Keıin ózi de ustaz retinde shákirtterin álemdik bilim júıesimen, ártúrli mádenıetpen tanysýǵa yntalandyryp, olardy Eýropanyń mádenı jáne tarıhı ortalyqtaryna bastap baryp júrdi. Stýdentteri alǵash ret shetelge shyǵyp, aǵylshyn tilinde erkin sóılesýge yntalanǵanyn kórgen ol sol áserden áli aryla almaı júr.
Eńbek jolyn Astanadaǵy Eýrazııa gýmanıtarlyq ınstıtýtynyń Joǵary kolledjinde aǵylshyn tili oqytýshysy retinde bastaǵan Qarlyǵash keıin jeke bilim salasyna bet burdy. Ol Astanada «Eager Beaver» til ortalyǵyn ashyp, júzdegen oqýshy men stýdenttiń aǵylshyn tilin meńgerýine kómektesti. Onyń shákirtteri túrli olımpıadalar men bilim saıystarynda joǵary nátıjeler kórsetip, júldeli oryndarǵa ıe boldy. Ustaz úshin eń úlken marapat, árıne, shákirtteriniń jetistigi. Qarlyǵashtyń kásibı qyzmetiniń basty ereksheligi de osy ustanymnan aıqyn kórinedi.
Magıstratýrada oqyp júrgen kezinde Qarlyǵash AQSh-taǵy «JNCL-NCLIS Leadership & Advocacy Program» baǵdarlamasyna qatysý múmkindigine ıe boldy. San testten ótip, iriktelgen ol Vashıngtonda taǵylymdamadan ótti. Sol sapar onyń ómirindegi mańyzdy kezeńderdiń birine aınaldy. Álemniń túkpir-túkpirinen barǵan adamdar, túrli mádenıetterdiń toǵysy, jańa múmkindikterge toly orta onyń bala kúngi armandarynyń birin oryndaǵandaı boldy. Sol kezde ol keıin kele Amerıkaǵa qaıta baryp, halyqaralyq deńgeıde bilim alýdy maqsat etti. Arada bes jyl ótkende bul armany shyndyqqa aınaldy. Kóp ótpeı Qarlyǵash «Bolashaq» halyqaralyq baǵdarlamasy stıpendııasyn jeńip aldy.
«Boston ýnıversıtetinde bilim ala júrip, halyqaralyq deńgeıdegi aǵylshyn tili muǵalimderin daıarlaıtyn eń bedeldi baǵdarlamalardyń biri – CELTA kýrsyn Pass B nátıjesimen aıaqtadym. Bul kórsetkish – álem boıynsha osy baǵdarlamany támamdaǵan muǵalimderdiń shamamen úzdik 20-25 paıyzyna ǵana beriletin joǵary nátıje. Atalǵan jetistik meniń kásibı daıyndyǵymnyń sapasyn jáne úzdiksiz damýǵa degen umtylysymdy aıqyn dáleldeıdi. AQSh-ta bilim ala júrip, men tek stýdent retinde ǵana emes, kásibı maman retinde de belsendi damydym. Sonymen birge halyqaralyq konferensııalarǵa qatysyp, álemniń túkpir-túkpirinen kelgen bilim salasynyń mamandarymen tájirıbe almastym. Ýaqyt óte kele ózimniń basty mıssııamnyń biri – halyqaralyq bilim berý múmkindikteri týraly aqparatty elimizdiń muǵalimderine jetkizýge qulshynyp júrmin», deıdi ol.
Osy baǵdarlama aıasynda ol otbasymen birge Amerıka Qurama Shtattaryna qonys aýdaryp, álemniń jetekshi joǵary oqý oryndarynyń biri sanalatyn Boston ýnıversıtetine oqýǵa qabyldandy. Munda ol TESOL & Applied Linguistics baǵdarlamasy boıynsha ekinshi magıstrlik dárejesin aldy. Bul kezeń onyń akademııalyq ári kásibı damýyna jańa serpin berdi. Álemniń túrli elderinen kelgen mamandarmen birge bilim alý Qarlyǵashqa halyqaralyq tájirıbe jınaqtap, zamanaýı bilim berý tásilderin tereń zertteýge múmkindik berdi.
Amerıkadaǵy oqyǵan jyldary Qarlyǵashtyń taǵy bir mańyzdy bastamasyna jol ashty. Ol halyqaralyq baǵdarlamalar men kásibı damý múmkindikteri týraly aqparattyń elimizdegi, ásirese aýyldaǵy muǵalimderge jetkiliksiz ekenin baıqady. Osy olqylyqtyń ornyn toltyrý maqsatynda áleýmettik jelide «Coffee, Tea & Chalk» qaýymdastyǵyn qurdy. Osy alań arqyly ustazdar halyqaralyq granttar, konferensııalar, taǵylymdamalar men kásibı damý baǵdarlamalary týraly aqparat alady. Qarlyǵash turaqty túrde tegin vebınarlar ótkizip, áriptesterine halyqaralyq múmkindikke jol ashýǵa kómektesip keledi.
Qarlyǵash Nadımniń ómir joly Torǵaıdaǵy qarapaıym aýyldan bastalyp, Astana, Eýropa, tipti sonaý Amerıkaǵa jalǵasqan bilim saparyna ulasty. Zańǵar jazýshy Muhtar Áýezovtiń «halyq pen halyqty, adam men adamdy teńestiretin – bilim» degen asyl sózi Qarlyǵash syndy talapty jastyń ómirine qarata aıtylǵandaı. Onyń Torǵaıdan Bostonǵa deıin bilim soqpaǵy – zamandastaryna úlgi.
