Memleket basshysy mártebeli meımandarǵa iltıpat bildirip, elimizge Aýstrııa mınıstrlerimen birge iskerlik orta ókilderinen quralǵan delegasııanyń kelýi mańyzdy ekenin atap ótti.
– Aýstrııa Úkimetiniń eki birdeı mınıstriniń elimizge saparmen kelýi ózara yntymaqtastyqty nyǵaıtý turǵysynan óte mańyzdy. Aýstrııa – Qazaqstannyń senimdi ári burynnan kele jatqan strategııalyq seriktesi. Sizderdiń ekonomıkamyzǵa quıǵan ınvestısııalaryńyz 3 mıllıard dollardan asty, sondaı-aq saýda aınalymynyń kólemi ulǵaıyp keledi. Bul óte jaqsy úrdis. Biz Birikken Ulttar Uıymy jáne EQYU aıasynda tyǵyz qarym-qatynas ornattyq. Mundaı baılanystar aldaǵy ýaqytta da jalǵasa beredi dep oılaımyn. Aýstrııa – kóptegen baǵytta qarqyndy damyǵan el. Sondyqtan qol jetkizilgen yntymaqtastyq deńgeıin joǵary baǵalaımyz. Sizder úshin Qazaqstan aımaqtaǵy mańyzdy rólin saqtap qalady degen senimdemiz. Qazirgi tańda Aýstrııanyń Ortalyq Azııa memleketterimen aradaǵy saýda qatynastarynda Qazaqstannyń úlesi 80 paıyzdan joǵary, – dedi Qasym-Jomart Toqaev.
Prezıdent eki eldiń salalyq mınıstrlikteri men vedomstvolary arasyndaǵy yqpaldastyqtyń jandanýyn quptady. Atap aıtqanda, bıyl mamyr aıynan bastap dıplomatııalyq pasport ıeleri úshin vızasyz rejım týraly jáne readmıssııalaý jónindegi kelisimder kúshine endi.
Memleket basshysy zamanaýı syn-qaterlerdiń transshekaralyq sıpaty ulǵaıyp bara jatqanyna toqtalyp, osy oraıda quqyq qorǵaý organdarynyń ózara baılanystaryn tereńdetý qajet ekenin aıtty.
Beate Maınl-Raızınger men Gerhard Karner Qasym-Jomart Toqaevqa kezdesýge múmkindik jasaǵany úshin alǵys aıtyp, Prezıdent Aleksandr Van der Bellenniń ystyq yqylasyn jetkizdi.
– Bizdiń saparymyz der kezinde uıymdastyryldy. Qazaqstan – Ortalyq Azııadaǵy ekonomıkalyq turǵydan ǵana emes, saıası jaǵynan da mańyzdy seriktesimiz. Biz qaýipsizdik, kóshi-qon salalary boıynsha tyǵyz áreket etemiz. О́zińiz atap ótkenińizdeı, kópjaqty alańdarda da birlesip jumys isteımiz. EQYU mınıstrler kezdesýine qatysqan Qazaqstannyń syrtqy ister mınıstrin Vena qalasynda qabyldaǵanyma qýanyshtymyn. О́ıtkeni biz elińizdiń atalǵan Uıymdaǵy kóshbasshylyq pozısııasyn joǵary baǵalaımyz, – dedi Aýstrııanyń syrtqy saıasat vedomstvosynyń basshysy Beate Maınl-Raızınger.
Kezdesý barysynda ekonomıkalyq yntymaqtastyqty keńeıtýdiń, sondaı-aq óńirlik jáne halyqaralyq kún tártibiniń ózekti máseleleri talqylandy.
Memleket basshysy Prezıdent Aleksandr Van der Bellenge izgi sálemin joldady. Qasym-Jomart Toqaev Aýstrııa kóshbasshysyn ózine qolaıly ýaqytta Qazaqstanǵa saparmen kelýge shaqyratynyn rastady.
