Sońǵy jyldary kitap oqýdy nasıhattaıtyn jumystar ár túrli formada iske asyp jatyr. «Jaqsy kitap jarnamasyn ózi jasaıdy» degen uǵymǵa súıep qoıyp, kitapty nasıhattamaı otyra berýge taǵy bolmaıdy. Sońǵy ýaqytta kitaptan qol úzbeý máselesiniń jıi kóterilip júrgeni de tegin emes.
Almaty oblysynyń ortalyǵy Taldyqorǵan qalasynda kitap oqımyn deýshilerge jańa múmkindiktiń kókjıegi ashyldy. Buryndary kitap oqý úshin kitaphanaǵa baryp tirkelý kerek bolsa, endigide kóshede kele jatyp, ózińiz qajet etken kitapty taýyp alýyńyz múmkin. Oblystyq ákimdik jáne Tilderdi damytý basqarmasynyń uıymdastyrýymen «Jetisý – kitapqumarlar ólkesi» atty erkin kitap almasý jobasy, ıaǵnı, «býkkrosıng» uıymdastyryldy. Ashylý saltanaty «Jastar» saıabaǵyndaǵy Muqaǵalı eskertkishiniń aldynda ótken sharaǵa qala turǵyndary, basqarma, mekeme qyzmetkerleri, oblystyq Qazaqstan halqy Assambleıasynyń hatshylyǵy, «Nur Otan» partııasy oblystyq fılıaly qatysty.
Joba avtorlarynyń maqsaty túsinikti – kitap oqýǵa degen yntany oıatý. Kitapty paıdalaný joldaryn jeńildete otyryp, oqyrmannyń rýhanı jáne zııatkerlik turǵydan tolyǵýyna múmkindik berý.
.jpg)
Oblystyq tilderdi damytý jónindegi basqarma basshysy Aıdar Bashbaev jobanyń negizi Elbasynyń «Kitapsyz jan-jaqty damý múmkin emes» degen dáıek sózine súıene otyryp jasalǵanyn aıtty. «Kitap alǵyrlyqqa jeteleıtin, oılaý qabiletin damytatyn, sóz mádenıetin qalyptastyratyn, sheshendikke baýlıtyn mı gımnastıkasy bolyp tabylady. Sondyqtan jańa joba arqyly jastardy kitap oqýǵa shaqyryp, kópshiliktiń oǵan ońaı qol jetkizýin qamtamasyz etý maqsatynda «Arba» boıynda, «Jastar» saıabaǵynda jáne Qaratal ózeniniń jaǵalaýynda kitap sóreleri ornalastyryldy. Bul sórede kitap sany 600-ge jýyq. Bastapqy kezde sóreler janyna kezekshiler qoıylady. Oqyrmandarǵa joba máni, ereksheligi túsindiriledi. «Býkkrossıng» jobasy «О́ziń oqy, basqaǵa ber!» qaǵıdasyna saıady», – deıdi. Jáne qaladan bastaý alǵan joba jumysy oń nátıjege qol jetkizip jatsa, aýdan, aýyldarda da jalǵasyn tabady.
Jobanyń tusaýyn kesken «Jetisý» gazetiniń bas redaktory Ámire Árin: «Qalaı desek te, qazir baspa ónimine degen suranys qaıta bel alyp keledi. Japonııada «Asahı», «Iomıýrı» gazetteri aptasyna 14 mıllıon taralymmen shyǵady. Bul japon halqynyń óresiniń keńeıip ketkendigin bildiredi. Bizge de, rýhanı jańǵyrý úshin, eń aldymen sana kerek. Sondyqtan, jatpaı-turmaı oqý oqyp, izdenýimiz qajet. Búgin ashylyp otyrǵan joba Qazaqstannyń rýhanı jańǵyrýyna qosylǵan bir úles dep baǵalaý kerek», – dedi.
Uıymdastyrýshylardyń aıtýynsha, erkin kitap almasýdyń máni – shań basyp jatqan dúnıelerdi jaryqqa shyǵarý, kópshilikke qyzmet etý, paıda ákelý, shyn máninde bilim bulaǵyna aınaldyrýdy qamtamasyz etý. Eger, sóreden kitap alyp, oqımyn deseńiz sizge qoıylar bir ǵana talap bar – alǵan shyǵarmańnyń ornyna basqa kitap qoıyp ketesiń. Sol arqyly, ózińizge unaǵan kitapty ózgege usynasyz jáne jaqsy shyǵarmaǵa ekinshi ómir syılaısyz deýge bolady.
Almas Núsip,
«Egemen Qazaqstan»
Almaty oblysy
