Jaz boıy kitap oqyp jarysady

Oqý marafonynyń ashylý rásiminde ýnıversıtettiń bas­qarma tóraǵasy – rektor Er­lan Sydyqov sóz sóılep, kitap­tyń jastar tárbıesindegi ornyna erekshe toqtaldy. Ol oqý mádenıetin qalyptastyrý bilim sapasyn arttyrý­dyń, básekege qabiletti urpaq tárbıe­leý­­diń mańyzdy sharty ekenin atap ótti.

Keıin sóz alǵan jazýshy Aldan Smaıyl kitaptyń ult rýhanııatyn saqtaýdaǵy, jas urpaqtyń dúnıe­tanymyn qalyptastyrýdaǵy erekshe rólin baıandady. Ol jastardy kórkem ádebıetti turaqty oqýǵa shaqyryp, kitap oqý mádenıetin damytý eldiń ıntellektýaldyq áleýetin arttyrýdyń mańyzdy tetigi ekenin aıtty. Sondaı-aq qalamger qazirgi aqparattyq dáýirde sapaly ádebıettiń ma­ńyzy burynǵydan da arta túskenin jetkizdi.

Marafon erejesine sáı­kes qaty­sýshylar jaz boıy ózderi oqyǵan kórkem ádebı shyǵarmalar týraly áleýmettik jelilerde pikir jazyp nemese qysqasha beınerolıkter jarııalaı alady. Oqylatyn kitap sanyna shekteý qoıylmaıdy. Joba qorytyndysy boıynsha belsendi qatysýshylar aldaǵy qyrkúıek aıynda marapattalady.

Kesh barysynda mádenı baǵdarlama usynyldy. Bir­neshe respýblıkalyq jáne halyqaralyq baıqaýlardyń jeńimpazy, jas kúıshi Ersultan Medet kúı ónerinen shashý shashyp, kórermenniń ystyq yqylasyna bólendi.

Sondaı-aq Ǵylymı kitap­hananyń dırektory Baqytjan Orazalıev kitaphananyń oqý mádenıetin qalyp­tastyrý men oqyrman qaýymnyń rýhanı suranysyn qanaǵattandyrý baǵytyndaǵy jumysy týraly aıtty. Kezdesýde zııaly qaýym ókilderi men ǵalymdar jastarǵa kitap oqýdyń mańyzy jóninde taǵylymdy pikirlerin ortaǵa saldy.

Poezııa bólimi de kóp­shiliktiń kóńilinen shyqty. Áleýmettik jelide tanylyp júrgen jas talant, Qaraótkel orta mektebiniń oqýshysy Asylaı Tólendi men №101 orta mekteptiń oqý­shysy Balym Orazǵalı óleń oqydy. Jumeken Nájimedenovtiń «Áke men bala» shyǵarmasy áserli oqylyp, ádebıet­súıer qaýymdy erekshe tol­qytty.

Is-sharanyń «Men usynatyn kitap» atty bólimine fılologııa ǵylymdarynyń doktory, professor Serik Negı­mov jetekshilik etti. Ǵalym kitaptyń adam ómirindegi orny men kórkem ádebıettiń tulǵa qalyptastyrýdaǵy róli týraly mazmundy oılaryn ortaǵa saldy. О́ziniń súıip oqıtyn shyǵarmalary jóninde áńgimelep, jastarǵa rýhanı azyq bolatyn týyndylardy oqýǵa keńes berdi.