Kengýrý kópke deıin óziniń balalaǵanyn bildirmeıdi eken. Tipti Haıýanattar baǵynyń tájirıbeli mamandarynyń ózi de kengýrýdyń balasy basyn qaltadan qyltıtyp shyǵarǵanda ǵana baıqaıtyn kórinedi.
Saqınaly quıryqty lemýrlardyń eki juby da egizden tóldegen. Alǵashqy egizder 6 naýryzda, ekinshi juptyń tólderi 17 naýryzda týǵan. Qazir olardyń barlyǵy mamandardyń jiti qadaǵalaýynda, eneleriniń baýyrynda ósip-jetilip jatyr.
Al naýryzdyń basynda balalaǵan aqqoldy gıbbonnyń tóli haıýanattar baǵynda birneshe býyn boıy jalǵasyp kele jatqan ózindik «bir áýlet». Olardyń ákesi Djım, ájesi Djýlııa da osy haıýanattar baǵynda týǵan. Al onyń arǵy atasy Tabındi haıýanattar baǵynyń turaqty kelýshileri jaqsy tanıdy.
Mamandardyń aıtýynsha, analyqtar men olardyń tólderiniń jaǵdaıy jaqsy. Kúnniń jylynýyna baılanysty janýarlar jazǵy qorshaýǵa shyǵaryla bastaıdy. Endi kelýshiler olardyń tabıǵı ortaǵa barynsha jaqyn jaǵdaıdaǵy tirshiligi men minez-qulqyn tamashalaı alady.
Qalaı desek te, sırek janýarlardyń dúnıege kelýi – haıýanattar baǵy úshin aıtarlyqtaı qýanyshty oqıǵa. Almaty haıýanattar baǵy prımattar bóliminiń jetekshisi Sholpan Ábdibekova: «Aqqol gıbbondar men saqınaly quıryqty lemýrlarda tóldiń dúnıege kelýi osy túrlerdiń genetıkalyq ártúrliligin saqtaýǵa yqpal etedi ári kelýshilerdiń jabaıy tabıǵatty qorǵaý máselesine qyzyǵýshylyǵyn arttyrady», deıdi
Sur kengýrýlar Lord pen Laradan, sondaı-aq Tık pen Lındadan eki tól týǵan. Lara altynshy ret tóldese, Lında alǵash ret balalaǵan. Al jıren kengýrýlar Martın men Martadan taǵy bir erkek tól dúnıege kelgen.
«Jańa týǵan kengýrý tólin birden baıqaý múmkin emes. Biz onyń dúnıege kelgenin biraz ósken soń, qaltadan basyn shyǵara bastaǵanda ǵana ańǵaramyz. Sondyqtan naqty týǵan kúni shamamen ǵana anyqtalady», deıdi Jyrtqysh sútqorektiler bóliminiń jetekshisi Gaýhar Sirgebaeva.
ALMATY
