Keıipkerimiz Alash arystarynyń atamekeni – Aqtoǵaıda dúnıege kelgen. Qaraǵandy memlekettik medısına ınstıtýtynyń emdeý fakýltetine oqýǵa túsip, ony «Emdeý isi» mamandyǵymen sátti aıaqtaǵan, jalyndap turǵan jas maman aýdandyq aýrýhanada sheberligin shyńdady. Kúndiz-túni tynym kórmeı, soqyrishek aýrýynan bastap, pyshaq jaraqaty, jol-kólik oqıǵasynan túsken aýyr naýqastar men túrli synyqqa deıin operasııa jasap, hırýrgııanyń úlken mektebinen ótti. Sóıtip, qıyndyǵy men qyzyǵy qatar órbigen jyldar bolashaq bilikti mamannyń kásibı turǵydan ósýine septigin tıgizdi.
Keıin otorınolarıngologııa (LOR) baǵytynda mamandanýdan ótip, bul tańdaý onyń kásibı ómirindegi jańa belesine aınaldy. Balqash qalalyq ortalyq aýrýhanasynda 10 jyldan astam ýaqyt LOR dárigeri bolyp qyzmet etip, qalǵan sanaly ǵumyryn Qaraǵandy óńiriniń medısınasyn damytýǵa arnady. Qaraǵandy qalasyndaǵy №1 О́ńirlik medısınalyq birlestikte, keıinnen oblystyq kópprofıldi ambýlatorııalyq hırýrgııa ortalyǵynda bólim meńgerýshisi bolyp qyzmet etip, uıymdastyrýshylyq qabiletimen tanyldy. 2013 jyldan beri H.Maqajanov atyndaǵy kópbeıindi aýrýhananyń (burynǵy oblystyq medısınalyq ortalyq) otorınolarıngologııa bólimshesiniń meńgerýshisi qyzmetin abyroımen atqaryp keledi.
Nurlan Qulmaǵambetuly – oblysta LOR-hırýrgııa salasyna zamanaýı tehnologııalardy alǵash bolyp engizgen jańashyl maman. Ol 2016 jyly oblys kóleminde tuńǵysh ret tımpanoplastıka operasııasyn jasady. Jeńil anestezııamen jasalatyn bul operasııa memlekettik kepildendirilgen kómek aıasynda tolyǵymen tegin júzege asyrylady, nátıjesinde, naýqastardyń 90%-ynda estý qabileti tolyǵymen qalpyna keledi. Bólimshe bazasynda Qaraǵandy medısına ýnıversıtetiniń LOR-kafedrasynyń ornalasýy da emdeý sapasyn ǵylymı deńgeıge kóterdi.
Sonymen qatar hırýrg óńirde alǵashqylardyń biri bolyp vıdeoendoskopııalyq qurylǵy (LOR-stoıka) arqyly operasııa jasaý ádisin engizdi. Buryn qulaq ishine kirý baǵytynda úlken tilik jasalyp, balǵamen urý sııaqty aýyr ári jaraqatty ádister qoldanylsa, qazir operasııa múldem tiliksiz, qansyz oryndalady. Bul jańalyq naýqastardyń tez saýyǵýyna septigin tıgizdi. Burynyraqta naýqastar operasııadan soń aılap aýrýhanada jatsa, qazir zamanaýı apparattyń arqasynda 3–4 kúnde jazylyp shyǵady.
Búginde tájirıbeli dáriger qyzmet etetin bólimshe – Qaraǵandy oblysy kóleminde shuǵyl operasııa jasaıtyn jalǵyz LOR-bólimshe. Munda qulaqtan nemese gaımor pazýhasynan iriń mıǵa shaýyp, menıngoensefalıt, bas mıynyń abssesi sııaqty aýyr asqynýmen keletin naýqastarǵa der kezinde operasııa jasalyp, qajet jaǵdaıda neırohırýrgtermen, oftalmologtermen birlesken kúrdeli operasııalar da sátti júzege asyrylady.
