Qurlyq áskerleriniń bas qolbasshysy general-maıor Mereke Kóshekbaev maıdangerge Qorǵanys mınıstriniń atynan alǵys hat, estelik syılyqtar men maıdan kezin eske salatyn dalalyq as úlesin tabystady. Ol ardagerdiń erligi qazirgi áskerı qyzmetkerler úshin úlken úlgi ekenin atap ótti.
Sonymen qatar, Qorǵanys mınıstrligi Rzaǵul Baıkeshevtiń qurmetine arnaıy áskerı parad uıymdastyrdy. Saltanatty shara barysynda qurmet qaraýyly men áskerı kolledj kadetteri sap túzep ótti. Al áskerı orkestr men ónerpazdar soǵys jyldaryndaǵy ánderdi oryndady.
Ardager kórsetilgen qurmetke rızashylyǵyn bildirip, áskerı qyzmetshilerge aq batasyn berdi. Ol Qazaqstannyń tynyshtyǵy men órkendeýin tiledi.
Rzaǵul Baıkeshev 1923 jyly Aqtóbe oblysynda dúnıege kelgen. 1943 jyly áskerge shaqyrylyp, Rjev túbindegi shaıqastarǵa, sondaı-aq Polsha, Rýmynııa jáne Vengrııa aýmaǵyndaǵy urystarǵa qatysqan. Soǵysty efreıtor shenimen aıaqtaǵan.
Maıdanger I jáne II dárejeli Otan soǵysy ordenderimen, Jýkov medalimen jáne birneshe mereıtoılyq marapattarmen nagradtalǵan. Soǵystan keıin uzaq jyl eńbek etip, 1983 jyly zeınetke shyqqan.
Eske salaıyq, mereke qarsańynda Qazaqstanda turatyn UOS ardagerleriniń árqaısyna 5 mln teńgeden tólengen bolatyn.
Sondaı-aq, Prezıdent Qasym-Jomart Toqaevtyń Jarlyǵymen Uly Otan soǵysyna qatysýshy Kenjebaı Mádenuly Mádenovke «Halyq qaharmany» ataǵy berildi.
