Kóshpeli otyrys BAQ ókilderiniń ýnıversıtettiń ǵylymı-ınnovasııalyq áleýetin tanystyrýmen bastaldy. Jýrnalıster QazUÝ-dyń ozyq ǵylymı ortalyqtarynyń jumysymen tanysyp, Qazaqstan − Qytaı «Qashyqtyqtan zondtaý tehnologııalary jáne olardy qoldaný» birlesken zerthanasy, Farabi Supercomputer Center jáne Mı ınstıtýty, Farabi Hub ınnovasııalyq ónimder ortalyǵy men Farabi Robotics robototehnıka ortalyǵyn aralady.
Osy shara aıasynda «Quantum AI» zerthanasynyń saltanatty ashylý rásimi ótti. Aqparattyq tehnologııalar jáne jasandy ıntellekt fakýltetiniń bazasynda qurylǵan jańa ǵylymı-bilim berý ortalyǵy respýblıka aýmaǵyndaǵy balamasyz ári teńdessiz ınnovasııalyq ortalyq sanalady.
Kóshpeli otyrysty QazUÝ basqarma tóraǵasy-rektor Janseıit Túımebaev ashyp, BAQ qyzmetkerlerin kásibı merekesimen quttyqtady. Ýnıversıtet basshysy zamanaýı medıa keńistiktegi básekelestik zamanynda sapaly kadr daıarlaýdyń mańyzyn atap ótip, oqý ornynyń jýrnalıstıka salasyndaǵy tarıhı mıssııasyna toqtaldy.
«Ál-Farabı atyndaǵy QazUÝ – otandyq jýrnalıstıka biliminiń altyn besigi, qara shańyraǵy bolyp qala beredi. Biz úshin jýrnalıst daıarlaý – jaı ǵana dıplom berý emes, eldik múddeni tý etken, sózine de, isine de jaýapty tulǵa qalyptastyrý», dedi Janseıit Túımebaev.
О́z kezeginde Qazaqstan jýrnalıstıka akademııasynyń prezıdenti Saǵymbaı Qozybaev áriptesterin quttyqtap, ádiletti Qazaqstandy qalyptastyrýdaǵy baspasóz ókilderiniń mańyzdy mıssııasyn atap ótti.
Aıtýly shara barysynda otandyq jýrnalıstıkanyń damýyna eleýli úles qosqan sala úzdikterine arnaıy marapattar men alǵys hattar tabystaldy.
QazUÝ endi kvanttyq kompıýterde jumys isteıtin kadrlar daıarlaý isine basymdyq beretin bolady. Osy oraıda «Quantum AI» zerthanasynyń mańyzy zor. Aýqymdy joba aldyńǵy qatarly kvanttyq júıelerdi óndirýge mamandanǵan SpinQ Technology (QHR) halyqaralyq tehnologııalyq kompanııasynyń qoldaýymen júzege asyryldy.
Jańa ortalyqqa zamanaýı jeti kvanttyq esepteý júıesi jetkizildi. Búgingi tańda bul – Qazaqstan aýmaǵyndaǵy jalǵyz kvanttyq kompıýterler. Biregeı jabdyqtar stýdentter men izdenýshilerge oqý sabaqtary men zerthanalyq jumystardy joǵary deńgeıde júrgizýge, kúrdeli ǵylymı-zertteý jobalaryn oryndaýǵa jáne mashınalyq oqytýdyń biregeı algorıtmderin ázirleýge múmkindik beredi.
Saltanatty sharada rektor Janseıit Túımebaev bul qadamnyń ýnıversıtetti álemdik deńgeıdegi zertteý ortalyǵyna transformasııalaýdaǵy róli zor ekenin qadap aıtty.
«Qazirgi ýaqytta jasandy ıntellekt, úlken derekter men kvanttyq esepteýler álemdik ǵylym men ekonomıkanyń jańa baǵytyn aıqyndap otyr. Kvanttyq tehnologııalar men JI ıntegrasııasy krıptografııa, medısına jáne kúrdeli júıelerdi modeldeý salasyndaǵy buryn klassıkalyq kompıýterlerdiń qaýqary jetpegen eń kúrdeli mindetterdi sheshýge jol ashady», dedi ýnıversıtet basshysy.
Rektor óz sózinde bilim, ǵylym jáne óndiristi ushtastyrý baǵyty jalǵasatynyn, al zerthana nátıjeleri elimizdiń tehnologııalyq egemendigin nyǵaıtýǵa septigin tıgizetinine senim bildirdi.
Aqparattyq tehnologııalar jáne jasandy ıntellekt fakýltetiniń dekany Tımýr Imanqulovtyń aıtýynsha, otandyq mamandar ozyq jabdyqtarmen jumys isteýge tolyq daıyn. Jańa zerthana joǵary kýrs stýdentterine tájirıbeli tálimgerlermen birlesip, naqty óndiristik jobalarǵa qatysa alatyn ashyq platforma retinde qyzmet etedi. Bul baza fakýltet túlekteriniń halyqaralyq eńbek naryǵyndaǵy básekege qabilettiligin aıtarlyqtaı arttyrady.
ALMATY
