Balýan Sholaq atyndaǵy Mádenıet jáne sport saraıynda jalaýy jelbireıtin jarysta Qazaqstannan barlyq óńirinen kelgen balýandardan bólek, AQSh, Reseı, Mońǵolııa, Italııa, Qytaı, Grýzııa, Qyrǵyzstan, Belarýs jáne О́zbekstannyń apaıtósteri de kúsh synasady.
Almaty qalasynyń grek-rım, erkin jáne áıelder kúres federasııasynyń vıse-prezıdenti Danııar Ohapov osy kúnge deıin «Ardager Alańy» ataýymen ótken jarysta tek ardagerler baq synap kelgenimen, bıyl onyń baǵdarlamasy aıtarlyqtaı keńeıtilgenin jáne de 35 pen 70 jas aralyǵyndaǵy alty ardagerlik dıvızıonnan bólek, 18-34 jas aralyǵyndaǵy sportshylar da beldesetinin tilge tıek etti.
«Túrli sebeptermen úlken sportta óz múmkindikterin tolyq paıdalana almaǵan jandarǵa osy joly jol ashýdy jón kórdik. Iаǵnı, Qazaqstan chempıonattarynda irikteýden ótpegen, kesh bastaǵan nemese mansabyn erte aıaqtaǵanymen, kúreske degen qulshynysyn joǵaltpaǵan sportshylar úshin «Ardager Alańy» – ózin kórsetý alańy. Osy oraıda týrnırdiń ıdeıalyq jetekshisi ári mesenat Erlan Malaevqa kúres ónerin damytýǵa jáne ardagerler qozǵalysyn jandandyrýǵa qosqan úlesi úshin zor alǵys bildiremin. Osy azamattyń janashyrlyǵy men kásibı biliktiligi olımpıadalyq kúres túrlerin órkendetýge zor yqpalyn tıgizip jatyr», deıdi Danııar Ohapov.
Jarys aıasynda tarıhı muraǵa da erekshe kóńil bólinedi. Kórermender úshin Qajymuqan Muńaıtpasovtyń ómiri men jetistikterine arnalǵan arnaıy kórme uıymdastyrylady. Onda «Kúsh atasynyń» HH ǵasyr basyndaǵy iri halyqaralyq jarystarda jeńip alǵan ordenderi men medaldary jáne basqa da qundy jádigerleri usynylady. Eksponattardyń bir bóligi Túrkistan oblysyndaǵy balýannyń týǵan jerinen ákelinedi. 2001 jyly ashylǵan bul mýzeı qoryndaǵy turmystyq buıymdar, belbeýler men marapattar kelýshilerdiń nazaryna usynylady.
«Qajymuqannyń 155 jyldyq mereıtoıy – bul týrnırdi ótkizýdiń basty sebepteriniń biri. «Ardager Alańy» jarysy ár býyn balýandaryn biriktirip, qazaq sportyndaǵy uly tulǵanyń murasyn taǵy bir márte dáripteýge múmkindik beredi», dep túıindedi óz sózin Almaty qalasy kúres federasııasynyń vıse-prezıdenti.
Imanjúsip, Balýan Sholaq, Qajymuqan urpaqtary jastarmen júzdesti
