Kitaphananyń kireberis foıesinde rýhanı oshaqtyń qurylý jolyndaǵy jetistikterin tizip, jylnama jasaǵan. Kóz júgirtip edik, óńirde eń alǵashqy qoǵamdyq kitaphanany 1896 jyly otstavkadaǵy feldfebeldiń 18 jastaǵy uly Petr Stolbov ashqan eken. Bul laýazymda ol 19 jyl qyzmet atqaryp, keıin izbasarlaryna amanattaǵan. Ǵasyrdan astam tarıhy bar kitaphana búginde úlken jetistikke jetip otyr. Aıtpasqa bolmaıdy, kitaphananyń qaryshtap damýy 1992 jyldary bastalǵan. Kitaphana ujymy sol jyldardan bastap, aqparattyq tehnologııalardy ıgerýde serpindi jumys atqardy. Internet ıgiligi jete sala qazaq, orys, aǵylshyn tilderinde kitaphanalyq veb-saıttar ashyp, elimizde birinshi ret aldyńǵy sandyq tehnologııalardy ıgerdi. Keıin de kitaphananyń damý qarqyny bir kúnge de damyldaǵan emes. Únemi jańaryp otyrdy. Bıyl mereıtoı qarsańynda demeýshilerdiń kómegimen kitaphananyń kireberis foıesi jańartylyp, konferensııa zaly tolyq jóndeýden ótti. Saltanatty jıynǵa aımaqtyń zııaly qaýym ókilderimen qatar qala basshysy Almat Talǵatuly da kelip, jyly estelikterimen bólisip ketti. Áýeli qonaqtar ǵımarat aldyndaǵy áıgili aqyn A.S. Pýshkınniń bıýstine gúl shoqtaryn qoıdy.
– Pýshkın kitaphanasynyń orny oblystaǵy oqyǵan-toqyǵan ár azamat úshin erekshe. Sebebi joǵary bilim alǵan stýdentterdiń qosymsha bilim alatyn jeri osy. О́zim de oqýshy kezimde osy kitaphanadan shyqpadym. Keıin stýdent bolǵanda saǵattap otyryp referat jazatynbyz. Kim bilgen, keıin qala ákimi retinde kelip quttyqtap turatynymdy? Bizderdiń jetistikke jetip jatqanymyz, osynaý kitaphanalardyń arqasy, kitap oqyǵandyǵymyzdyń esebi. Rýhanı oshaǵymyz damı bersin, – dedi shahar basshysy Almat Aqyshov.
Kitaphananyń basshysy Nazym Ernazarqyzy, kitaphanashy Maıa Turdybekqyzy, Merýert Nurjanqyzyna alǵys hat tabystaldy.
Sonymen qatar kitaphana ujymyn arnaıy quttyqtaýǵa О́skemendegi Reseıdiń bas konsýly Alan Aleksandrovıch Hetagýrov ta keldi.
– Osynaý Pýshkın kitaphanasy eki eldiń arasyndaǵy dostyqtyń nyshanyndaı kórinedi. О́skemen turǵyndarynyń rýhanı ortasy máńgi jasaı bersin! Dostyǵymyz nyǵaıa tússin, – dep tiledi Alan Hetagýrov.
Iá, búgingi kesh kitap pen mádenıettiń, bilim men parasattyń saltanat qurǵan erekshe merekesi. Aıtýly keshke sonaý AQSh-tyń Qazaqstandaǵy mádenıet jáne bilim boıynsha ókili Kolına Garda aq tilegin aqtardy. Onyń ústine, arnaıy kelgen atashe oıyn qazaq tilinde jetkizdi.
Osylaısha, oblysymyzdyń ádebı, mádenı oshaǵynda úlken toı ótti. Ánnen shashý shashyldy, taǵylymdy áńgimeler aıtyldy.
О́SKEMEN
