Kezdesý barysynda Memleket basshysy halyqaralyq arenada bedeldi ári irgeli ınstıtýttardyń biri sanalatyn Musylman aqsaqaldar keńesiniń elimizde júzege asyryp jatqan mańyzdy jobalary men bastamalaryna qoldaý bildirdi.
Prezıdenttiń aıtýynsha, toleranttylyq jáne beıbit ómir súrý qaǵıdattaryn, sondaı-aq gýmanızm qundylyqtaryn ornyqtyrýda ıslam dininiń mańyzy aıryqsha, mundaı ustanym Qazaqstannyń saıasatymen tolyq úndesedi.
Memleket basshysy Uıymnyń Ortalyq Azııadaǵy alǵashqy ókildigi elimizde ashylǵanyn erekshe iltıpatpen qabyldaǵanyn jetkizdi.
Qasym-Jomart Toqaev sheıh Zaıd atyndaǵy «Adamzat baýyrlastyǵy» syılyǵy birlik pen jaýapkershilik qundylyqtaryn dáripteıtin halyqaralyq bedeldi marapattardyń birine aınalǵanyna toqtalyp, bul rásimniń jahandyq dıalog jáne yntymaqtastyqty damytý isine qosqan úlesin joǵary baǵalady.
Muhammed Ábdelsalam qonaqjaılyq tanytqany úshin Qasym-Jomart Toqaevqa rızashylyǵyn bildirdi. Sondaı-aq Astanada uıymdastyrylatyn Álemdik jáne dástúrli dinder kóshbasshylary seziniń jumysyna belsendi atsalysa beretinin aıtty.
Ol bıylǵy sheıh Zaıd atyndaǵy «Adamzat baýyrlastyǵy» syılyǵynyń Ázerbaıjan men Armenııaǵa berilgenin jáne eki el arasynda beıbit kelisim jasaýǵa Qazaqstannyń erekshe úles qosqanyn atap ótti.
Sóz sońynda Memleket basshysy Keńestiń Prezıdenti, Ál-Azhardyń bas ımamy sheıh Ahmed at-Taıebke izgi sálemin joldady.
Qazaqstan Prezıdentiniń Jarlyǵymen Muhammed Ábdelsalam konfessııaaralyq dıalogty jáne gýmanıtarlyq qundylyqtardy damytýǵa qosqan eleýli úlesi úshin I dárejeli «Dostyq» ordenimen marapattaldy.
