Qujat radıasııalyq onkologııa, ıadrolyq medısına, dıagnostıkalyq vızýalızasııa, medısınalyq fızıka, radıofarmasııa jáne medısınadaǵy radıasııalyq qaýipsizdik baǵyttaryn qamtıdy. Kelisimge MAGATE-niń bas dırektory Rafael Marıano Grossıdiń Qazaqstanǵa sapary aıasynda qol qoıyldy.
Kelisimge qol qoıý otandyq onkologııany damytý men radıasııalyq medısına salasyndaǵy halyqaralyq yntymaqtastyqty nyǵaıtýdyń strategııalyq qadamy boldy. Negizgi baǵyttardyń biri – Ulttyq ǵylymı onkologııa ortalyǵyn (UǴOO) MAGATE-niń álem boıynsha onkologııalyq kómektiń zamanaýı túrlerine qoljetimdilikti keńeıtýge baǵyttalǵan Rays of Hope jahandyq bastamasy aıasyndaǵy áleýetti Anchor Centre retinde damytý.
Josparlanǵan is-sharalar tolyq júzege asqan jaǵdaıda, UǴOO álemdegi MAGATE-niń 19-shy Anchor Centre ortalyǵyna jáne Ortalyq Azııadaǵy alǵashqy osyndaı ortalyqqa aınalady.
MAGATE-niń bas dırektory Rafael Marıano Grossı radıasııalyq onkologııa men sáýlelik terapııa salasyndaǵy Qazaqstanmen yntymaqtastyqtyń búginde joǵary deńgeıde damyp kele jatqanyn jáne onyń búkil óńir úshin mańyzy zor ekenin atap ótti.
«Biz Ulttyq ǵylymı onkologııa ortalyǵynyń MAGATE-men yntymaqtastyq aıasynda júrip ótetin damý jolyn aıqyndaǵymyz keledi. Bul tek ortalyqtyń ózine jańa múmkindikter ashyp qana qoımaı, óńirlik yntymaqtastyqqa da negiz bolady. Onkologııalyq aýrýlar men odan bolatyn ólim-jitim deńgeıi áli de joǵary. Qazaqstannyń onkologııalyq kómekti damytýǵa erekshe jaýapkershilikpen qarap otyrǵany zor qurmetke laıyq. Búgingi kelisimder ózara baılanystarymyzdy nyǵaıtyp, álemdik deńgeıdegi ortalyqty odan ári damytýǵa negiz bolady dep senemin», – dedi mártebeli meıman.
Yntymaqtastyq aıasynda taraptar bilim berý baǵdarlamalaryn júzege asyrýdy, halyqaralyq taǵylymdamalar men ǵylymı saparlar uıymdastyrýdy, sondaı-aq UǴOO mamandarynyń zertteý jobalary men agenttiktiń saraptamalyq mıssııalaryna qatysýyn josparlap otyr.
Negizgi nazar radıasııalyq onkologııa, ıadrolyq medısına, medısınalyq fızıka jáne radıofarmasııa salalary boıynsha mamandar daıarlaýǵa aýdarylady. Sonymen qatar UǴOO radıasııalyq medısına men onkologııa baǵytynda kadr daıarlaıtyn óńirlik quzyret jáne bilim ortalyǵy retinde damýdy kózdeıdi.
Jekelegen baǵyttardyń biri retinde sapa menedjmenti júıesin jetildirý kózdelgen. Atap aıtqanda, sapany basqarýdyń keshendi júıesin engizý, ishki aýdıtter júrgizý jáne UǴOO-nyń MAGATE standarttaryna sáıkes Anchor Centre retinde jumys isteýge daıyndyǵyn birlesip baǵalaý josparlanyp otyr.
Sonymen qatar halyqaralyq sarapshylar UǴOO-nyń eski korpýsyn rekonstrýksııalaý barysynda tehnıkalyq jáne saraptamalyq qoldaý kórsetedi. Bul radıasııalyq medısına ınfraqurylymyn jańǵyrtýdy, joǵary tehnologııalyq jabdyqtarǵa arnalǵan bólmelerdi daıyndaýdy, sonyń ishinde jelilik údetkishtermen jabdyqtaýdy qamtıdy.
Bul seriktestiktiń mańyzy erekshe. Sebebi qazirgi onkologııalyq kómekti halyqaralyq tájirıbe almasýsyz, ǵylymı áriptestik pen álemdik ozyq tájirıbelerdi engizýsiz damytý múmkin emes. Qol qoıylǵan kelisim UǴOO-nyń Ortalyq Azııadaǵy jetekshi onkologııalyq ortalyqtardyń biri retindegi pozısııasyn nyǵaıtyp, otandyq onkologııalyq qyzmetti jahandyq kásibı qaýymdastyqqa yqpaldastyrýǵa jańa múmkindikter ashady.
Qujatqa MAGATE-niń bas dırektory Rafael Marıano Grossı men UǴOO Basqarma tóraǵasy Jandos Búrkitbaev qol qoıdy. Kelisim úsh jyl merzimge jasalyp, keıin ony uzartý múmkindigi qarastyrylǵan.