Isker, izdengish maman kúndelikti ómirde antromastoıdotomııa, muryn perdesin rezeksııalaý, tonzıllektomııa sekildi kóptegen josparly, shuǵyl operasııany jasaýmen qatar, plastıkalyq hırýrgııa baǵytyn da sátti meńgerip, muryn aqaýlaryn túzetý arqyly pasıentterge densaýlyq qana emes, senimdilik te syılap keledi.
Joǵary sanatty dáriger kásibı biliktiligin arttyrý maqsatynda Germanııada, Reseıde (Sankt-Peterbýrg, Qazan), Almaty qalasynda birneshe ret arnaıy kýrstardan ótti. Sondaı-aq ol jınaǵan tájirıbesin shákirtterine baǵyt-baǵdar retinde berip keledi.
Búginde Nurlan Qulmaǵambetuly áriptesteriniń arasynda zor qurmetke, myńdaǵan emdelýshilerdiń sheksiz alǵysyna bólengen jan. О́ziniń negizgi qyzmetimen qatar oblystyń shtattan tys bas otorınolarıngologi retinde de óńirdegi osy salanyń jumysyn úılestirip otyr.
Altyn qoldy hırýrgtiń medısınadaǵy 40 jyldan asa qajyrly eńbegi elenip, «Densaýlyq saqtaý isiniń úzdigi» tósbelgisimen, «Altyn dáriger», «Eńbek ardageri» medaldarymen, elimiz kóleminde sanaýly mamanǵa ǵana buıyrǵan Ál-Farabı atyndaǵy otorınolarıngologııanyń jeke medalimen marapattalǵan. Sondaı-aq Qaraǵandy oblysy ákiminiń «Úzdik hırýrg» syılyǵynyń ıegeri. Tájirıbeli dáriger ótken jolyna qarap, kásibı turǵydan qalyptasýyna baǵyt-baǵdar bergen tálimgerlerin erekshe iltıpatpen eske alady.
– Meniń mundaı kásibı jetistikke jetýime eń aldymen ustazdarym – joǵary sanatty, bilikti hırýrgter Qýat Raqymjan men Juma Shaıahmetovtiń septigi tıdi. Osy bir kúrdeli de jaýapty salanyń qyr-syryn úıretip, LOR-hırýrgııaǵa baýlyǵan da osy kisiler edi. Sol aldyńǵy tolqynnan alǵan bilim men tájirıbeniń arqasynda qazir ózimiz de ustaz atandyq, – deıdi Nurlan Qulmaǵambetuly.
«Ustazy jaqsynyń – ustanymy jaqsy» degen, búginde keıipkerimizdiń sońynan ergen 100-ge tarta shákirti bar. Shákirtteri elimizdiń túkpir-túkpirindegi túrli medısınalyq mekemelerde halyqtyń alǵysyna bólenip júr. Bul – dáriger úshin marapat ataýlynyń bárinen de bıik, eń úlken mártebe.
Altyn qoldy dárigerdiń san salaly, aýyr qyzmetindegi eń úlken tiregi de, shabyt kózi de – berekeli shańyraǵy. Aıaýly jary Maqpal – ótken jyldary iri korporasııada aýdıt salasyn basqarǵan bilikti ekonomıst, búginde beınettiń zeınetin kórip otyrǵan asyl ana, ardaqty áje. Ekeýi ósirip-jetkizgen perzentteri de qoǵamnan óz oryndaryn tapqan bilikti mamandar. Uly Baýyrjan zań salasynda jaýapty qyzmet atqarady, qyzy Baıan – bank salasynyń qyzmetkeri. Búginde Nurlan dárigerdiń Ámirlan, Álıhan, Ádına esimdi súıkimdi nemereleriniń qyzyǵyna toımaı, olardyń árbir jetistigine balasha qýanyp, baqytqa kenelip otyrǵan jaıy bar.
Qaraǵandy oblysy
