Foto: Eńbek jáne halyqty áleýmettik qorǵaý mınıstrligi
Birjolǵy járdemaqy: 28,5 myń otbasy qamtyldy
Jyl basynan beri bala týýyna baılanysty beriletin birjolǵy járdemaqyny 28,5 myń adam aldy. Bul maqsatqa respýblıkalyq bıýdjetten 5,6 mlrd teńge baǵyttaldy.
Atalǵan tólemge bala týǵan, asyrap alǵan nemese qamqorlyqqa alǵan Qazaqstan azamattary, qandastar jáne elimizde turaqty turatyn sheteldikter úmitker bola alady.
2026 jyldan bastap memlekettik járdemaqylardyń mólsheri 10 %-ǵa ındeksteldi. Bala týýyna baılanysty tólem kólemi aılyq eseptik kórsetkishke (AEK) baılanysty belgilenedi. Qazirgi mólsheri mynadaı:
birinshi, ekinshi, úshinshi balaǵa – 38 AEK nemese 164 350 teńge;
tórtinshi jáne odan keıingi balaǵa – 63 AEK nemese 272 475 teńge.
Bala kútimi boıynsha tólemder
Bala bir jarym jasqa tolǵanǵa deıin onyń kútimine baılanysty aı saıynǵy járdemaqy alýǵa 2026 jylǵy qańtarda 130,2 myń adam ıe boldy. Bul baǵytta 4,2 mlrd teńge tólendi.
Eger bala kútimin júzege asyratyn adam mindetti áleýmettik saqtandyrý júıesine qatyspaǵan bolsa, sondaı-aq asyrap alǵan, qorǵanshylyqqa alǵan nemese ógeı balalary bar otbasylar da (eger bala basqa ata-ananyń otbasynda esepke alynbasa) osy járdemaqyny ala alady.
Aı saıynǵy tólem mólsheri:
birinshi balaǵa – 5,76 AEK nemese 24 912 teńge;
ekinshi balaǵa – 6,81 AEK nemese 29 454 teńge;
úshinshi balaǵa – 7,85 AEK nemese 33 952 teńge;
tórtinshi jáne odan keıingi balaǵa – 8,90 AEK nemese 38 493 teńge.
Jumys isteıtin azamattarǵa áleýmettik tólem
Jumys isteıtin azamattarǵa júktilikke jáne bosanýǵa, sondaı-aq jańa týǵan balany asyrap alýǵa baılanysty tabysynan aıyrylǵan jaǵdaıda MÁSQ-tan áleýmettik tólem qarastyrylǵan. Bul tólem júktilik jáne bosaný boıynsha berilgen demalystyń barlyq kúnderine esepteledi. Onyń mólsheri sońǵy 12 aıdaǵy ortasha aılyq kiriske jáne eńbekke jaramsyzdyq paraǵynda kórsetilgen kún sanyna baılanysty anyqtalady.
2026 jyldyń qańtar aıynda atalǵan birjolǵy áleýmettik tólemdi 17,4 myń adam aldy. Jalpy tólengen qarajat kólemi 16,8 mlrd teńgeni qurady. Ortasha tólem mólsheri – 1 160 626 teńge.
Sonymen qatar bala bir jarym jasqa tolǵanǵa deıin onyń kútimine baılanysty tabysynan aıyrylǵan jaǵdaıda MÁSQ-tan aı saıynǵy áleýmettik tólem taǵaıyndalady. Bul tólem balanyń týǵan kúninen bastap esepteledi jáne sońǵy eki jylda áleýmettik aýdarymdar júrgizilgen ortasha aılyq tabystyń 40 %-y mólsherinde tólenedi. Egiz nemese odan da kóp bala týǵan jaǵdaıda tólem ár balaǵa jeke-jeke belgilenedi.
«Zeınetaqy, járdemaqy, aıyppul»: 2026 jyl el turǵyndaryna qandaı ózgeris ákeledi?
Qańtar aıynda bul tólem 16,5 myń adamǵa taǵaıyndalyp, 32,6 mlrd teńge kóleminde qarjy tólendi. Aı saıynǵy ortasha tólem 78 294 teńgeni qurady.
Memlekettik qoldaýdyń mundaı tetikteri ana men balany áleýmettik qorǵaýdy kúsheıtip, demografııalyq ósimdi yntalandyrýǵa baǵyttalǵan.
