Jarys kúndeligi

4 mın

oqý úshin

Úsh saıystan túrli jas ereksheligi boıynsha Sıýıchjoýda (Qytaı) ótken Azııa chempıonatynyń alǵashqy kúni elimizdiń ánurany eki márte shyrqaldy. U-17 jarysynda Ramazan Áınegov, U-15 saıysynda Iаsmına Býzýrtanova aldyna jan salmady. Kelesi kúni quramynda Gor Depershmıdt, Alham Murat, Kalerııa Shneıder, Alýa Nurmuhamet syndy sportshylary bar komanda (U-17) aralas estafetada qolaǵa qol jetkizdi.

Ǵalym SÚLEIMEN

Gýardamar-del-Segýrada (Ispanııa) múmkindigi shekteýli shahmatshylar arasynda týrnır uıymdastyryldy. Oǵan 15 memleketten kelgen 44 úmitker qatysty. Jarysty elimizdiń quramasy 9 júldemen qorytyndylady. Ásel Amangeldi eki ret altynnan alqa taqsa, Baqytjan Maıkenov pen Arýjan Baıdildá da dál sondaı qurmetke bólendi. Sondaı-aq otandastarymyz 3 kúmis pen 2 qola medaldy qorjynǵa saldy.

5–11 shilde kúnderi Kalıde (Kolýmbııa) jalaýy jelbireıtin jastardyń álem chempıonatynda elimizdiń úsh aýyr atleti kúsh synasady. Olar – jasóspirimder arasynda Azııa oıyndarynyń jeńimpazy Nurjan Jumabaı (88 kg), sol jarystyń qola júldegeri Nursıla Berikbol (58 kg), jastardyń álem birinshiliginde úshinshi oryn ıelengen Ernur Myrzahmet (79 kg).

Qyrkúıek aıynda tennısten Leıver kýbogi ótedi. Sol jarysta Álem quramasy sapynda Ben Shelton (AQSh, ATR №5), Aleks de Mınaýr (Aýstralııa, №6), Teılor Frıtspen (AQSh, №9) birge bizdiń Aleksandr Býblık te (№11) óner kórsetedi. Olar quramynda Karlos Alkaras (Ispanııa, ATR №2), Aleksandr Zverev (Germanııa, №3) Flavıo Kobollı (Italııa, №10), Iаkýb Menshık (Chehııa, №16) syndy sańlaqtary bar Eýropa komandasyna qarsy oınaıdy.

Qazirgi bessaıystan Majarstan astanasy – Býdapeshte ótken Álem kýboginiń kezeńdik saıysynda otandastarymyz sátsiz óner kórsetti. Eń úzdik kórsetkish Temirlan Ábdiraıymovqa tıesili. Jartylaı fınalda súringen ol 16-oryndy qanaǵat tutty. Qalǵan sportshylardyń nátıjeleri tipti tómen.

25 shildede Almatyda ótetin kásipqoı boks keshinde Álı Ahmedov (25-2, 17 KO) OAR-dyń ókili Asemahl Vellemmen (11-2-1, 6 KO) kúsh synasady. Bul jekpe-jekte IBO nusqasy boıynsha jartylaı aýyr salmaqtyń chempıondyq belbeýiniń ıegeri anyqtalady.

Shveısarııanyń Nonynda fýtboldan 2027 jyly jastar arasynda jalaýy jelbireıtin Eýropa birinshiliginiń (U-19) irikteý týrnıriniń ekinshi kezeńiniń jerebesi tartyldy. «A» tobyna túsken jerlesterimiz Belgııa, Shotlandııa, Kosovoǵa qarsy oınaıdy. Bul básekeler 11–17 qarasha aralyǵynda Shotlandııada ótedi.

Badmıntonnan el quramasy Erevandaǵy «European Youth Gran Prix» týrnırinde bes júlde oljalady. Jalǵyz Arslan Ormanovtyń ózi úsh ret jeńis tuǵyryna kóterildi. Ol jekelgen saıysta aldyna jan salmasa, juptyq, aralas juptar básekesinde qola medalǵa ıe boldy. Veronıka Moıseenko bir kúmis, bir qola medal enshiledi.

19 maýsymda Úndistannyń astanasy – Nıý-Delıde semserlesýden Azııa chempıonaty bastalady. Bes kúnge sozylatyn básekede elimizdiń 23 noıany óner kórsetedi. Olar – Rýslan Qurbanov, Erlik Sertaı, Nıkıta Jýlınskıı, Kırıll Prohodov, Vadım Sharlaımov, Vladıslava Andreeva, Irına Bakaldına, Sofııa Nıkolaıchýk, Darıa Samodelkına (shpaga); Artıom Sarkısıan, Baqdáýlet Quralbekuly, Janat Nábıev, Nazarbaı Sattarhan, Áıgerim Sarybaı, Karına Dospaı, Qaısha Janybek, Anastasııa Gýlık (qylysh), Temirlan Qalıev, Ǵalym Nurymov, Tımofeı Semenov, Sofııa Aqtaeva, Alıona Gnoeva, Alına Iskanderova (rapıra).