«Halyqaralyq energetıka agenttiginiń málimeti boıynsha 2015 jyly energııa tıimdiligin damytýǵa salynǵan qarjynyń ósýi 6 paıyz bolǵan, al salynǵan jalpy ınvestısııa kólemi – 221 mlrd dollar. Jańartylatyn energııa kózderin óndirý 2014 jylmen salystyrǵanda 33 paıyzǵa ósken, ıaǵnı qazirgi ýaqytta energetıka sektory energııany únemdeý jáne energııa tıimdiligin arttyrý, sondaı-aq jańartylatyn energııa kózderi tarapyna qaıta baǵdarlaý satysynda ekenin kóremiz», dedi osy jıynǵa qatysqan Investısııalar jáne damý mınıstriniń birinshi orynbasary Alık Aıdarbaev. Onyń aıtýynsha, energııa únemdeý saıasatynyń arqasynda qaýipsiz jáne taza elektr stansalaryn salýǵa bolady. Qazaqstan energııa únemdeýdi 2020 jylǵa qaraı 25 paıyzǵa, 2050 jylǵa qaraı 50 paıyzǵa ulǵaıtpaq.
Basqosýda Germanııa Ekonomıka jáne energetıka mınıstrliginiń memlekettik hatshysy Ýve Bekmaıer Qazaqstan jańartylatyn energııa kózderin damytý barysynda (JEK) Germanııanyń tájirıbesine súıengeni jón ekenin aıtty. Germanııa kezinde kómir óndirýden bas tartqanymen, munaı men gazdyń ımportyn saqtap qalǵan eken. «Eń mańyzdysy, ózin ózi retteıtin erejeler. Mysaly, Marokko men BAÁ-de, sondaı-aq byltyr Germanııada ótken jel energııasyn qoldanýǵa qatysty baıqaý bir kVt úshin úsh sent tóleıtin baǵany jasaýǵa bolatynyn kórsetti. Iаǵnı, sońǵy jyldary qol jetkizgen ınnovasııalarǵa qatysty durys saıasattyń arqasynda ınvestorlardyń memlekettiń qosymsha qoldaýynsyz-aq naryq baǵasymen jańartylatyn energııa kózderine arnalǵan elektr stansalaryn salýǵa qol jetkizdik. Bul bıznes úshin múmkindiktiń bar ekenin kórsetedi», dedi Ý.Bekmaıer.
Ol JEK-ti salýǵa ketken qysqa merzimdi shyǵyndardy uzaq merzimdi rejimde qaıtaryp alýǵa bolatynyn da aıtty.
Ashat RAIQUL,
«Egemen Qazaqstan»
