Ol kezden beri kóp nárse ózgerdi. Shırek ǵasyrǵa jýyq ýaqyt ıininde Fransııa quramasy órleý kezeńin bastan keshirdi. Aıtalyq, 2018 jyly ekinshi ret álem chempıony atansa, 2006, 2022 jyldary kúmis medaldi moıyndarynda jarqyratty. 2016, 2024 jyldary Eýropa chempıonattarynda ekinshi, úshinshi oryndy enshiledi. 2021 jyly ÝEFA-nyń Ulttar lıgasynda top jaryp, 2024 jyly Parıj Olımpıadasynda kúmispen kúpteldi. Al alǵashqy álem chempıonatynda shırek fınalǵa deıin jetip, aıdy aspanǵa bir-aq shyǵarǵan Senegal odan keıin taǵy úsh mýndıalda baq synady. Sonymen qatar «arystandar» Afrıka Ulttar kýbogin bir márte utyp, úsh ret fınalda oınady.
Ist-Raterfordtaǵy (AQSh) «Metlaıf-stedıýmda» ótken matchta Fransııa quramasy birinshi taımda kóbirek shabýyldaǵanymen, qaqpaǵa birde-bir dál soqqy jasaı almady. О́zgelerdi aıtpaǵanda, maqtaýly Kılıan Mbappe men Ýsman Dembeleniń ózderi de túk bitirgen joq. Juldyzdardyń ár qadamyn jiti baqylaǵan qarsy jaqtyń qorǵaýshylary olarǵa adym ashtyrmady. Sol sekildi Senegaldyń da talpynysy oń nátıje bermedi. Shabýyl shebindegi Sadıo Mane men Nıkolas Djekson bul keshte erkin oıqastaı almady.
Úzilisten keıin oıyn kartınasy túbegeıli ózgerdi. Fransýzdar batyldyraq shabýyldaı bastady. 52-mınýtta Maıkl Olıse sol qaptaldan bir oıynshyny aldap ótip, qaqpaǵa qaraı dopty qaqyrata tepti. Edýar Mendı ony keri qaıtardy. Kóp uzamaı Kılıan Mbappe qaqpaǵa eki márte qaýip tóndirdi. Alǵashqyda Senegaldyń kıperi soqqyǵa tosqaýyl qoısa, ekinshi epızodta qorǵaýshy saýatty oınady. Alaıda qaısar minezdi Kılıan báribir óz degenine jetti. 66-mınýtta Olıseniń tamasha pasyn golǵa aınaldyrdy – 1:0. 82-mınýtta alańǵa endi shyqqan Bredlı Barkolı oń qaptaldan sýyrylyp shyǵyp, nysanany dál kózdedi – 2:0. Negizgi ýaqytqa tóreshi segiz mınýt qosty. Sol aralyqta dop taǵy eki ret torda týlady. 90+5 mınýtta Ibragım Mbaıe esep aıyrmashylyǵyn qysqartsa, 90+6 mınýtta Kılıan Mbappe dýbl avtory atandy – 3:1.
«I» tobyndaǵy kelesi kezdesý Irak pen Norvegııa quramalary arasynda ótti. Skandınavııalyqtardyń sapynda Erlıng Holann men Martın Edegor syndy sańlaqtar bar. Bul kúnderi biri «Manchester Sıtıde», ekinshisi «Arsenalda» jasyndaı jarqyldap júr. Ekeýi de álemdik deńgeıde moıyndalǵan tulǵalar. Biraq birinshi kezekte fýtboldyń komandalyq oıyn ekenin de esten shyǵarmaǵan jón. Aıqas alańyndaǵy barlyq oıynshyǵa úlken jaýapkershilik júkteledi. Eger de bir pozısııadan aqaý shyqsa nemese bir fýtbolshy osaldyq tanytsa, onyń aqyry orny tolmas ókinishke ákep soqtyrýy múmkin. Sol turǵyda «Norvegııa sapyndaǵy oıynshylardyń barlyǵy da myqty» dep aıtýdan aýlaqpyz.
Desek te bul matchta norvegııalyqtar aýtsaıderlerdi ońdyrmaı utty. 29, 43-mınýttarda Erlıng Holann, 76-mınýtta Leo Estıgor mergendik tanytty. Tóreshi belgilegen qosymsha ýaqytta Aımen Hýsseın óz qaqpasyna gol saldy. Onyń aldynda ǵana osy shabýylshy qarsylastar qaqpasyn dál kózdegen edi. Esep – 4:1.
Tań ata sońǵy álem chempıonatynda qarsylas shaq keltirmeı, bas júldeni oljalaǵan Argentına fýtbolshylary jasyl alańǵa shyqty. Osydan tórt jyl buryn Qatarda ótken dodanyń alǵashqy aınalymynda argentınalyqtardyń Saýd Arabııasynan jeńilgenin jankúıerler umyta qoıǵan joq. Esesine odan keıingi oıyndarda olar barlyq básekelesinen basym túsip, FIFA-nyń Altyn kýbogin Ońtústik Amerıkaǵa áketti. Bıylǵy dodada «J» tobyna túsken Lıonel Skalonıdiń shákirtteri alǵashqy oıynyn Aljırge qarsy ótkizdi.
Kanzas-Sıtıdegi (AQSh) 76 416 kórermen syıatyn «Erroýhed Stedıýmde» ótken aıqas Lıonel Messıdiń benefısi boldy. Ulttyq qurama sapynda 200 ret jasyl alańǵa shyqqan «Atomdy búrgeniń» (Messıdiń bir laqap aty) esimi dúnıejúzilik dop dodasyna alty ret qatysqan tuńǵysh fýtbolshy retinde tarıhta qaldy. Dál osyndaı mereıli kúni ol jasyndaı jarqyldady. 24 shildede 39 jasqa tolǵaly otyrǵan Argentınanyń dúldúli dańqty Zınedın Zıdannyń uly – Lıýka qorǵaǵan qaqpany úsh márte dál kózdep, het-trık jasady – 3:0. Sóıtip, Messı álem chempıonattary tarıhyndaǵy eń mergen oıynshylardyń saıysynda nemis Mıroslav Klozeni qýyp jetti. Eki juldyzdyń árqaısysynyń enshisinde 16 goldan bar. Báseke barysynda Aljır de bir dop soqqan edi. Biraq gol ofsaıd anyqtalyp, esepke alynbady.
Osy «J» tobyndaǵy kelesi matchta da iri esep tirkeldi. Bul básekede Aýstrııa Iordanııany 3:1 esebimen utty. 21-mınýtta Romano Shmıd esep ashsa, 50-mınýtta Álı Olvan tarazy basyn teńestirdi. Alaıda bul nátıjege qanaǵattanbaǵan eýropalyqtar tolassyz shabýyl uıymdastyryp, onyń aqyry Iаzan Álarabtyń avtogoly, Marko Arnaýtovıchtiń 11 metrlik núkteden gol soǵýymen aıaqtaldy.
