Prezıdentke Qytaı Halyq Respýblıkasynda uıymdastyrylǵan Alatau City Roadshow qorytyndysy týraly málimet berildi.
Qanat Bozymbaev halyqaralyq tanystyrylym aıasynda 20 is-shara men birqatar kezdesý ótkenin aıtty. Nátıjesinde jalpy somasy 6,4 mıllıard dollar bolatyn 30 kelisim men memorandýmǵa qol qoıylǵan. Shenchjen qalasynyń meri Sın Veıchjýnmen, Gonkong Arnaıy ákimshilik aýdanynyń Basshysy Djon Lımen, sondaı-aq iri halyqaralyq kompanııalardyń jetekshilerimen júzdesýde Alataý qalasynyń ınvestısııalyq múmkindikteri tanystyrylǵan.
Sondaı-aq Qasym-Jomart Toqaevqa jýyrda Almaty oblysyna sapary kezinde bergen tapsyrmalaryn eskere otyryp jasalǵan jumys jospary baıandaldy.
Memleket basshysy sý resýrstary salasyndaǵy jobalardyń júzege asyrylýy, sonyń ishinde gıdrotehnıkalyq qurylystardy jańǵyrtý, jańa sý qoımalary men kanaldar salý týraly esepti tyńdady.
Budan bólek, kezdesýde «Energetıkalyq jáne kommýnaldyq sektorlardy jańǵyrtý» ulttyq jobasynyń oryndalý barysy qarastyryldy. Bıyl turǵyn úı-kommýnaldyq sharýashylyq ınfraqurylymyn jańartýǵa 1,1 trıllıon teńgeden astam qarjy bólinedi. Bul – táýelsizdik jyldarynda salaǵa baǵyttalǵan eń qomaqty soma. Qarjylandyrýdy otandyq jáne halyqaralyq qarjy ınstıtýttary qamtamasyz etedi. Atalǵan sharalar úsh jyl ishinde kommýnaldyq jelilerdiń tozýyn 40 paıyzǵa deıin qysqartady.
Memleket basshysy energetıkalyq jáne kommýnaldyq ınfraqurylymdy jańǵyrtý jobalaryna otandyq taýar óndirýshilerdi keńinen tartý qajettigine nazar aýdardy.
Sonymen qatar Prezıdent elimizdegi, ásirese, ońtústik oblystardaǵy vegetasııa kezeńin aıryqsha baqylaýdy ustaýdy tapsyrdy.
Qasym-Jomart Toqaev Alataý qalasyn damytýǵa arnalǵan ornyqty model qalyptastyrýdyń, dúnıe júzinen kapıtal tartyp, ınnovasııalardy ıgerý úshin qolaıly orta qurýdyń mańyzyna toqtaldy. Úkimetke Alataý qalasynyń ınfraqurylymyna qajetti qarjy bólý mindetin júktedi.
