Ol boıynsha endi jol qozǵalysy erejesin qolyńda planshet, noýtbýk, kompıýter bolsa úlken-kishi úırene berýge bolady. Ony tek muǵalimder ǵana emes, úıde ata-analar da paıdalana alady. Elektrondyq oqýlyqty jasaǵandar bul noý-haýdyń elimizde áli balamasy joq ekenin aıtty.
«О́rleý» biliktilikti kóterý ulttyq ortalyǵy Qostanaı oblystyq fılıalynyń dırektory Marıonella Slesar sandyq resýrstyń ınnovasııalyq joba ekenin aıta kelip, jol qozǵalysy erejesin úıretýde onyń balalarǵa qyzyqty bolatynyn jetkizdi. Oblystyq ishki ister departamenti Jergilikti polısııa qyzmetiniń bastyǵy, polısııa polkovnıgi Nyǵmet Ysmaǵulov bul jobanyń balalardyń joldaǵy jaraqatynyń azaıýyna septigi tıetinin aıtty.
«Balalar men jasóspirimderge jol qozǵalysy erejesin oqytýdyń óte qolaıly, olarǵa qyzyqty formasy, ádistemesi bolady dep úmittenemiz» dedi Nyǵmet Ysmaǵulov.
Jol qozǵalysy erejesiniń sandyq resýrsy Jitiqara aýdandyq máslıhatynyń depýtaty Gúlsara Jamanqulovanyń qoldaýymen tusaýkeserge arnalyp, qazaq jáne orys tilderinde býklet bolyp basylyp shyqty. Aldaǵy ýaqytta elektrondy oqýlyq Qostanaı oblysy men respýblıkadaǵy barlyq mektepterge taratylyp beriledi. Sonymen qatar ony «О́rleýdiń» saıtynan da kóshirip alýǵa bolady.
«Resýrs qol jetimdi platformada daıyndalǵan. Sondyqtan ony kompıýterlerge túrli sıpatpen engizýge bolady. Ony qaraý úshin ınternet jelisine qosylýdyń qajeti joq, barlyq mýltımedııalyq kontent, kerekti baǵdarlamalar resýrstyń ózinde saqtalady» dedi Marıonella Vasılevna.
Názıra Járimbetova,
«Egemen Qazaqstan»
QOSTANAI
