Tańerteńnen bastap alańǵa adamdar aǵylyp, áskerı orkestrlerdiń ónerin, saptyq kórsetilimderdi jáne tehnıka kórmesin tamashalady. Baǵdarlamanyń negizgi bóliginde birikken áskerı orkestrler men Qurmet qaraýyly rotasy óner kórsetti. Áskerı qyzmetkerler qarýmen kúrdeli qımyldar jasap, joǵary deńgeıdegi úılesimdilikterin kórsetti.
Konsertke Qazaqstan Qarýly kúshteriniń Ulttyq áskerı-patrıottyq ortalyǵynyń, Memlekettik kúzet qyzmetiniń, Ulttyq ulan men UQK Shekara qyzmetiniń orkestrleri qatysty. Olar áskerı marshtarmen qatar qazaq ánderin de zamanaýı úlgide oryndady.
Merekelik shara barysynda áskerı tehnıka men qarý-jaraq kórmesi de uıymdastyryldy. Kelýshiler brondy kólikterdi kórip, keı tehnıkalardyń ishine kirip, sýretke túsýge múmkindik aldy.
Kópshiliktiń erekshe qyzyǵýshylyǵyn zamanaýı robottandyrylǵan júıeler týdyrdy. Tótenshe jaǵdaılar mınıstrliginiń mamandary órt kezinde qoldanylatyn tórt aıaqty Unitree B2 Fire robotyn tanystyrdy. Sonymen birge jańa býyndaǵy ushqyshsyz ushý apparattary da kórsetildi.
Shara sońynda birikken orkestr patrıottyq shyǵarmalardy oryndap, kórermender uzaq ýaqyt tarqamaı, tehnıka janynda sýretke túsip, áserlerimen bólisti. Kóptegen astanalyq úshin bul kún armııa men qoǵamnyń birligin aıqyndaıtyn erekshe merekege aınaldy.
