Tolaǵaı qyz

Dúbirge bólengen dýmanda Toqtar aýylynan kelgen azamat qoı tulybyn 120 ret, Yntaly aýylynan kelgen qatysýshy 125 ret kóterip, joǵary nátıje kórsetti. Al jarystyń úzdik kórsetkishin Aqtóbe aýylynyń turǵyny tirkep, mýlıajdy 200 ret kóterdi. Desek te, áldi azamattarmen qatar qajyr-qaıratyn dáleldegen Jánel Qusaıynovanyń óneri «Baiqymyz» etnofestıvaliniń eń este qalarlyq sátteriniń biri boldy.

Sońǵy ret kóterip, mejeni 150-ge jetkizgen soń, halyqqa basyn ıgen batyr qyzǵa uıymdastyrýshylar estelik syılyqtar tabys etti. Kópshilik ishinen Aqtoǵaı aýdanynyń Dáýren esimdi márt azamaty sahna alańyna sýyrylyp shyǵyp, rýhty qyzǵa 100 myń teńge tartý etti. Al Qaraaǵash aýylynyń jigitteri qazaqy dástúrmen ıyǵyna oqaly qamzol jaýyp, qurmet kórsetti.

Jánel – Saran qalasynyń týmasy. Ol bala kezinen sportpen shu­ǵyldanady. Bozkilemde qarsylas shaq keltirmeı júrgen grepplıng jáne djıý-djıtsý sheberi. Keıipkerimizdiń aıtýynsha, ol buǵan deıin de túrli merekelerde osyndaı saıystardy kórip, qatysqysy kelgenimen, uıalyp júripti.

«Mundaı saıysqa birinshi ret qa­tys­tym. ­Kórip júrip qatty qyzy­­­ǵa­tynmyn, biraq uıalatyn edim. Osy joly táýekel etýge júreksinip tur­ǵa­­nymda, janymdaǵy bólem Gúl­mıra sahnaǵa shyǵýyma kúsh berdi», – deı­di el aýzynda júrgen batyr qyz.

Jánel ortaǵa shyqqanǵa deıin jigitter arasyndaǵy kórsetkish 120 ret bolǵan eken. El aldyna shyqqanda boıyn namys kernegen boıjetken aldyna bir ǵana maqsat qoıady: erler ornatqan mejeni jańartyp,  qyzdardyń da myqty bola alatynyn dáleldeý!

«Kórsetkish 100-den asyp bara jatqanda, rekordty jańartatynymdy sezdim. Ishimde tek qana «ozý kerek» degen oı boldy. Men úshin 35 kılolyq salmaq qatty aýyr bolǵan joq. Sebebi aptasyna 4–5 ret jattyǵý zalynda zil­temir kóterip, shynyǵamyn», deıdi ol.

Elimizdiń kók týyn halyqaralyq arenalarda jelbiretip júrgen sportshy qyz qoı kóterýden baq synap, osynshama halyqtyń alǵys-mahabba­ty men qoldaýyna bólenemin dep oılamaǵanyn jasyrmaıdy. «Jul­dyz bolamyn dep oılaǵan joq­pyn, árıne. Baǵdarlamalarǵa shaqyryp, suhbattasyp jatqany – erekshe sezim. Sport – densaýlyq kepili, son­dyqtan bolashaqta bul jolymdy maqta­nysh­pen jalǵastyra beremin», deıdi chempıon aǵynan jarylyp.