О́ner dodasynda qazylar alqasyna Qazaqstan Respýblıkasynyń eńbek sińirgen qaıratkeri, ánshi, termeshi Qatımolla Berdiǵalıev tóraǵalyq etti. Saıysqa qatysýshylar «Qobylandy batyr» jyryn oryndap, erkin taqyrypta da óner kórsetti.
Quramynda Qazaqstan Respýblıkasynyń eńbek sińirgen artısi, Ǵ.Qurmanǵalıev atyndaǵy oblystyq fılarmonııasynyń ánshisi Sáýle Taýdaeva, Qazaqstan Respýblıkasynyń Mádenıet qaıratkeri, jyrshy-termeshi Amandyq Kómekov, Qazaqstan-Oral telearnasynyń jýrnalısi, aqyn Munaıdar Balmolda, respýblıkalyq baıqaýlardyń laýreaty, halyqaralyq «Uly Dala daýysy» radıofestıvaliniń jeńimpazy, ánshi-termeshi, Qurmanǵazy atyndaǵy saz kolledjiniń oqytýshysy Armat Islıamǵalıevtar kirgen qazylar alqasy jyrshylardyń oryndaýshylyq sheberligine, sahna mádenıeti men jyrdyń syryn kórermenge jetkize bilý, kásibı deńgeılerine qarap baǵa berdi.
Ult ónerin ulyqtaý jolyndaǵy eki kúnge sozylǵan baıqaýda júırikter anyqtalyp, úmitkerler júldeli oryndar men dıplom, alǵys hattarǵa ıe boldy. Bas júlde mańǵystaýlyq Berdibaı Toıǵulıevke buıyrsa, I oryn Qyzylorda qalasynan kelgen Ádilhan Qýańbaevtyń enshisine tıdi. II oryndy Aqtóbeden kelgen О́mirhan Jetesov pen oraldyq Sáken Janǵazıev bólisti. III oryn Mańǵystaý oblysynan kelgen jyrshy Amanbek Sáýirbaevqa, oraldyq Aqmaral Kemelhanova men Gaýhar Uzaqbaıǵa buıyrdy. Qambar Jylqybaev (BQO, Bórli aýdany), Ardaq Omar (BQO, Aqjaıyq aýdany), Bolatbek Qubashev (Atyraý qalasy) dıplomant atandy.
Saıys kezinde halyqaralyq, respýblıkalyq baıqaýlardyń laýreaty jyrshy-termeshi Farhad Orazov «Arnaý» aıtsa, belgili mańǵystaýlyq jyrshy Amandyq Kómekov «Súgirdiń dombyramen aıtysyn», Berdibaı Toıǵulıev «Qarasaı qazı dastanyn», Ádilhan Qýanbaev «Júz saýal» jyryn jyrlap, kórermen qoshemetine bólendi.
Qazbek QUTTYMURATULY,
«Egemen Qazaqstan»
