– Bizge qoqystyń shashylyp jatýy qalypty jaǵdaıǵa aınalyp, sanaǵa sińgen. Kóktemde senbilikke shyǵamyz. Máre-sáre bolyp ony tazalaımyz. Iá, qar astynan qaldyqtardyń qaraýyta bastaǵanyna kóz úırengen. Al órkenıetti elderde plastık bótelke men polıetılen paketter – baǵa jetpes shıkizat, taptyrmas energııa kózi. Shyndyqty aıtaıyn, bizge naýqandyq senbilik emes, qoqysty tolyqqandy suryptaý men qaıta óńdeý júıesi qajet. «Taza Qazaqstan» degenimiz sol bolar edi, – deıdi Iаssa.
Jas ta bolsa, ıgi iske bas bolyp júrgen jigit basqa da belsendilermen birlese tazalyq jumysyn uıymdastyrady. Ol bireýge mindet artyp, tehnıka suramaıdy, óz jumysyn jarqyratyp álem jelige kórsete de bermeıdi. Úndemeı júrip úlken is tyndyryp júr. Usynys-pikirine qulaq túre otyryp, zaýyt salýǵa ne kedergi dep suradym.
– Qoqys óńdeıtin tehnologııa bar, nıet te joq emes. Tek bılik tarapynan naqty tetikter, «Damý» nemese «Atameken» qory arqyly jeńildetilgen nesıeler men ınvestorlarǵa jasalatyn jaǵdaı jetispeıdi. Shıkizat halyqtyń qolynda, tek sony júıeli arnaǵa túsiretin saıası erik pen kásipkerlik belsendilik kerek, – deıdi keıipkerimiz.
О́ziniń tyń ıdeıasy men azamattyq ustanymy bar jigittiń aıtýynsha, balany jórgektegi kezinen bastap tabıǵatty aıalaýǵa, otansúıgishtikke baýlymasaq, erteń kesh bolady. Al sanaǵa sóz qonbasa, zań sóıleýge tıis dep esepteıdi.
– Tártipke baǵynǵysy kelmegenge aıyppuldan basqa em joq. Kameralardy kóbeıtip, profılaktıkany kúsheıtý – qoǵamdy saýyqtyrýdyń bir joly. Jaqsy sózben uqpaǵandy zańnyń temirdeı tártibi túzetedi. Álbette, zań jalpyǵa birdeı áreket etýge tıis, – deıdi Iа.Táńir.
Iаssa tek senbilikterde emes, jalpy qoǵamda belsendi. Ol qurǵan «Sero» qoǵamdyq birlestiginiń jumysy qur uran ǵana emes. Olardyń ár qadamy ǵylymı zertteýge súıenedi. Máselen, aıta-aıta jaýyr bolǵan О́skemendegi kók tútinniń basty sebebi tek zaýyttar emes, kólikterden kóterilgen usaq dıspersti shań men jeke sektordyń tútini ekenin táýelsiz saraptamadan ótkizip dáleldep berdi.
Halyqaralyq yntymaqtastyq tanytyp, sheteldik volonterlermen de selbesip jumys istesedi. Reseılik volonter Alekseı Sıbırskıımen birlese otyryp, keıingi eki jylda Shyǵys pen Soltústik Qazaqstan óńirlerinde 150 myńnan asa aǵash egýge atsalysty. Bul – qaǵaz betindegi esep emes, bolashaq urpaqtyń tynysy, taza aýasy.
– Ákimdikte de jalyndy jastar az emes. Búginde memleket pen volonterler arasynda syndarly dıalog ornaǵan. Tehnıkalyq qoldaý, qural-saıman, aqparattyq demeý baǵytynda memlekettik qoldaýdyń sheti kórinip keledi, – dep memleketten kórsetiletin qoldaýdy da atap ótti ol.
Alaıda eń basty másele – beıjaılyq. Árbir azamat óz aýlasynyń tazalyǵyna ózi jaýapty ekenin sezingende ǵana ekologııalyq daǵdarysty jeńýge bolady. Tazalyq tabaldyryqtan emes, ár adamnyń ishki mádenıeti men sanasynan bastalady.
Shyǵys Qazaqstan oblysy
