Foto: Aqorda
Prezıdent Qasym-Jomart Toqaev qazaq-amerıka yntymaqtastyǵynyń joǵary deńgeıin atap ótip, Amerıka Qurama Shtattarymen keńeıtilgen strategııalyq seriktestikti odan ári nyǵaıtýǵa beıil ekenin rastady.
«Biz ózekti máselelerdi keńinen talqylaýǵa múmkindik týǵanyn oń baǵalaımyz. Ásirese, asa mańyzdy mıneraldar boıynsha C5+1 dıalogyna qatysýyńyzdy quptaımyz. Bul Qurama Shtattardyń Qazaqstanmen jáne búkil Ortalyq Azııamen yntymaqtastyqqa strategııalyq turǵydan mán beretinin kórsetedi. Sondaı-aq Sizdiń ekijaqty baılanystardy damytýǵa qosqan úlesińizdi atap ótkim keledi. Qazaqstan Amerıka Qurama Shtattarymen keńeıtilgen strategııalyq seriktestikti odan ári arttyrýǵa múddeli. Oraıly sátti paıdalana otyryp, Siz arqyly AQSh Prezıdenti Donald Trampqa ystyq yqylasym men izgi tilegimdi joldaımyn. Jyl sońyna qaraı biz kezdesemiz dep oılaımyn. Sonymen birge Maıamıde ótetin G20 sammıtine qatysýǵa shaqyrǵany úshin rızashylyǵymdy bildiremin», dedi Memleket basshysy.
Serdjıo Gor Qasym-Jomart Toqaevqa kezdesý úshin alǵys aıtyp, Prezıdent Donald Tramptyń sálemin jetkizdi.
«Sizdiń Aq úıde dosyńyz bar dep senimmen aıta alamyn. Prezıdent Tramp qyzmetińizdi aıryqsha baǵalaıdy. Biz elderimizdiń múddesi úshin ózara tıimdi sheshimder izdeýge umtylamyz. Muny AQSh pen aımaq elderi arasyndaǵy qarym-qatynastyń qarqyny dáleldeıdi. Keıingi jyldyń ózinde 20 mıllıard dollardan asa somaǵa kelisim jasaldy. Bul áli bastaýy ǵana ekenine senimdimin. Sizdiń jyl sońynda ótetin G20 sammıtine qatysatynyńyzǵa óte qýanyshtymyz», dedi Arnaıy ókil.
Qasym-Jomart Toqaev pen Serdjıo Gor birlesken saýda-ekonomıkalyq jáne ınvestısııalyq jobalardy júzege asyrý, sondaı-aq asa mańyzdy mıneraldar, kólik-logıstıka, sıfrlandyrý men basqa da basym salalardaǵy yqpaldastyq perspektıvasyn talqylady.
Qazaqstan teń quryltaıshylarynyń biri bolǵan Beıbitshilik keńesiniń qyzmetine erekshe nazar aýdaryldy. Memleket basshysynyń málimdeýinshe, elimiz halyqaralyq turaqtylyq pen gýmanıtarlyq bastamalardy ilgeriletý isine úles qosýǵa daıyn. Sondaı-aq óńirlik jáne jahandyq kún tártibindegi ózekti máseleler jóninde pikir almasý ótti.
Kezdesý sońynda Prezıdent pen Arnaıy ókil san qyrly qazaq-amerıka yntymaqtastyǵyn tereńdetýge ózara múddeli ekenin qýattady.
Memleket basshysy Portýgalııa Prezıdentine quttyqtaý jedelhatyn joldady
