Atalǵan arnaıy maqsattaǵy taýly-egerli polk qazirgi tańda TMD elderi boıynsha biregeı áskerı qurylym sanalady. Munda taýly aımaqtarda qyzmet atqarýǵa arnaıy úıretilgen attar qoldanylady. Áskerı tehnıka óte almaıtyn qıyn shatqaldar men bıik taýly jerlerde dál osy attar jeke quramdy tasymaldap, tapsyrmalardyń oryndalýyna múmkindik beredi. Sonymen qatar olar oq-dári, qarý-jaraq jáne basqa da aýyr júkterdi jetkizýde mańyzdy ról atqarady.
Adamdardy áskerı qyzmetke qalaı daıyndasa, munda jylqylar da sondaı daıyndyqtan ótedi. Áskerı mamandardyń aıtýynsha, bólimge ákelinetin jylqylardyń kópshiligi bastapqyda múlde úıretilmegen, ıaǵnı salt minýge daǵdylanbaǵan ári komandalardy oryndaýǵa beıim emes bolady. Sondyqtan oqý eń qarapaıym negizderden bastalady.
«Bizdiń bólimdegi daıyndyq júıeli túrde júrgiziledi. Aldymen áskerı qyzmetshi men at jeke-jeke daıyndyqtan ótedi. Keıin bólimshe, vzvod jáne rota quramynda birlesken is-qımyldar pysyqtalady», deıdi 91678 áskerı bóliminiń taýly-egerlik rotasynyń komandıri, kapıtan Elnur Pernebek.
Áskerı bólim shırek ǵasyrdan astam tarıhynda túrli kezeńdi bastan ótkergen. Bólim 2000 jyly Qorǵanys mınıstriniń dırektıvasynyń negizinde Almaty oblysynyń Jarkent qalasyndaǵy 74261 áskerı bóliminiń bazasynda taýly-egerli batalon bolyp qurylǵan. Odan keıin Otar garnızonynda tolyqtaı jasaqtalyp, «Ońtústik» óńirlik áskerleri qolbasshylyǵyna qarasty 85395 áskerı bóliminiń quramyna kirip, Jýaly aýdanyna shoǵyrlanady.
Al 2007 jyly batalon 85395 áskerı bóliminiń quramynan shyǵyp, «Ońtústik» óńirlik áskerleri qolbasshylyǵyna ótedi. 2013 jyly Qorǵanys mınıstriniń sheshimine sáıkes batalon jeke taýly-egerli polk dárejesine ıe bolady. Alǵashqy jyldary áskerı qyzmetshiler shatyrlarda turyp, barlyq kúsh-jiger ınfraqurylymdy qalyptastyrýǵa jumsalǵan. Búginde polk zamanaýı bazamen jabdyqtalyp, áskerı qyzmetshiler men olardyń otbasylary úshin barlyq jaǵdaı jasalǵan.
«Jıyrma bes jyldan astam ýaqyt taýly-egerli polk biregeı áskerı bólim retinde óz mártebesin saqtap keledi. Ártúrli jarystarda birneshe márte júldeli oryn ıelenýi, sondaı-aq Armııalyq halyqaralyq oıyndardyń at sporty marafonynda jeńiske jetýi bólimdegi jaýyngerlik daıyndyqtyń joǵary deńgeıde ekenin dáleldeıdi. Bizdiń polk – jaı ǵana áskerı qurylym emes, bul – namys, tártip pen ózara qoldaý baǵalanatyn naǵyz otbasy. Biz aldyńǵy komandırler men áskerı qyzmetshiler qalyptastyrǵan jaýyngerlik dástúrlerdi qurmettep, saqtaımyz», deıdi polk komandıriniń tárbıe jáne ıdeologııa jónindegi orynbasary Qydyráli Áshirbaev.
Áskerı bólim jyldyń eki merziminde Otan aldyndaǵy boryshyn óteıtin jas býyndarmen tolyqtyrylyp otyrady. Osylaısha keshegi erlerdiń jolyn jalǵaǵan jaýyngerler er ústinde qyraǵylyqpen beıbit eldiń tynyshtyǵyn kúzetip keledi.
Nurbolat AMANBEK
