Masters tobynda reıtıngi 2 400-den joǵary 81 shahmatshy óner kórsetse, Open sanatynda reıtıngi 2 400-den tómen 129 sportshy jarys jolyna shyqty. Qatysýshylar qatarynda 25 erler grossmeısteri men bir áıelder grossmeısteri boldy. Týrnırge álemdik shahmattyń tanymal ókilderi de jınaldy. Olardyń qatarynda álem chempıondyǵyna úmitker bolǵan Van Hao men Andreı Esıpenko, 2023 jylǵy Eýropa chempıony serbııalyq Alekseı Sarana, shahmattyń rapıd túrinen 2018 jylǵy álem chempıony Danııl Dýbov, 2018 jylǵy Eýropa chempıony Ivan Sharıch, sondaı-aq Aleksandr Predke men Anton Demchenko bar.
Qazaqstan quramasynyń namysyn Denıs Mahnev, Qazbek Nógerbek, Ramazan Jalmahanov, Edgar Mamedov sekildi tájirıbeli shahmatshylar qorǵady.
Halyqaralyq týrnırdi Halyqaralyq shahmat federasııasy (FIDE), Qazaqstan Respýblıkasynyń Týrızm jáne sport mınıstrligi, Qazaqstan shahmat federasııasy jáne Aqtóbe oblysynyń ákimdigi birlesip uıymdastyrdy.
Týrnırdiń Vladımır Dvorkovıch esimimen baılanystyrylýynyń ózindik tarıhı máni bar. Halyqaralyq shahmat federasııasynyń múshesi bolǵan ol álemniń túkpir-túkpirinde ótken júzden astam iri halyqaralyq týrnırge tóreshilik etti. Sonymen qatar shahmatshylar reıtıngin esepteýge arnalǵan arnaıy júıeni ázirleýge qatysyp, álem chempıondary Anatolıı Karpov pen Garrı Kasparovty daıyndaǵan jattyqtyrýshylar quramynda eńbek etti.
Vladımır Dvorkovıch eńbek jolyn dál osy Aqtóbe qalasynda bastaǵan. Ol 1960 jyly Taganrog pedagogıkalyq ınstıtýtynyń fızıka-matematıka fakýltetin támamdaǵan soń joldamamen Aqtóbege keledi. Jas maman az ýaqyt ishinde jergilikti sport jáne shahmat úıirmeleriniń jumysyn jolǵa qoıyp, kóptegen jasóspirimdi sportqa baýlıdy. Onyń bastamasymen óńirde shahmat mektebiniń negizi qalanyp, keıin bul mektepten kóptegen daryndy sportshylar shyqty.
Keıin Vladımır Dvorkovıch Reseıge qonys aýdarǵanymen, onyń shákirtteri men izbasarlary Aqtóbede qalyptasqan shahmat dástúrin úzgen joq. Ustaz negizin qalaǵan mekteptiń jumysy uzaq jyldar boıy jalǵasyp, óńirdegi shahmattyń damýyna úlken yqpal etti.
Osy tarıhı sabaqtastyqty saqtaý jáne Vladımır Dvorkovıchtiń eńbegin ulyqtaý maqsatynda Aqtóbede 2019 jyly alǵash ret halyqaralyq týrnır uıymdastyryldy. Sodan beri bul jarys dástúrli túrde ótkizilip keledi. Jyl saıyn álemniń ár túkpirinen tanymal shahmatshylar Aqtóbege jınalyp, ózara myqtyny anyqtaıdy.
Bıylǵy týrnırdiń jalpy júlde qory 50 mıllıon teńgeni qurady. Qomaqty syıaqynyń basym bóligi dástúrli shahmat boıynsha ótken Masters sanatynda joǵary nátıje kórsetken sportshylar arasynda bólinedi. Sondyqtan bul doda tek bedeldi halyqaralyq jarys qana emes, sonymen qatar kásibı shahmatshylarǵa mańyzdy reıtıngtik jáne qarjylyq týrnır sanalady.
Aqtóbe oblysy
