵyrý yrǵaǵyn 1,5-2 ese arttyratyn bolady.
Oblystyq ákimdikte Qostanaı jáne Aqmola oblystary ókilderiniń qatysýymen ótken otyrys kóktemgi dala jumystaryn joǵary qarqynmen uıymdastyrý máselelerine arnaldy. Mınıstrlikter men ákimdikter arasynda jasalǵan memorandýmdar sheńberinde maıly jáne jemdik, jarmalyq, mal azyǵy daqyldaryn, qant qyzylshasy egistigin 900 myń gektarǵa deıin ulǵaıtý qarastyrylǵan.
Jıynda agrofırma basshylary ózderin tolǵantqan suraqtardy Asqar Isabekulyna joldady.
Premer-Mınıstrdiń orynbasary – Aýyl sharýashylyǵy mınıstri aıtylǵan usynys-tilekterdiń barynsha eskeriletinine, tolǵaqty máselelerdiń sheshiletinine sendirdi.
О́mir Esqalı,
«Egemen Qazaqstan»
