Statıstıkalyq málimetterge súıensek, Qazaqstandaǵy kásipodaq uıymdaryna 2 mıllıonǵa jýyq adam múshe bolsa, sonyń ishinde 700 myńy jastar kórinedi. Respýblıka boıynsha jaldamaly jumyskerler sanynyń 6 mln shamasynda ekenin eskersek, kásipodaqtarǵa múshe azamattar sany 33 paıyzdy quraıdy.
«Respýblıkadaǵy kásipodaqtardyń mindeti jumysshylardyń quqyqtaryn túsindirý jáne qorǵaý. Bizdiń federasııa eldiń túkpir-túkpirinde byltyr qabyldanǵan jańa «Eńbek kodeksi» men 2014 jyly qabyldanǵan ózimizdiń «Kásipodaqtar týraly» Zańdy túsindirý jumystaryn júrgizýde», - deıdi QR Kásipodaqtar federasııasynyń tóraǵasy Ábilǵazy Qusaıynov.
«Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasynyń negizgi mindettemelerin júzege asyrý áleýmettik jańartýdyń kepili», - deıdi kásipodaq qozǵalysy ókilderi.
Sonymen qatar, federasııa tóraǵasy mekemelerdiń qaramaǵyndaǵy qyzmetkerler quqyǵyn buzý máselesi týraly da pikirimen bólisti. «Qazirgi ýaqytta jumys berýshilerdiń tarapynan jumyskerlerdiń quqyqtarynyń buzylý derekteri azaıyp keledi. О́ıtkeni daýlasqan taraptar máseleni zańǵa júgine otyryp sheshetin bolǵan. Degenmen biz de bosańsymaı jumyskerler quqyqtaryn qorǵaý men onyń buzylýynyń aldyn alý sharalaryn turaqty ótkizip turamyz. Máselen, 2017 jyldyń alǵashqy toqsanynyń ózinde biz respýblıka boıynsha 2 myńdaı azamatty qabyldadyq. Olardyń bizge aryzdanyp kelgende aıtatyn máseleleri negizinen jumysqa turý, negizsiz jumystan qýylý jáne jalaqynyń ýaqytyly tólenbeýi. Kásipodaqtar bul máselelerdiń bárin sheshýge tıisti memlekettik organdardy tartyp, eshbir azamattyń aryzyn bos qaıtarmaýǵa tyrysady», - deıdi Ábilǵazy Qusaıynov.
Aıta keteıik, Qazaqstanda jumysshylardyń quqyqtarynyń buzylý derekteriniń basym kópshiligi ýaqytyly jalaqynyń tólenbeýi ekeni anyq. Bul ásirese jeke menshik sektorǵa qatysty. Osy oraıda Kásipodaqtar federasııasy tóraǵasy mundaı máselelerdi Eńbek jáne halyqty áleýmettik qorǵaý mınıstrligimen jáne Bas prokýratýramen birlesip sheshetinin aıtty.
Baýyrjan MUQANOV
"Egemen Qazaqstan"
